فوتو: شقو اكىمدىگى
شقو اكىمدىگىنىڭ حابارلاۋىنشا, قازىرگى تاڭدا قىزمەت اتقارىپ تۇرعان ريددەر قالالىق اۋرۋحاناسى – ەلدى مەكەندەگى بىردەن-ءبىر كوپسالالى مەديتسينالىق مەكەمە. ول تەك قالا تۇرعىندارىنا عانا ەمەس, سونىمەن قاتار پوپەرەچنوە, پريگورودنوە, كونوۆالوۆكا, ليۆينو, ۋلباستروي جانە لەسحوز اۋىلدىق وكرۋگتەرىنىڭ حالقىنا دا مەديتسينالىق كومەك كورسەتىپ كەلەدى. الايدا, بۇل مەكەمەنىڭ نەگىزگى عيماراتى مەن پەدياتريالىق بولىمشەسى وتكەن عاسىردىڭ 30–50-جىلدارى سالىنعان جانە قازىرگى زامانعى ستاندارتتارعا مۇلدەم ساي كەلمەيدى.
ءوڭىردىڭ مونوقالا مارتەبەسى, دەموگرافيالىق جۇكتەمەنىڭ جوعارى بولۋى جانە جۇرەك-قان تامىرلارى اۋرۋلارىنىڭ كەڭ تارالۋى جاڭا اۋرۋحانا قاجەتتىلىگىن وزەكتى ەتكەن. 2017 جىلى تۇرعىنداردان تۇسكەن وتىنىشتەر مەن ءتيىستى ورگانداردىڭ تالداۋى نەگىزىندە جاڭا مەديتسينالىق كەشەن سالۋ تۋرالى شەشىم قابىلدانعان.
«جوبادا 200 ورىندىق ستاتسيونار مەن اۋىسىمىنا 500 ادام قابىلدايتىن ەمحاناسى بار زاماناۋي مەديتسينالىق ينفراقۇرىلىمدى قۇرۋ كوزدەلگەن. جوبانى ىسكە اسىرۋ 2021 جىلعى جەلتوقساندا باستالدى. قۇرىلىس جۇمىستارىنىڭ جالپى قۇنى – 34,8 ملرد تەڭگە, ونىڭ ىشىندە 11,8 ملرد تەڭگە زاماناۋي مەديتسينالىق جابدىقتارمەن قامتاماسىز ەتۋگە باعىتتالعان. 2024 جىلى جوباعا ارنايى مەملەكەتتىك قوردان قوسىمشا 28,1 ملرد تەڭگە ءبولىندى», دەلىنگەن حابارلامادا.
كەشەننىڭ جالپى اۋماعى 40 مىڭ شارشى مەتردى قۇرايتىن ءۇش نەگىزگى عيماراتتى قامتيدى. قازىرگى تاڭدا قۇرىلىس جۇمىستارىنىڭ ورىندالۋ دەڭگەيى تومەندەگىدەي:
- ەمحانا – 85% (قالقا مەن قاسبەتى اياقتالعان, ىشكى ارلەۋ جۇمىستارى, سانيتارلىق-تەحنيكالىق جابدىقتاردى ورناتۋ, كىرەبەرىس ايماعىن اباتتاندىرۋ اياقتالۋعا جاقىن);
- ستاتسيونار – 40% (ب بلوگى – 3 قابات – تولىق اياقتالعان, ا بلوگىندا (5 قابات) – جۇمىستاردىڭ 60%-ى ورىندالدى; ءمونوليتتى جۇمىستار, سىرتقى قابىرعالاردى قالاۋ, ىشكى قابىرعالاردى ورناتۋ, ارلەۋ جانە قاسبەتتىك جۇمىستار جالعاسۋدا);
- تاماقتانۋ بلوگىنىڭ دايىندىق دەڭگەيى – 92%.
قۇرىلىس جۇمىستارىنا 258 مامان تارتىلعان. بارلىق جۇمىستاردى اياقتاپ, نىساندى پايدالانۋعا بەرۋ 2025 جىلدىڭ جەلتوقسان ايىنا جوسپارلانعان.
«ريددەر قالاسىنداعى جاڭا كوپسالالى اۋرۋحانا كەشەنىنىڭ سالىنۋى – دەنساۋلىق ساقتاۋ جۇيەسىندەگى وزەكتى سىن-قاتەرلەرگە جاۋاپ قانا ەمەس, سونىمەن قاتار ءوڭىردىڭ الەۋمەتتىك ينفراقۇرىلىمىن جۇيەلى جاڭعىرتۋعا باعىتتالعان ماڭىزدى قادام بولىپ تابىلادى. بۇل جوبا مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋعا, سونداي-اق شىعىس قازاقستان وبلىسىندا دەنساۋلىق ساقتاۋ سالاسىن ۇزاق مەرزىمدى تۇراقتى دامىتۋعا سەپتىگىن تيگىزەدى», دەلىنگەن حابارلامادا.
