ماسساچۋسەتس شتاتىنداعى ۆۋستەر قالاسىندا ورنالاسقان «Worcester Polytechnic Institute» بازاسىندا وتكەن «WPI Annual FLL Event» (WAFFLE) اتتى حالىقارالىق روبوتتەحنيكا چەمپيوناتىنا قاتىسۋشىلار الەمنىڭ 108 ەلىنەن كەلىپتى. 650-گە تارتا كوماندا قاتىسقان سايىستا ءار كوماندا ءوز جوباسى مەن يننوۆاتسيالىق يدەياسىن ورتاعا سالىپ, ەڭ مىقتىنى انىقتاعان.
– وسى بايراقتى باسەكەدە ورال قالاسىنداعى نازارباەۆ زياتكەرلىك مەكتەبىنىڭ وقۋشىلارى قۇرعان «Tidal Tumble» كومانداسى «Engineering Excellence Awards» اتالىمىندا 2-ورىن الىپ, جۇلدەگەر اتاندى. بۇل – تەك مەكتەپتىڭ عانا ەمەس, تۇتاس قازاقستاننىڭ جەتىستىگى! – دەيدى اتالعان مەكتەپتىڭ ءباسپاسوز حاتشىسى گۇلناز نۇعمانقىزى ءسۇيىنشى حاباردى جەتكىزىپ.
قۇرامىندا ءاليحان سەرىك, تايىر نازار, ادىلەت سەيتەنوۆ, ءىلياس سەرىكوۆ, تايىر ۋاشەۆ, نۇرىمحان بەركىن, ءادىلحان سەرىكوۆ, فاررۋح تورەقوجا, ازات ءابدىراحمانوۆ سىندى جاس زياتكەرلەر بار ورالدىق كوماندا «Agua Aeris» اتتى اۋادان سۋ وندىرەتىن قۇرىلعىنى جاھاندىق عالىمدارعا تانىستىرعان. ءسويتىپ, ەل نامىسىن قورعاي وتىرىپ, قازاق جاستارىنىڭ اقىل-پاراساتىن, ءبىلىمىن جانە ينجەنەرلىك قابىلەتىن الەمگە ايگىلەدى.
«AquaAeris — بۇل اۋىزسۋ تاپشىلىعى ماسەلەسىن شەشۋگە ارنالعان يننوۆاتسيالىق جوبا. قۇرىلعى اۋادان ىشۋگە جارامدى سۋدى وندىرە وتىرىپ, الەمنىڭ كەز كەلگەن نۇكتەسىندە سەنىمدى ءارى ەكولوگيالىق تازا سۋ كوزىمەن قامتاماسىز ەتۋگە مۇمكىندىك بەرەدى. بۇل قۇرىلعى اۋىزسۋ تاپشىلىعى ماسەلەسىن شەشۋگە كومەكتەسىپ, سۋاستى الەمىنە تۇسەتىن جۇكتەمەنى ازايتادى», دەيدى كوماندانىڭ عىلىمي جەتەكشىسى ارمات بولات ۇلى.
وسىلايشا, ورالدىق زياتكەرلەر روبوت قۇراستىرىپ, جوبا قورعاپ قانا قويماي, قازاقستاننىڭ اتىن جەر-جاھانعا تانىمال ەتتى.
باتىس قازاقستان وبلىسى
