سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
پرەزيدەنتتىڭ ايتۋىنشا, مۇنداي فورۋمنىڭ قازاقستاندا ءوتۋى وتاندىق نەيروحيرۋرگيا جەتىستىكتەرىنىڭ كەڭىنەن مويىندالعانىن كورسەتەدى. سونىمەن قاتار مەملەكەت باسشىسى كونگرەسس نەيروحيرۋرگيا سالاسىنداعى حالىقارالىق ىنتىماقتاستىقتى دامىتۋعا زور ۇلەس قوسىپ, وزىق تاجىريبە مەن تەحنولوگيا الماسۋعا ىقپال ەتەتىنىنە سەنىم ءبىلدىردى.
– ۇلت ساۋلىعى – كەز كەلگەن ەلدىڭ قارقىندى دامۋىنىڭ نەگىزى. سوندىقتان دەنساۋلىق ساقتاۋ ءىسىن جان-جاقتى وركەندەتۋ مەملەكەتتىك ساياساتىمىزدىڭ نەگىزگى باسىمدىعى سانالادى. قازاقستان مەديتسينالىق ينفراقۇرىلىمدى جاڭعىرتۋعا, مامان دايارلاۋعا, ۇدەرىستەردى تسيفرلاندىرۋعا جانە اتالعان سالاعا يننوۆاتسيالىق ازىرلەمەلەردى ەنگىزۋگە مول قارجى بولەدى, – دەدى پرەزيدەنت.
قاسىم-جومارت توقاەۆ قازاقستان نەيروحيرۋرگيادا جاساندى ينتەللەكتىنى قولدانۋعا ايرىقشا ءمان بەرەتىنىنە نازار اۋداردى. سول ارقىلى مەديتسينانىڭ جوعارى تەحنولوگيالى سالالارىن بەلسەندى دامىتۋدى قولعا العانىن جەتكىزدى. ونىڭ ايتۋىنشا, تسيفرلى جانە روبوتتى تەحنولوگيالاردىڭ ارقاسىندا وتاندىق نەيروحيرۋرگيا سالاسى وركەندەپ كەلەدى.
مەملەكەت باسشىسى كەزدەسۋگە قاتىسۋشىلاردىڭ الەمدىك مەديتسينانى دامىتۋعا قوسقان ەلەۋلى ۇلەسىن ەرەكشە اتاپ ءوتتى.
– ارقايسىڭىز – مىڭداعان ادامنىڭ ءومىرىن قۇتقارعان جوعارى دەڭگەيلى مامانسىزدار. سىزدەردى ەڭ قيىن جاعدايدا دا ادامداردىڭ دەرتىنەن ايىعىپ كەتۋىنە ءۇمىت سىيلايتىن ىزگى ميسسيا بىرىكتىرەدى. استانادا ءوتىپ جاتقان نەيروحيرۋرگتەر كونگرەسىنە قاتىسۋ ءۇشىن ارنايى كەلدىڭىزدەر. بۇل مەديتسينادا شەكارا جوق ەكەنىن كورسەتەدى. نەيروحيرۋرگيادا عىلىم مەن يننوۆاتسيا ايرىقشا ءرول اتقارادى, – دەدى پرەزيدەنت.
مەملەكەت باسشىسى قازاقستان مەديتسينالىق تەحنولوگيالاردى ترانسفەرتتەۋگە, سونداي-اق تاجىريبە الماسۋعا باعىتتالعان حالىقارالىق ىنتىماقتاستىقتى كەڭەيتۋگە نيەتتى ەكەنىن ايتتى.
– نەيروحيرۋرگيا سياقتى جوعارى تەحنولوگيالى سالادا مەديتسينالىق ءتۋريزمدى دامىتۋ ءىسىنىڭ الەۋەتى زور. وسى باعىتتا تابىسقا قول جەتكىزۋ ءۇشىن ورنىقتى مەملەكەتارالىق بايلانىستى جولعا قويۋعا دايىنبىز, – دەدى پرەزيدەنت.
ءوز كەزەگىندە كەزدەسۋگە قاتىسۋشىلار قازاقستانداعى نەيروحيرۋرگيانى دامىتۋ مۇمكىندىكتەرىن جوعارى باعالاپ, مامان دايارلاۋ جانە وزىق تەحنولوگيامەن الماسۋ تۇرعىسىنان قولداۋ بىلدىرۋگە ۋاعدالاستى.
قاسىم-جومارت توقاەۆ مازمۇندى ءارى ناتيجەلى پىكىر الماسۋ ءۇشىن ريزاشىلىعىن ءبىلدىردى. سونداي-اق دەنساۋلىق ساقتاۋ مينيسترىنە نەيروحيرۋرگياعا, جالپى مەديتسينا سالاسىنا وزىق تەحنولوگيالاردى ەنگىزۋ شارالارىن جانداندىرۋدى, قازاقستاندا شەتەلدىكتەردى ەمدەۋ بويىنشا كورشى مەملەكەتتەرمەن ۇكىمەتارالىق كەلىسىم جاساۋ تۋرالى ۇلتتىق نەيروحيرۋرگيا ورتالىعىنىڭ باسشىسى سەرىك اقشولاقوۆتىڭ ۇسىنىسىنا قاتىستى جۇمىس جۇرگىزۋدى تاپسىردى.
جيىندا ۋولتەر ەدۋارد دەندي اتىنداعى نەيروحيرۋرگيالىق قوعامداستىقتىڭ پرەزيدەنتى, دجوردج ۆاشينگتون ۋنيۆەرسيتەتىنىڭ (اقش) نەيروحيرۋرگيا بويىنشا پروفەسسورى ساليم ابدۋلراۋف, ن.ن.بۋردەنكو اتىنداعى ۇلتتىق مەديتسينالىق نەيروحيرۋرگيانى زەرتتەۋ ورتالىعىنىڭ (رەسەي) عىلىمي جەتەكشىسى جانە قۇرمەتتى پرەزيدەنتى الەكساندر كونوۆالوۆ, Great Ormond Street اۋرۋحاناسىنىڭ ( ۇلىبريتانيا) بالالار نەيروحيرۋرگياسى مەن كرانيوفاتسيالدى حيرۋرگيا ءبولىمىنىڭ جەتەكشىسى, University College London وقۋ ورنىنىڭ بالالار نەيروحيرۋرگياسى بويىنشا پروفەسسورى نۋر ۋل وۆەيس دجيلاني, Humanitas IRCCS زەرتتەۋ اۋرۋحاناسىنىڭ (يتاليا) «گامما-پىشاق» جانە ستەرەوتاكسيكالىق نەيروحيرۋرگيا دەپارتامەنتىنىڭ ديرەكتورى پەرو پيكوتستسي, قر دەنساۋلىق ساقتاۋ ءمينيسترى اقمارال ءالنازاروۆا, «ۇلتتىق نەيروحيرۋرگيا ورتالىعى» اق باسقارما توراعاسى سەرىك اقشولاقوۆ ءسوز سويلەدى.
