مەرۋەرت اقش-تىڭ ۇزدىك جوعارى وقۋ ورىندارىنىڭ ءبىرى – پەنسيلۆانيا ۋنيۆەرسيتەتىندە ماگيستراتۋرانى ءساتتى اياقتاپ, ستۋدەنتتەرگە ارنالعان ەڭ بەدەلدى حالىقارالىق ماراپاتتاردىڭ ءبىرى – «Penn Global Student Citizenship Award» يەگەرى اتاندى. بۇل ماراپات – جاھاندىق ازاماتتىق قۇندىلىقتاردى ۇلىقتاپ, قوعامدىق بەلسەندىلىگىمەن ەرەكشەلەنگەن شەتەلدىك ستۋدەنتتەرگە عانا بەرىلەدى. 284 جىلدىق تاريحى بار Penn ۋنيۆەرسيتەتىندە بۇل ماراپات العاش رەت قازاقستاندىق ستۋدەنتكە تابىستالىپ وتىر.
ماگيستراتۋرادا وقىعان كەزەڭدە مەرۋەرت ءبىلىم سالاسىنداعى تەڭدىك پەن ينكليۋزيا تاقىرىپتارىندا زەرتتەۋلەر جۇرگىزىپ, گلوبالدىق ساياسات ورتالىعىندا تاجىريبەدەن ءوتتى. ول ۋنيۆەرسيتەتتىك شارالارعا بەلسەنە ارالاسىپ, ستۋدەنتتىك ۇكىمەتتىڭ پرەزيدەنتى بولىپ سايلاندى. بۇل – ءبىلىم مەن كوشباسشىلىقتى ۇشتاستىرا بىلگەن جاس عالىمنىڭ تاعى ءبىر جارقىن جەتىستىگى. ۋنيۆەرسيتەتتىڭ رەسمي سايتىندا: «مەرۋەرت قازاقستاندى اكادەميالىق جانە قوعامدىق ومىردە لايىقتى ءارى ماقتانىشپەن تانىستىرىپ ءجۇر» دەپ ەرەكشە اتاپ وتىلگەن.
2025 جىلعى كوكتەمدە مەرۋەرت بيجانوۆاعا تاعى ءبىر اسا ماڭىزدى مۇمكىندىك تۋدى – ۇلىبريتانيانىڭ وكسفورد ۋنيۆەرسيتەتىنەن PhD (فيلوسوفيا دوكتورى) باعدارلاماسىنا شاقىرتۋ الدى. ول ءبىلىم بەرۋ فيلوسوفياسى باعىتى بويىنشا دوكتورلىق وقۋىن 2025 جىلدىڭ قازان ايىندا باستايدى.
مەرۋەرتتىڭ ءومىر جولى – جاستارعا ارنالعان شىنايى موتيۆاتسيا, تاباندىلىق پەن ءبىلىمنىڭ جەمىستى ناتيجەسى. ول حالىقارالىق دەڭگەيدە قازاقستاننىڭ اتىن ابىرويمەن شىعارىپ جۇرگەن, جاڭا بۋىن كوشباسشىلارىنىڭ جارقىن وكىلى.
