فوتو: ەرلان ومار
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, سول كەزەڭدە رەسپۋبليكالىق بيۋدجەت ەسەبىنەن بالا تۋعاندا بەرىلەتىن بىرجولعى جاردەماقىنى 145 مىڭ ادام العان. وسى ماقساتقا 26,2 ملرد تەڭگە باعىتتالدى. ال مامىر ايىندا بۇل كومەكتى 28 مىڭ ازامات الىپ, تولەم كولەمى 5,1 ملرد تەڭگەنى قۇراعان. بۇل جاردەماقىنى تۋعان, اسىراپ العان نەمەسە قامقورشى رەتىندە بالا تاربيەلەپ وتىرعان قازاقستان ازاماتتارى, قانداستار جانە ەلدە تۇراقتى تۇراتىن شەتەلدىكتەر الا الادى.
«بالاعا كۇتىم جاسايتىن ادام مىندەتتى الەۋمەتتىك ساقتاندىرۋ جۇيەسىنە قاتىسۋشى بولىپ تابىلماعان جاعدايدا تۋعان, اسىراپ العان, سونداي-اق قورعانشىلىققا العان بالالارى بار, ەگەر ولار باسقا اتا-انانىڭ وتباسىندا ەسكەرىلمەسە, وگەي بالالارى بار ادامداردىڭ (وتباسىلاردىڭ) بالا كۇتىمىنە بايلانىستى جاردەماقى الۋعا قۇقىعى بار. ەسەپتى كەزەڭدە 1,5 جاسقا تولعانعا دەيىن بالا كۇتىمى بويىنشا جاردەماقىمەن 18 ملرد تەڭگە سوماسىندا ورتا ەسەپپەن 123,6 مىڭ ادام قامتىلدى, ونىڭ ىشىندە مامىر ايىندا 3,6 ملرد تەڭگە سوماسىن 124,9 مىڭ ادام الدى», دەلىنگەن حابارلامادا.
ايتا كەتەيىك, مەملەكەتتىك جاردەماقى مولشەرى جىل سايىن ايلىق ەسەپتىك كورسەتكىشكە (اەك) نەگىزدەلىپ ەسەپتەلەدى. 2025 جىلدان باستاپ بارلىق جاردەماقى كولەمى 6,5%-عا يندەكستەلگەن.
بيىلعى بالا تۋىنا بايلانىستى بىرجولعى جاردەماقى مولشەرى:
- 1, 2, 3-بالا ءۇشىن – 38 اەك نەمەسە 149 416 تەڭگە;
- 4 جانە ودان دا كوپ بالا ءۇشىن – 63 اەك نەمەسە 247 716 تەڭگە.
ال بالا 1,5 جاسقا تولعانعا دەيىن اي سايىن تولەنەتىن كۇتىم جاردەماقىسى:
- 1-بالاعا – 22 648 تەڭگە;
- 2-بالاعا – 26 777 تەڭگە;
- 3-بالاعا – 30 866 تەڭگە;
- 4 جانە ودان كەيىنگى بالالارعا – 34 995 تەڭگە.
سونىمەن قاتار, جۇمىس ىستەيتىن ايەلدەرگە جۇكتىلىك, بوسانۋ نەمەسە بالا اسىراپ الۋعا بايلانىستى تابىسىنان ايىرىلعان جاعدايدا مەملەكەتتىك الەۋمەتتىك ساقتاندىرۋ قورىنان (ماسق) ارنايى تولەم تاعايىندالادى. بۇل تولەم ەڭبەككە جارامسىزدىق پاراعىندا كورسەتىلگەن بارلىق كۇنگە تولەنەدى جانە مولشەرى سوڭعى 12 ايداعى ورتاشا ايلىق تابىسقا نەگىزدەلىپ ەسەپتەلەدى.
«اتالعان بىرجولعى تولەمدى جىل باسىنان بەرى جالپى سوماسى 144,4 ملرد تەڭگەگە 100,3 مىڭ ادام الدى, ونىڭ ىشىندە مامىر ايىندا 27 ملرد تەڭگە سوماسىنا 22,6 مىڭ ادام الدى. 2025 جىلدىڭ 5 ايىندا تاعايىندالعان تولەمنىڭ ورتاشا مولشەرى 1 590 618 تەڭگەنى قۇرادى», دەلىنگەن حابارلامادا,
سونداي-اق, جۇمىس ىستەيتىن اتا-انالارعا بالاسى 1,5 جاسقا تولعانعا دەيىن كىرىستەن ايىرىلعان جاعدايدا ماسق ارقىلى اي سايىنعى تولەم قاراستىرىلعان. بۇل تولەم بالانىڭ تۋعان كۇنىنەن باستاپ تاعايىندالىپ, سوڭعى 2 جىلداعى ورتاشا ايلىق تابىستىڭ 40%-ىن قۇرايدى. ەگەر ءبىر ۋاقىتتا بىرنەشە بالا دۇنيەگە كەلسە, تولەم ءار بالاعا جەكە ەسەپتەلەدى.
اتالعان تولەم بويىنشا 2025 جىلدىڭ 5 ايىندا 109,7 مىڭ ادامعا 183 ملرد تەڭگە تولەنگەن. ونىڭ ىشىندە مامىر ايىندا 20,9 مىڭ ادامعا 36 ملرد تەڭگە اۋدارىلعان. اي سايىنعى ورتاشا تولەم مولشەرى – 90 817 تەڭگەنى قۇرايدى.
