اقتوبەدە توتەنشە جاعدايلار سانى 6,5 پايىزعا تومەندەگەن

استانا. 16 اقپان. اقتوبە وبلىستىق ءماسليحاتىنىڭ زاڭدىلىق, قۇقىق ءتارتىبى جانە دەپۋتاتتىق ەتيكا جونىندەگى تۇراقتى كوميسسياسى مەن «نۇر وتان» دەپۋتاتتىق فراكتسياسىنىڭ كەڭەيتىلگەن وتىرىسىندا توتەنشە جاعدايلاردىڭ الدىن الۋ جانە جويۋ بويىنشا توتەنشە جاعدايلار دەپارتامەنتىنىڭ بىلتىرعى جانە ۇستىمىزدەگى جىلدىڭ ءبىرىنشى توقسانىنداعى جۇمىسىنىڭ قورىتىندىسى قارالدى. بۇل تۋرالى egemen.kz ءتىلشىسى حابارلادى. اتالعان ماسەلەگە بايلانىستى جاعدايدى بايانداعان وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى باۋىرجان سىزدىقوۆ 2014 جىلى دەپارتامەنتتىڭ اۋماقتىق بولىمشەلەرى 2111 جەدەل شاقىرتۋعا بارىپ, ناتيجەسىندە 1 524 ادام قۇتقارىلىپ, 343 زارداپ شەگۋشىگە العاشقى دارىگەرلىك كومەك كورسەتىلگەنىن جەتكىزدى. وسى باعىتتا اتقارىلعان جۇمىستاردىڭ ناتيجەسىندە ايماقتا توتەنشە جاعدايلار سانى 6,5 پايىزعا تومەندەگەن. الايدا,توتەنشە جاعدايلاردان زارداپ شەككەندەر سانى 15,5 پايىزعا كوبەيگەن. وبلىستا توتەنشە جاعدايلاردان زارداپ شەككەندەر سانىنىڭ ارتۋى حالىققا توتەنشە جاعدايلاردىڭ قاۋپى مەن پايدا بولۋ كەزىندەگى ءىس-ارەكەتتەر ەرەجەسىنىڭ جەتكىلىكسىز تۇردە حابارلانۋى سەبەبىنەن بولدى, دەيدى ول. سوندىقتان ءتيىستى ورىنداردان دەپارتامەنت ازىرلەگەن وقىتۋ-ۇيرەتۋ ماتەريالدارىن دەر كەزىندە جەرگىلىكتى باسىلىمدار مەن تەلەارنالاردا شىعارۋ ماسەلەلەرىن شەشۋدى ۇسىنادى. قازىر وبلىستا سۋ باسۋ قاۋپى بار ايماقتارعا 106 الەۋمەتتىك نىسان مەن 375 مىڭنان استام ادام تۇراتىن 6 579 تۇرعىن ءۇي جاتقىزىلعان. وتكەن جىلدارى وبلىس اۋماعىندا جاسالعان ءىس-شارالار, مونيتورينگ جانە باقىلاۋلاردىڭ ناتيجەسىندە سۋ باسۋ قاۋپى بار ايماقتاردىڭ تولىق بازاسى انىقتالعان. ناتيجەسىندە 46 ۋچاسكەنىڭ سۋ باسۋ قاۋپى بويىنشا قۇجاتى دايىندالىپ, بەكىتىلگەن. بىلتار وبلىس اۋماعىندا 682 ءورت ورىن الىپ, ءتىلسىز جاۋدىڭ سالدارىنان 10 ادام قازا بولىپ, 50 ادام ءتۇرلى دەنە جاراقاتىن العان. ءورت سالدارىنان 183 ميلليون تەڭگەدەن استام ماتەريالدىق شىعىن كەلتىرىلگەن. ءوز سوزىندە ول اۋدان ورتالىقتارىنان شالعايدا جاتقان كەيبىر ەلدى مەكەندەرگە ءورتتى سوندىرۋگە ارنايى تەحنيكالاردىڭ كەشىگىپ باراتىنىن ايتا كەلىپ, ورتكە قارسى جاساقتاردى ارناۋلى اۆتوكولىكتەرمەن جابدىقتاۋ ماسەلەسىن شەشۋدى العا تارتتى. ساتىبالدى ءساۋىرباي. دەرەك: egemen.kz. سۋرەت: temir.aktobe.gov.kz.