وسكەلەڭ ۇرپاق ۇلى جەڭىس قاھارماندارى جايلى ءتول اقپارات كوزدەرىنەن سۋسىنداۋى كەرەك

ۇلى جەڭىس قاھارماندارى جايلى ءتول اقپارات كوزدەرىنەن سۋسىنداۋى كەرەك, دەيدى ب.بايبەك كەشە ۇلى جەڭىستىڭ 70 جىلدىعىنا وراي ەلوردامىزدا وتكەن «قازاقستاندىقتار – كەڭەس وداعىنىڭ باتىرلارى» اتتى بەينەانتولوگيانىڭ تۇساۋكەسەرىندە «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك وسىلاي دەدى. «ەلباسىنىڭ ارداگەرلەردى ارداقتاۋ جونىندەگى تاپسىرماسىن ورىنداپ, «نۇر وتان» پارتياسى وسى باعىتتا بىرقاتار ىستەردى قولعا الدى. سونىڭ ىشىندە, وتانداس قاھارماندارىمىز – 580 كەڭەس وداعى باتىرلارى تۋرالى مالىمەتتەردى جيناي كەلە, جەكە بەينە­انتولوگيا ەتىپ شىعارىپ وتىرمىز. بۇل قاتاردا باتىر اتا-اپالارىمىزدىڭ ەرلىگىن پاش ەتۋگە ارنالعان Kaharman.kz سايتىن اشقانىمىزدى دا ايتا كەتكەن ءجون», – دەدى ول. «رەسەيدىڭ وزىندە وسىنداي 36 ينتەرنەت-رەسۋرس بار. ال بۇل – ۇلكەن رۋحاني كۇش. سوندىقتان دا ءبىز جاس­تاردى وتانشىلدىققا تاربيەلەۋ ءۇشىن ەلىم دەپ وتكەن ەرلەردى تۋ ەتىپ كوتەرۋدەمىز. كەيىنگى وسكەلەڭ ۇرپاق ولار جايلى دەرەك ىزدەگەندە, مىنە, وسىناۋ اقپارات كوزدەرىنەن سۋسىنداۋى كەرەك», –  دەپ ويىن جالعادى ب.بايبەك. سونداي-اق, ول ەلباسىنىڭ تىكەلەي ەكپىن بەرۋىمەن جەكەلەگەن ارداگەرلەرگە كوممۋنالدىق كومەك كورسەتۋدەن باستاپ, دەنساۋلىعىن دۇرىستاۋ ءۇشىن ەمدەۋ ورتالىقتارى مەن ساناتوريلەرگە جولداماعا دەيىن تاپسىرىلعانىن, تىپتەن, باسپانا ماسەلەسى بارلارىنا جالپى ەل اۋماعىندا 90 پاتەردىڭ بەرىلگەنىن ايتتى. «جالپى, جاس ۇرپاق تىل ەڭبەك­كەر­لەرى مەن سوعىس ارداگەرلەرىنىڭ جان­كيارلىق ەرلىگىن ءبىلىپ قانا قويماي, جىلدان-جىلعا ازايىپ بارا جاتقان قاۋىمعا قولداۋ دا كورسەتۋى كەرەك. وسىنداي قامقورلىق ماقساتىندا پارتيا تاراپىنان جەر-جەرلەردە 850 ەرىكتىلەر توبى بەكىتىلدى. ءبىز ول كىسىلەر ءۇشىن نەندەي كومەك جاساساق تا كوپتىك ەتپەيدى», –  دەپ اتاپ ءوتتى ساياساتكەر. ايتا كەتەيىك, بۇل انتولوگيانى  «ار­دا­گەرلەردى ارداقتايىق» جوباسى شەڭ­بەرىندە ەۋرازيالىق توپپەن  (ERG) بىرگە, قازاقستان رەسپۋبليكاسى كينوفوتوقۇجاتتار مەن دىبىس جازبالارى ورتالىق مەملەكەتتىك مۇراعاتىنىڭ قاتىسۋىمەن «نۇر وتان» پارتياسى جاساپ شىعاردى. جوبانىڭ ماقساتى – ۇلى وتان سوعىسى جىلدارىنداعى قازاقستاندىق قاھارمانداردىڭ ەرلىگىن ماڭگى ەستە قالدىرۋ, سونداي-اق,  الەمنىڭ بەيبىت كەلەشەگى ءۇشىن قوسقان ولشەۋسىز ۇلەسىن جاس بۋىنعا ۇلگى ەتىپ كورسەتۋ. ءفيلمنىڭ تۇساۋكەسەرىنە پارلا­مەنت دەپۋتاتتارى, عىلىمي جانە شى­عارماشىل زيالى قاۋىم وكىلدەرى,  جاس­تار ۇيىمدارىنىڭ كوشباسشىلارى, «جاس ۇلان» مەن «جاس قىران» بالالار-جاسوسپىرىمدەر ۇيىمدارىنىڭ وكىلدەرى, گەنەرال س.نۇرماعامبەتوۆ اتىنداعى  «جاس ۇلان» رەسپۋبليكالىق مەكتەبىنىڭ كۋرسانتتارى قاتىستى. «ەگەمەن-اقپارات».