اقمولا وبلىسىنداعى بۋراباي ءوڭىرى – تەك تابيعاتى كوركەم جەر عانا ەمەس, ەلىمىزدىڭ ىشكى تۋريزمىندەگى ەڭ ماڭىزدى ايماقتاردىڭ ءبىرى. 2024 جىلدىڭ جازىنان باستاپ بۇل وڭىردە ەكولوگيالىق ءتۋريزمدى دامىتۋ, مادەني مۇرانى دارىپتەۋ جانە تۋريستىك ينفراقۇرىلىمدى جاڭعىرتۋ باعىتىندا بىرقاتار اۋقىمدى جوبالار جۇزەگە اسۋدا.
ماۋسىم ايىندا «بۋراباي» مەملەكەتتىك ۇلتتىق تابيعي پاركىندە سەگىز شولۋ الاڭىنىڭ قۇرىلىسى باستالدى. اتالعان جوبا ەكوتۋريزمدى وركەندەتىپ قانا قويماي, قورشاعان ورتانى قورعاۋعا دا وڭ ىقپال ەتپەك.
شولۋ الاڭدارى بولەكتاۋ, ايۋتاس, ماكسيمكا, تۋفەلكا سەكىلدى كورىكتى جەرلەردە سالىنىپ جاتىر. جاڭا الاڭداردا دەمالۋعا ارنالعان تەرراسسالار, فوتوزونالار مەن ارقاندى ساياباقتار ورناتىلادى. ءاربىر نىساننىڭ جەكە ارحيتەكتۋرالىق ءستيلى بولادى.
«عىلىمي زەرتتەۋلەر كورسەتكەندەي, تانىمال تۋريستىك ورىندارداعى رەكرەاتسيالىق جۇكتەمە 9 ەسەگە دەيىن ارتىپ كەتكەن. بۇل – توپىراقتىڭ تابيعي قالپىنا كەلۋىنە كەدەرگى كەلتىرىپ, دەگراداتسيا بەلگىلەرىن تۋدىرىپ وتىر. سوندىقتان جاڭا باسپالداقتار مەن دەمالىس الاڭدارى تۋريستەرگە جايلى جاعداي جاساۋمەن قاتار, تابيعاتتىڭ توزۋىنا جول بەرمەيدى», دەيدى ۇلتتىق پارك ديرەكتورى سەرگەي بىكوۆ.
سونىمەن قاتار, جوبا اياسىندا كولىككە ارنالعان 55 اۆتوتۇراق سالىنىپ, ششۋچە كولى مەن بۋراباي كەنتىندە 35 «اقىلدى» بەينەباقىلاۋ كامەرالارى ورناتىلادى. قولدانىستاعى جۇيەلەر دە جاڭعىرتىلىپ, قاۋىپسىزدىك پەن ءتارتىپ ساقتاۋ كۇشەيتىلەدى.
2024 جىلدىڭ تامىزىندا ششۋچينسك قالاسىندا جاڭا شولۋ الاڭىنىڭ قۇرىلىسى باستالدى. ۇلتتىق برەند – كيىز ءۇي پىشىنىندە جاسالعان بۇل قۇرىلىم تەمىربەتون نەگىزدە بوي كوتەرۋدە. ۇزىندىعى 21 مەتر, ەنى 3 مەتر, جالپى سالماعى – 74 توننا. شولۋ الاڭىنىڭ بيىكتىگى – 14 مەتر, ال ديامەترى – 9 مەتر.
بۇل نىسان 273,70 مەتر بيىكتىكتە ورنالاسىپ, بۋراباي كۋرورتتىق ايماعىنا تۇسەتىن رەكرەاتسيالىق جۇكتەمەنى ازايتۋعا باعىتتالعان. كيىز ءۇي تارىزدەس الاڭ كەشكى ۋاقىتتا نەون جارىعىمەن جارىقتاندىرىلادى.
بۋرابايدان 12 شاقىرىم جەردە ورنالاسقان «Aqmaral» مارال شارۋاشىلىعى – ەكولوگيالىق تۋريزم مەن ءداستۇرلى ەمدەۋ ادىستەرىن بىرىكتىرگەن كەشەن. جوبا اياسىندا تابيعي رەسۋرستاردى ۇتىمدى پايدالانۋ ارقىلى حالىقتىڭ دەنساۋلىعىن جاقسارتۋعا, سونداي-اق ۇلتتىق سالت-ءداستۇردى تانىتۋعا ەرەكشە كوڭىل بولىنگەن.
كەشەندەگى پانتىمەن ەمدەۋ – مارال مۇيىزىنەن الىناتىن دارۋمەندەر مەن بيولوگيالىق بەلسەندى زاتتارعا باي ۆاننالار مەن ەمدىك پروتسەدۋرالاردى ۇسىنادى. بۇل ادىستەر ادامنىڭ يممۋنيتەتىن نىعايتۋعا جانە اعزانىڭ جالپى جاعدايىن جاقسارتۋعا ىقپال ەتەدى.
فەرما اۋماعىندا مارال شارۋاشىلىعى ورنالاسقان. تۋريستەر جانۋارلاردىڭ تىنىس-تىرشىلىگىمەن جاقىن تانىسىپ, ولارعا كۇتىم جاساۋ پروتسەسىن باقىلاپ, پانتى جيناۋدىڭ ءداستۇرلى ادىستەرىنە قانىق بولا الادى. سونىمەن قاتار, ەكسكۋرسيالار مەن ەتنوگرافيالىق باعدارلاما اياسىندا كەلۋشىلەرگە كيىز ۇيدە دەمالۋ, ۇلتتىق تاعامداردان ءدام تاتۋ جانە سالت-داستۇرلەرمەن تانىسۋ مۇمكىندىگى ۇسىنىلادى.
ال بۋرابايداعى 2024 جىلدىڭ شىلدەسىندە تولىق قايتا جوندەۋدەن وتكەن مۋلتيمەديالىق ينتەراكتيۆتى كەشەن (ميك) بۇگىندە قازاقستانداعى ەڭ تەحنولوگيالىق مۋزەيلەردىڭ بىرىنە اينالدى. انيماتسيالىق, دىبىستىق جانە ۆيزۋالدى قۇرالداردى كەڭىنەن قولداناتىن كەشەن قازاق حالقىنىڭ تاريحى مەن مادەنيەتىنە جاڭا قىرىنان تانىپ-بىلۋگە مۇمكىندىك بەرەدى.
كەشەندەگى «كۋب 360» زالى — قازاقستانداعى بالاماسى جوق كينوالاڭ. وندا 30 پروەكتور ارقىلى كورەرمەندەردى وقيعا جەلىسىنىڭ ورتاسىنا ەنگىزەتىن ەرەكشە فورماتتاعى فيلمدەر كورسەتىلەدى. مۇنداي ءتاسىل كورەرمەننىڭ نازارىن تولىق اۋدارىپ, تاريحي دەرەكتەردى اسەرلى جەتكىزۋدى قامتاماسىز ەتەدى.
ميك-تە سونىمەن قاتار ينتەراكتيۆتى كورمەلەر مەن ويىن تەحنولوگيالارى دا كەڭىنەن قولدانىلادى. بالالار مەن شەتەلدىك قوناقتار ءۇشىن ارنايى ازىرلەنگەن ەكسپوزيتسيالار ۇلتتىق مۋزىكالىق اسپاپتار, قازاق ويۋ-ورنەكتەرى, جانۋارلار مەن وسىمدىكتەر الەمى تۋرالى مالىمەتتەردى جەڭىل ءارى قىزىقتى تۇردە ۇسىنادى.
كەشەن كۇن سايىن 10:00-دەن 20:00-گە دەيىن جۇمىس ىستەيدى. بيلەت قۇنى ەرەسەكتەرگە — 1500 تەڭگەدەن باستاپ, بالالارعا — 800 تەڭگەدەن باستالادى. ارنايى جەڭىلدىكتەر دە قاراستىرىلعان.
سونىمەن قاتار, بۋراباي مەملەكەتتىك ۇلتتىق پاركى اۋماعىندا اۆتوكولىكتەرگە ارنالعان ونلاين تولەم جۇيەسى ەنگىزىلدى. دەمالۋشىلار ەندى پارككە كىرگەن سوڭ كولىك ءنومىرى تىركەلىپ, QR-كود نەمەسە Kaspi.kz جانە Homebank قوسىمشالارى ارقىلى تولەم جاساي الادى. QR-كودتار پاركتىڭ بارلىق 5 باقىلاۋ-وتكىزۋ پۋنكتتەرىندە, ابىلاي حان الاڭىندا, بولەكتاۋ, كوگىلدىر شىعاناق, وقجەتپەس پەن «ۇلۋتاس» ماڭىنداعى تۇراقتاردا ورنالاسقان. بۇل – دەمالۋشىلاردىڭ ۋاقىتىن ۇنەمدەپ, قىزمەت ساپاسىن ارتتىرۋعا باعىتتالعان باستاما. شلاگباۋم الدىندا كولىك كەپتەلىسىن تۋدىرماس ءۇشىن بانك قوسىمشالارى ارقىلى الدىن الا تولەم جاساعان ءجون.
بۋراباي وڭىرىندەگى جاڭا جوبالار – تەك دەمالىس ورنى ەمەس, سونىمەن قاتار تاريحي, مادەني, ەكولوگيالىق باعىتتاعى كەشەندى ءتۋريزمنىڭ جارقىن ۇلگىسى. «Aqmaral» مارال شارۋاشىلىعى مەن جاڭارتىلعان ميك جوبالارى ۇلتتىق بولمىستى تانىتۋ, سالاماتتى ءومىر سالتىن ناسيحاتتاۋ جانە ەل ىشىندەگى ءتۋريزمدى دامىتۋ ماقساتىنداعى ماڭىزدى باستامالار ساناتىندا. جاز شىعا بۋرابايعا اعىلاتىن تۋريستەر ءۇشىن «Drive fest», «Burabay summer fest» سىندى كوپتەگەن ءىس-شارالار ۇيىمداستىرىلىپ, دەمالىس ماۋسىمىنىڭ قىزىقتى وتۋىنە ىقپال ەتەدى.
كاميلا تايتولەۋ,
ل.گۋميلەۆ اتىنداعى ەۇۋ-دىڭ 3-كۋرس ستۋدەنتى.
