بەس ساعاتقا سوزىلعان كۇردەلى وپەراتسيانى كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ پەن UMC «جۇرەك ورتالىعى» №2 كارديوحيرۋرگيا بولىمشەسىنىڭ مەڭگەرۋشىسى سۆەتلانا نوۆيكوۆالارعا قوسا, تاجىريبەلى انەستەزيولوگتار مەن كارديوحيرۋرگتار توبى بىرلەسە جاسادى.
ال دونور ماسەلەسىنە كەلەتىن بولساق, دارىگەرلەر الماتى قالاسىنىڭ ورتالىق قالالىق اۋرۋحاناسىنا تۇسكەن 40 جاستاعى ەر ادامنىڭ ميى ولگەنىن راستادى.
ميى سەمگەن پاتسيەنتتىڭ جۇرەگى الماتى وبلىسى تالعار قالاسىنىڭ تۇرعىنى 43 جاستاعى ەر ادامعا ترانسپلانتاتسيالاندى. ول يشەميالىق كارديوميوپاتياعا, جۇرە پايدا بولعان جۇرەك دەرتى, ميترالدى قاقپاقشا قىزمەتى مەن 26% شىعارىلۋ فراكتسياسى تومەندەگەن سوزىلمالى جۇرەك قىزمەتىنىڭ جەتكىلىكسىزدىگىنە, 2022 جىلى ينفاركتقا شالدىققان. ناۋقاس ازداپ قيمىلداعاننىڭ وزىندە ەنتىگىپ, جۇرەگى قىزمەتىن دۇرىس اتقارماي, جالپى السىزدىك پەن باس اينالاتىن جاعدايعا جەتكەن. جۇرگىزىلگەن ەم-دومدارعا قاراماستان, ناۋقاستىڭ دەنساۋلىعى دۇرىستالماي, جۇرەكتىڭ كوپ بولىگى تىرتىقتانىپ, جيىرىلمايتىن جاعدايعا دۋشار بولعان.
ترانسپلانتاتسياعا دەيىن دە وعان بىرنەشە رەت ستەنت قويىلعان, كارديوۆەرتەر-دەفيبريللياتور يمپلانتاتسيالانعان ەكەن. اۋرۋدىڭ قولايسىز بولجامىن ەسكەرە وتىرىپ, بيىلعى قاڭتار ايىندا UMC ماماندارى LVAD يمپلانتاتسيالاۋ ۇسىنعان, بىراق ناۋقاس باس تارتادى. ەمدەۋدەن ەش ناتيجە بولماعاندىقتان جۇرەك ترانسپلانتاتسياسىن كۇتۋ تىزىمىنە قويىلدى.
«جۇرەك ترانسپلانتاتسياسى بۇگىنگى كۇنى جۇرەك قىزمەتى جەتكىلىكسىزدىگىنىڭ سوڭعى ساتىسىنداعى ناۋقاستاردى ەمدەۋدەگى «التىن ستاندارتى». وكىنىشكە وراي, ونداي پاتسيەنتتەردىڭ سانى جىلدان جىلعا ارتىپ كەلەدى. اعزا اۋىستىرۋدىقاجەت ەتەتىندەردىڭ بارلىعىنا ترانسپلانتاتسيا جاساۋ مۇمكىندىگى شەكتەۋلى, سەبەبى دونورلىق ورگان جەتىسپەيدى. مىسالى, 2025 جىلعى 10 مامىرداعى جاعداي بويىنشا قازاقستاندا جۇرەك ترانسپلانتاتسياسىن كۇتۋ پاراعىندا 139 ەرەسەك جانە 7 بالا تۇر», دەيدى كارديولوگيا جانە ىشكى اۋرۋلار عزي باسقارما توراعاسى مارات پاشيموۆ.
«ناۋقاس دونوردى كوپ كۇتكەن جوق. جۇرەك ترانسپلانتاتسياسى سياقتى وپەراتسيالار كوپ ادامنىڭ ءومىرىن ساقتاپ قالۋعا كومەكتەسەدى دەپ ۇمىتتەنەمىز», دەيدى كلينيكا باسشىسى.
مارات ورىنباسار ۇلى UMC «جۇرەك ورتالىعى» مەن ترانسپلانتتاۋدى جانە جوعارى تەحنولوگيالىق مەديتسينالىق قىزمەتتى ۇيلەستىرۋ جونىندەگى رەسپۋبليكالىق ورتالىعىنا كومەك پەن قولداۋ كورسەتكەنى ءۇشىن العىسىمىز شەكسىز, دەدى.
ينستيتۋتتىڭ كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ: «جۇرەك ترانسپلانتاتسياسى – سوڭعى ساتىداعى جۇرەك قىزمەتى جەتكىلىكسىزدىگىنىڭ ەڭ ءتيىمدى جولى. بۇل وپەراتسيا باسقا ەمدەۋ قاجەتتى ناتيجە بەرمەگەن جاعدايدا جاسالادى. قازىر ناۋقاستىڭ جاعدايى تۇراقتى, جاعدايى ءتاۋىر بولا باستادى. رەانيماتسيا بولىمشەسىنەن بەيىندى بولىمشەگە اۋىستىرىلدى. ەندى ول ەل قاتارلى ءومىر سۇرۋگە مۇمكىندىك الدى», دەدى.
ال جوعارىدا اتاپ وتكەن دونوردىڭ جۇرەگى عانا ەمەس, سونىمەن قاتار 2 بالاعا بۇيرەگى ترانسپلانتاتسيالانعانىن, سونىمەن قاتار ەكى مولدىرقابىقتارى الىنعانىن ايتا كەتۋ كەرەك.
