سۋرەتتى تۇسىرگەن – رافحات حالەلوۆ
تەمىر ناعىم ۇلى سوناۋ 1992 جىلى, تاۋەلسىزدىكتىڭ تاڭسارىسىندە-اق ەل گازەتى – «ەگەمەننىڭ» ءتىلشىسى اتانىپ, وسى قىزمەتىنەن زەينەت دەمالىسىنا شىققان ارداگەر ارىپتەسىمىز ەدى.
جۋرناليستيكا سالاسىنداعى جەمىستى قىزمەتى ءۇشىن تەمىر قۇسايىن 1995 جىلى قازاقستان جۋرناليستەر وداعى سىيلىعىنا يە بولدى, 1996 جىلى «قازاقستاننىڭ جىل ءجۋرناليسى» اتاندى. رەسپۋبليكالىق باسىلىمداعى تابىستى ەڭبەگى, كاسىبي جەتىستىكتەرى ءۇشىن مەملەكەتتىك ماراپاتقا دا ۇسىنىلدى. 2005 جىلى «ەرەن ەڭبەگى ءۇشىن» مەدالىمەن, 2012 جىلى جەلتوقسان ايىندا «قۇرمەت» وردەنىمەن ماراپاتتالدى. 2014 جىلى تەمىر ناعىم ۇلىنىڭ وڭىرىنە جەرلەستەرى «قازتالوۆ اۋدانىنىڭ قۇرمەتتى ازاماتى» بەلگىسىن تاقتى.
تەمىر اعامىز 2018 جىلى «قازاقستان رەسپۋبليكاسىنىڭ اقپارات سالاسىنىڭ ۇزدىگى» اتانسا, 2020 جىلى قازاقستان رەسپۋبليكاسى پارلامەنتى ءماجىلىسى بەلگىلەگەن «پارلامەنت ءسوزى» ارنايى سىيلىعىنىڭ لاۋرەاتى بولدى. زەينەت دەمالىسىنا شىققان سوڭ دا قالامىن سۋىتپاي, رەسپۋبليكالىق, وبلىستىق باسىلىمداردا تۇراقتى جازىپ ءجۇردى. باتىس قازاقستان وبلىستىق «ورال ءوڭىرى» گازەتىندە «قازاقستان تاۋەلسىزدىگىنە 30 جىل» اتتى ارنايى بەتتىڭ جاۋاپتى رەداكتورى بولىپ, 2021 جىلى قازان ايىندا ومىردەن وتكەنگە دەيىن ماقالا جاريالاپ تۇردى.
19 ماۋسىم – تەمىر اعامىزدىڭ تۋعان كۇنى ەدى. وسى كۇنى ارىپتەستەرى ومىردەن وزعان مايتالمان ءتىلشىنى ەسكە الۋدى ءجون كوردى. باتىس قازاقستان وبلىستىق قوعامدىق دامۋ باسقارماسىنىڭ قولداۋىمەن جارىق كورگەن «ەگەمەننىڭ» تەمىرى» اتتى كىتاپتىڭ دا تۇساۋى وسى كۇنى كەسىلدى.
قادىر مىرزا ءالى اتىنداعى مادەنيەت جانە ونەر ورتالىعىندا وتكەن تاعىلىمدى ءىس-شاراعا استانا قالاسىنان «قازاق گازەتتەرى» باس ديرەكتورىنىڭ ورىنباسارى قامبار احمەتوۆ كەلگەن-ءدى. استانالىق مەيماندى باتىس قازاقستان وبلىسىنىڭ اكىمى ناريمان تورەعاليەۆ ارنايى قابىلداپ, قۇرمەت كورسەتتى. ءوڭىر باسشىسى وبلىستا اتقارىلىپ جاتقان جۇمىستار, مەملەكەتتىك باعدارلامالاردىڭ ورىندالۋى, سونىڭ ىشىندە اقجايىق وڭىرىندە قولعا الىنعان ەرەكشە جوبا – «قالادان اۋىلعا» باعدارلاماسى تۋرالى كەڭىرەك ايتىپ بەردى. قامبار احمەتوۆ ناريمان تورەعالي ۇلىنا «قازاق گازەتتەرى» باس ديرەكتورى ديحان قامزابەك ۇلىنىڭ العىسحاتىن تابىس ەتتى. وسىنداي ماراپاتقا بقو قوعامدىق دامۋ باسقارماسى باسشىسى دارحان قادىراليەۆ تە يە بولدى.
«جارق ەتىپ سونگەن ءبىر جۇلدىز» جوباسى اياسىندا وتكەن تەمىر قۇسايىندى ەسكە الۋ كەشىنە مارقۇمنىڭ ارىپتەستەرى, وقىرماندارى, تۋعان-تۋىستارى جينالدى. كەشتە «قازاق گازەتتەرى» باس ديرەكتورىنىڭ ورىنباسارى قامبار احمەتوۆ ءcوز سويلەپ, وتىز جىلىن باس باسىلىمعا ارناعان تەمىر قۇسايىن تۋرالى تەبىرەنە تولعادى. تەمىر ناعىم ۇلىنىڭ «اقپارات سالاسىنىڭ ۇزدىگى» توسبەلىگىسىن ونىڭ ۇلى قۋانىشتىڭ قولىنا تابىس ەتتى.
وسى ءىس-شارا قارساڭىندا «ەگەمەننىڭ» تەمىرى» اتتى كىتاپ جارىققا شىققان بولاتىن. بۇل جيناقتا تانىمال قالامگەرلەر ماقسوت ءىزىم ۇلى, ماقسات ءتاجىمۇرات, ەرتاي اشىقباەۆ, جانبولات اۋپباەۆ, ەسەنجول قىستاۋباەۆ, داريعا مۇشتانوۆا, عايساعالي سەيتاق, ميرا شۇيىنشاليەۆا, ت.ب. سىندى ارىپتەستەرىنىڭ تەمىر ناعىم ۇلى جايىندا اسەرلى ەستەلىكتەرى توپتاستىرىلعان. كىتاپتىڭ تۇساۋىن كەسۋ ءراسىمى «پاراسات» وردەنىنىڭ يەگەرى, جازۋشىلار وداعىنىڭ مۇشەسى, حالىقارالىق «الاش» ادەبي سىيلىعىنىڭ لاۋرەاتى, قوعام قايراتكەرى, اقىن, جازۋشى داريعا مۇشتانوۆا مەن جازۋشىلار جانە جۋرناليستەر وداعىنىڭ مۇشەسى, ت.ايبەرگەنوۆ اتىنداعى سىيلىقتىڭ جانە حالىقارالىق «الاش» ادەبي سىيلىعىنىڭ لاۋرەاتى, اقىن عايساعالي سەيتاققا تاپسىرىلدى. داريعا عازەزقىزىنىڭ شىنايى ەستەلىگى جينالعان جۇرتتى تەبىرەنتتى. بۇدان كەيىن ساحناعا ەڭبەك ارداگەرى, مۇستاحيم ىقسانوۆ اتىنداعى قوعامدىق قوردىڭ توراعاسى اسقار اتاەۆ, جۋرناليستەر وداعىنىڭ مۇشەسى, فوتوگراف رافحات حالەلوۆ جانە باسقالارى شىعىپ, اسەرلى اڭگىمەلەرىن ورتاعا سالدى. مارقۇمنىڭ باۋىرى ميرلان قۇسايىنوۆ پەن ۇلى قۋانىش تەمىر ۇلى دا وسىنداي عيبراتتى كەشتى ۇيىمداستىرۋشىلارعا العىسىن ايتتى.
وسى كەشتە قازتالوۆ اۋداندىق ىشكى ساياسات ءبولىمىنىڭ باسشىسى ايدانا مۇحامبەتوۆا مەن «اۋىل ايناسى» گازەتىنىڭ ءتىلشىسى قىدىر ابراحمانوۆ تەمىر اعامىز دۇنيەگە كەلگەن جەردىڭ ىستىق ىقىلاسىن ءبىلدىرىپ, «ەگەمەننىڭ» تەمىرى» كىتابىن قازتالوۆ اۋدانىندا دا تانىستىرۋعا شاقىردى.
ەستەلىك پەن سىرعا تولى كەشتە حالىقارالىق, رەسپۋبليكالىق كونكۋرستاردىڭ لاۋرەاتتارى, مادەنيەت سالاسىنىڭ ۇزدىگى اسلانبەك قۋاناليەۆ, باتىس قازاقستان وبلىسىنىڭ ۇزدىك مادەنيەت قىزمەتكەرى, رەسپۋبليكالىق كونكۋرستاردىڭ لاۋرەاتى نۇرشات يسلامعاليەۆ, رەسپۋبليكالىق بايقاۋلاردىڭ جەڭىمپاز-جۇلدەگەرلەرى التىنبەك بازاروۆ, رۋستام حافيزوۆتەر ونەر كورسەتتى.
ارىپتەسىمىز تەمىر ناعىم ۇلىن ەسكە الۋ كەشىن ۇيىمداستىرۋعا, ەستەلىك كىتاپتىڭ جارىق كورۋىنە قولداۋ بىلدىرگەن وبلىستىق قوعامدىق دامۋ باسقارماسىنا, «جايىق پرەسس» مەدياحولدينگىنە, قادىر مىرزا ءالى اتىنداعى مادەنيەت جانە ونەر ورتالىعىنا كوپ راحمەت ايتامىز.
باتىس قازاقستان وبلىسى
