ميچيگان ۋنيۆەرسيتەتىنىڭ بالالار مەن جاسوسپىرىمدەر پسيحياترياسى ءبولىمىنىڭ ديرەكتورى, بالا پسيحياترى ناسۋح مالاس جاز ۋاقىتىن قالاي ءتيىمدى پايدالانۋعا بولاتىنى تۋرالى زەرتتەۋىن جاريالادى. ول وسى ۋاقىتتا بالامەن اراداعى بايلانىستى كۇشەيتۋ قاجەت ەكەنىن ايتادى. «كوپ اتا-انا جازعى دەمالىستى تەك بوس ۋاقىت دەپ قابىلدايدى. ال شىن مانىندە بۇل – بالانىڭ پسيحولوگيالىق ءال-اۋقاتىن قالپىنا كەلتىرىپ, ىشكى جان دۇنيەسىن تۇسىنۋگە تاپتىرماس كەزەڭ», دەيدى ول.
ونىڭ ايتۋىنشا, جازدا بالاداعى كۇيزەلىس, مازاسىزدىق, ەموتسيونالدىق شارشاۋ ۋاقىتشا باسىلادى, ال اتا-انا ءدال وسى تىنىش ساتتە بالاسىنىڭ شىنايى كوڭىل-كۇيىن بايقاي الادى. «بالا ءوز ويىن اشىق ايتۋعا ۇمتىلعاندا, ءبىز ونى تىيماۋىمىز كەرەك. رەنىش بىلدىرسە, تىڭداڭىز. اشۋلانسا, سابىر قىلىڭىز. وچىلايشا سەنىمدى قارىم-قاتىناستىڭ ىرگەتاسىن قالايسىز», دەيدى ناسۋح مالاس.
سونداي-اق, ول اتا-انالاردىڭ ەموتسيالىق جاۋاپكەرشىلىگى تۋرالى دا جازادى. «بالانى ۇرىسىپ, تىيىپ تاستاۋ وڭاي. بىراق اتا-انا رەتىندە ەڭ قيىنى – ءوز ەموتسياڭدى باقىلاۋ. بالانىڭ اشۋىن وزىمىزگە قارسى شابۋىل ەمەس, ونىڭ ىشكى كۇيزەلىسىنىڭ كورىنىسى رەتىندە قابىلداۋعا ۇيرەنۋىمىز كەرەك», دەيدى زەرتتەۋشى.
پروفەسسوردىڭ پىكىرىنشە, بالا ءوزىن ەستىگەنىن, تۇسىنگەنىن سەزىنگەن كەزدە عانا اتا-انامەن اشىق سويلەسۋگە دايىن بولادى. ء«سىز بالاڭىزعا بىردەڭە ۇيرەتكىڭىز كەلسە, الدىمەن ءوزىڭىز سونى جاساڭىز. جان تىنىشتىعىن, سەزىمدى باسقارۋدى, تىڭداۋدى ءبارىن بالا سىزدەن ۇيرەنۋى كەرەك. اتا-انا بولۋ وڭاي شارۋا ەمەس, ءاردايىم ءبارى ءمىنسىز بولادى دەۋ دە قاتە. بىراق جازعى دەمالىس – وتكەن وقۋ جىلىن بىرگە سارالاپ, بالاڭىزبەن اراداعى بايلانىستى جاقسارتۋعا, جاڭا وقۋ جىلىنا بىرگە دايىندالۋعا بەرىلگەن تاماشا مۇمكىندىك. وسى كەزەڭدى ءتيىمدى پايدالانساڭىز, بالا وزىنە سەنىمدى بولىپ وسەدى, ورتادا ءوزىن ەركىن ۇستاي الادى جانە ومىردەن ءوز ورنىن تابۋعا قادام جاسايدى. ەڭ باستىسى وعان ءسىزدىڭ قامقورلىعىڭىز بەن جاناشىرلىعىڭىز قاجەت ەكەنىن ۇمىتپاڭىز», دەيدى ن. مالاس.
