فوتو: اقوردا
ەرلان قارين وسكەلەڭ ۇرپاقتى قولداۋعا جانە ولاردى جان-جاقتى دامىتۋعا باعىتتالعان جۇيەلى مەملەكەتتىك شارالار تۋرالى مالىمەت بەردى. سونىمەن قاتار بالالاردىڭ قۇقىعىن قورعاۋ پرەزيدەنت قاسىم-جومارت توقاەۆ جۇرگىزىپ وتىرعان ساياساتتىڭ باسىم باعىتىنىڭ ءبىرى ەكەنىن اتاپ ءوتتى.
مەملەكەتتىك كەڭەسشى ءبىر جىل بۇرىن ايەلدەر مەن بالالاردىڭ قۇقىعىن قورعاۋ تۋرالى زاڭ كۇشىنە ەنگەنىنە نازار اۋداردى. ساراپشىلاردىڭ پايىمداۋىنشا, قابىلدانعان زاڭنىڭ جانە مەملەكەت جۇزەگە اسىرىپ جاتقان ناقتى شارالاردىڭ ناتيجەسىندە قازاقستاندا ايەلدەر مەن بالالاردىڭ قۇقىعىن قورعاۋدىڭ وزىق زاڭناماسى مەن پارمەندى جۇيەسى قالىپتاستى.
مىسالى, بيىلعى 5 ايدىڭ قورىتىندىسى بويىنشا كامەلەت جاسقا تولماعاندارعا قارسى جاسالعان جىنىستىق سيپاتتاعى قىلمىس سانى 21,3 پايىزعا, ال پەدوفيليامەن بايلانىستى قىلمىس 40,7 پايىزعا ازايعان.
مەكتەپتەرگە «111» مەملەكەتتىك بايلانىس ورتالىعىنىڭ QR-كودى ورناتىلعاننان كەيىن بالالار اراسىنداعى زورلىق-زومبىلىق, بۋللينگ, كۇردەلى پسيحيكالىق-ەموتسيالىق جاعدايلاردى انىقتاۋ كورسەتكىشى ارتتى. بيىل بەس ايدىڭ ىشىندە 86 مىڭنان اسا بالا اتالعان قىزمەت تۇرىنە جۇگىنگەن. سونىڭ ىشىندە 2 مىڭنان اسا بالا زورلىق-زومبىلىقتان, بۋللينگتەن, سىنىپتاستارىمەن, اتا-اناسىمەن كۇردەلى قارىم-قاتىناستان كۇيزەلىسكە تۇسكەنىن ايتىپ كومەك سۇراعان. بالالاردىڭ وزىنە-ءوزى قول جۇمساماق بولعانى جونىندە 28 وقيعا انىقتالىپ, قاتەردىڭ دەر كەزىندە الدىن العان.
ەرلان قارين يۋنيسەف كەڭسەسىمەن وتە تىعىز ءارى ناتيجەلى ىقپالداستىق قالىپتاسقانىن ايتتى. مەملەكەتتىك كەڭەسشى بالالاردىڭ قۇقىقتارىن قورعاۋعا قاتىستى ەلىمىزدىڭ بىرقاتار جۇيەلى باستامالارىن قولداۋدا يۋنيسەف كەڭسەسىنىڭ ماڭىزدى رولىنە ەرەكشە توقتالدى.
ءوز كەزەگىندە راشەد مۇستافا سارۆار يۋنيسەف-ءتىڭ قازاقستانداعى كەڭەسى اتقارىپ جاتقان جۇمىس تۋرالى ايتىپ, كەلەشەك جۇمىس جوسپارىن, وي-پىكىرلەرىن ءبولىستى.
كەزدەسۋ قورىتىندىسى بويىنشا تاراپتار ءوزارا قارىم-قاتىناستىڭ الداعى باعىتتارىن ايقىنداپ, ۇرپاق مۇددەسى ءۇشىن ارىپتەستىكتى كۇشەيتە تۇسۋگە جانە بىرلەسكەن باستامالاردى جۇزەگە اسىرۋعا دايىن ەكەنىن جەتكىزدى.
