ۇرىستىڭ قىزۋ كەزەڭى. ءبىزدىڭ بولىمشەنىڭ العا باسۋىنا جاۋ بوگەت جاساي بەردى. ولار كول ورتاسىنداعى ارالعا بەكىنىپ الىپ, زەڭبىرەكتەن ءبىزدىڭ بولىمشەگە وق جاۋدىرىپ تۇر. كوماندوۆانيە جاۋدىڭ وسى زەڭبىرەك ۇياسىنىڭ ءۇنىن وشىرۋگە ەكى ادام جىبەردى. سونىڭ ءبىرى قازاقتىڭ ەرجۇرەك ۇلى قابىش مۋسين ەدى.
تاستاي قاراڭعى ءتۇن. كوزگە تۇرتسە كورىنبەيدى. قابىش جولداسىمەن جەر باۋىرلاپ, جاۋدىڭ زەڭبىرەك ۇياسىنا تاقاپ كەلدى دە, گراناتا لاقتىردى. جاۋ ترانشەياسىنىڭ ك ۇلى كوككە ۇشتى. ىشىندە وتىرعان ءتورت نەمىستىڭ ۇشەۋى ءولدى دە, بىرەۋى اۋىر جارالاندى. جارالى نەمىستى تۇتقىنعا الىپ, قابىشتار ءوز بولىمدەرىنە قايتىپ ورالدى.
كوماندوۆانيە جاۋ تىلىنداعى ن. سەلوسىنا بارىپ ء«تىل» اكەلۋگە 15 جاۋىنگەردەن قۇرالعان بارلاۋ وتريادىن جىبەردى. مۇنىڭ ىشىندە 8 ادامنان قۇرالعان ءبىر توپتى مۋسين باسقاردى.
جاۋىنگەرلەر ءتۇن قاراڭعىسىن جامىلىپ, نەمىستەر جاساعان سىم تور توسقاۋىلدارىن قيىپ, جاۋ ترانشەياسىنىڭ قاسىنا كەلدى. نەمىستەر جاڭا عانا بەكىنىس جاتىر ەكەن. سوۆەت ەرلەرى بىرنەشە گراناتا لاقتىرىپ, نەمىس ترانشەياسىنا باسىپ كىردى. قولما-قول ۇرىستا ولار بىرنەشە نەمىستى جويىپ, ءبىر ءفريتستى قولعا ءتۇسىردى.
جاۋىنگەرلەر كەيىن قايتتى. قابىش تاپسىرمانى ويداعىداي ورىنداعانى ءۇشىن ءىىى دارەجەلى داڭق وردەنىمەن ناگرادتالدى.
قىستىڭ ساقىلداعان ايازدى ءبىر كۇنى. كوماندوۆانيە جاۋدان ء«تىل» اكەلۋگە ءبىر توپ بارلاۋشى جىبەردى. بۇلاردىڭ ىشىندە قابىش تا بار ەدى.
بۇلار جاۋ اسكەرىنىڭ الدىڭعى شەبىنە ءوتىپ كەلە جاتىپ نەمىستىڭ 4 تانكىنە كەزدەسىپ قالدى. بۇل تانكتەر اعاش اراسىندا جاسىرىنىپ جۇرەدى ەكەن. سوۆەت جاۋىنگەرلەرى تانكتەردى اتقىلاي باستادى. مۇنى كورىپ, جاۋ دا وقتى بوراتىپ قويا بەردى. ۇرىس قىزا ءتۇستى. جاۋدىڭ ەكى تانكى ءبولىنىپ بوي تاسالادى. ال, ەكى تانك بۇرىنعىسىنشا قارسىلاسۋىن توقتاتپاي وقتى بوراتا بەردى. نوسەرلەپ سەبىلىپ تۇرعان وققا قاراماستان, قابىش ءبىر تانككە جاقىنداپ كەلىپ گراناتا لاقتىردى. كوزدەگەنى ءمۇلت كەتپەدى. تانكتان بۇرق ەتىپ جالىن شىقتى دا, تۇرىپ قالدى. تانك ىشىندەگى نەمىستى قابىش دەرەۋ جۇگىرىپ بارىپ سىرتقا سۋىرىپ الدى. قابىش بۇل جولى دا كوماندوۆانيە تاپسىرماسىن ۇلگىلى ورىنداپ شىقتى. ول ەرەكشە كورسەتىلگەن باتىرلىعى, وجەتتىگى ءۇشىن ءىى دارەجەلى داڭق وردەنىمەن ناگرادتالدى.
قابىش قىزمەت ىستەيتىن بولىمشەنىڭ قارسىسىندا نەمىستەردىڭ ازىق-ت ۇلىك جينايتىن ءبولىمى ورنالاسقان. مۇندا 12 گيتلەرشىنىڭ بار ەكەنى ءمالىم بولدى. ءبىر توپ جاۋىنگەر وسىدان ء«تىل» اكەلۋگە اتتاندى. ولاردىڭ قاتارىنا قابىش تاعى قوسىلدى. بۇل جاۋىنگەرلەردىڭ ءبارى جاۋ تىلىنا ءوتۋ ءۇشىن نەمىس اسكەرىنىڭ كيىمىن كيدى. بۇلار ن. ستانتسياسىنىڭ تۇبىنە كەلىپ, كۇننىڭ كەش بولۋىن كۇتىپ جاتتى. نەمىستەردىڭ قارۋ-جاراق, ازىق-ت ۇلىك تيەگەن كولىكتەرى مايدانعا قاراي قابىشتار جاتقان جەردىڭ جانىنداعى جولمەن اعىلىپ جاتىر.
ساعات 7 بولدى. ىمىرت جابىلدى. جاۋدىڭ جۇك تيەگەن 90 ات-ارباسى جولدان وتە باستادى. مۇنىڭ الدىندا نەمىستىڭ ءبىر اعا لەيتەنانتى, ءبىر فەلدفەبەلى, ءبىر كىشى لەيتەنانتى كەلەدى. ولار سالت اتقا مىنگەن. قابىشتار ءبارىن كورىپ جاتىر. ولار جولدان 10-15 مەتر جەردە قالىڭ بۇتانىڭ اراسىندا جاقسىلاپ ورنالاسقان ەدى. بىراق نەمىستىڭ اتتارى الدەنەنى سەزگەندەي وسقىرىنىپ جۇرمەي تۇرىپ الدى. نەمىس وفيتسەرلەرى ەكىلەنىپ, «كىم بارسىڭ, شىق بىلاي!» دەپ ايعايلادى. ء«ا, سەنى سور كۇتىپ تۇر ەكەن, سەنىڭ سىباعاڭ مىناۋ بولسىن, – دەپ قابىش نەمىس وفيتسەرىن باسىپ سالدى. وق ءمۇلت كەتپەدى, نەمىس قالپاقتاي ۇشتى. وسى ەكى ارادا قابىشتىڭ سەرىكتەرى نەمىس فەلدفەبەلىن دە جەر قۇشتىرىپ ۇلگەرگەن ەكەن. جاۋدىڭ ءۇشىنشى وفيتسەرىن دە جىگىتتەر ءا دەگەنشە جايعاستىردى.
باسشىلارىنان ايرىلعان نەمىس ارباكەشتەرى نە ىستەۋگە بىلمەي ەستەرى شىعىپ كەتتى. جاۋىنگەرلەر ولاردى قيا باستىرماي قىرىپ سالدى. اتتان ۇشىپ تۇسكەن نەمىس ولگەن جوق, جارالى بولعان ەكەن. ءبىزدىڭ جاۋىنگەرلەر ونى جانە جاۋدىڭ ات-اربالارىن, قولعا تۇسكەن باسقا دا نەمىستەردى الىپ كەيىن قايتتى. وسى جولى تاپسىرمانى ويداعىداي ورىنداعانى ءۇشىن قازاق حالقىنىڭ باتىر ۇلى «باتىرلىعى ءۇشىن» مەدالىن ناگرادقا الدى. بۇدان باسقا دا ول تالاي-تالاي قيىن-قىستاۋ كەزەڭدەردە ماڭىزدى تاپسىرمالاردى ۇلگىلى ورىنداپ وتىردى. سوڭعى كەزدە كورسەتكەن ەرلىگى ءۇشىن كوماندوۆانيە قابىشتى «قىزىل تۋ» وردەنىمەن ناگرادتاۋعا ۇسىندى. قازاقتىڭ جاس جىگىتى قابىشتىڭ ەرلىكتەرى, مىنە وسىنداي. مۇنىڭ ءبارىن ونىڭ ومىراۋىنداعى تىزىلگەن وردەن مەن مەدالدەردىڭ وزدەرى-اق ايقىن بايانداپ تۇرعانداي.
قابىش مۋسين جولداس سوعىستان بۇرىن الماتى قالاسىندا 12 قازاق مەكتەبىنىڭ 9 كلاسىن ءبىتىردى. ول وتان سوعىسى باستالعالى بەرى مايداندا. مۋسين جاقىندا تۋعان ەلى قازاقستانعا ن. اتقىشتار ديۆيزياسىنىڭ دەلەگاتسيا مۇشەسى بولىپ كەلدى.
