ءداستۇر مەن زاماناۋي ءستيلدى ۇيلەستىرگەن ەرەكشە كەشتە جەرگىلىكتى ديزاينەرلەردىڭ قولىنان شىققان كيىمدەر مەن قولونەر بۇيىمدارى كوپشىلىككە تانىستىرىلدى. كەلۋشىلەر ايناگۇل حالىققىزىنىڭ ەرلەر مەن ايەلدەرگە ارنالعان شاپان, جەيدە, كويلەك, ورامالدارىن, سۆەتلانا دۇيسەنباەۆانىڭ قۇراق سومكەلەرىن, بەلدىكتەرىن, گۇلجان ەسمادياروۆانىڭ ادەمى تاقيالارىن تاماشالاپ, جەڭىلدىكپەن ساتىپ الىپ جاتتى. سونداي-اق گۇلجانار ارىستانوۆا مەن جانارگۇل جاڭگىروۆانىڭ ەرەكشە كەۋدەشەلەرى مەن تاقيالارى, ءلاززات شاعاتايدىڭ ايەلدەرگە ارنالعان جەڭىل شاپاندارى, ليا تولەگەنوۆانىڭ ايەلدەرگە ارنالعان زاماناۋي ەتنوكيىمدەرى كوپشىلىكتىڭ نازارىن اۋداردى. ءمولدىر ەلەۋسىنوۆا ۇسىنعان ايەلدەرگە ارنالعان كويلەك, بەلدەمشە, جەيدەلەر دە كوزدىڭ جاۋىن الدى. ءسان كورسەتىلىمىن ۇيىمداستىرعان «Nomadica» جوبالار اگەنتتىگى بۇل كەشكە ەرەكشە دايىندالعان ەكەن. جاڭا كيىمدەردى كوپشىلىككە كورسەتكەن قىز-جىگىتتەر – جەرگىلىكتى ديزاينەر لۋنارا يلحامقىزىنىڭ «Li_fashion_models» مەكتەبىنىڭ مودەلدەرى دە ساحنالىق شەبەرلىگىمەن كوزگە ءتۇستى.
ەرەكشە اتاپ وتەر جايت – كەشتە ۇسىنىلعان كيىمدەر تابيعي ماقتا, زىعىر, كيىز, جىبەك, ۆيسكوزا, ۆەليۋر ماتالارىنان تىگىلگەن ەكەن. «كيىم ۇلگىلەرىندەگى ويۋ-ورنەكتەر كيىمگە سالىناتىن ويۋلاردىڭ ەرەجەسىن ساقتاي وتىرىپ باسىلعان» دەيدى ۇلگى يەلەرى. كيىم ءپىشىنى – qasual style-داعى ماۋسىمنىڭ كەز كەلگەن ۋاقىتىندا كۇندەلىكتى كيىپ جۇرۋگە بولاتىن, مىندەتتى تۇردە قازاقى تابيعات ساقتالعان, زامانۋي ۇلگىمەن ۇيلەسىمدى تابيعي تۇستەردەن دايىندالعان.
ءبىر قىزىعى, كەشتە كيىم شەبەرلەرىنىڭ بىرلەسكەن تۋىندىلارى ءسان الەمىندەگى شىعارماشىلىق ىنتىماقتاستىقتىڭ ۇلگىسىن كورسەتتى. مىسالى, گۇلجانار مەن جانارگۇل ۇسىنعان ۇلتتىق ستيلدەگى كەۋدەشەلەر, ءمولدىر تىككەن كويلەكتەگى سۆەتلانانىڭ قولىنان شىققان قۇراق قالتا, ايناگۇلدىڭ شاپانىنا جاراسا قالعان گۇلجاننىڭ كيىز تاقياسى – ءبارى-ءبارى دوستىق پەن جاراسىمدىلىقتىڭ ءرامىزى ىسپەتتى بولدى.
– ءسان – تەك سىرت كەلبەت ەمەس. ول – تاريح, ول – مادەنيەت, ول – بولاشاققا جازىلعان ۇندەۋ. بۇگىنگى كەشتە سانگەرلەرىمىز بابالار مۇراسىن جاڭا بوياۋمەن سويلەتتى. ءبىز ولارعا العىس ايتامىز! ۇلتتىق ءستيلدى ناسيحاتتايتىن ءسان الەمى دامي بەرسىن, – دەيدى «Nomadica» جوبالار اگەنتتىگىنىڭ جەتەكشىcى الفيا شاماەۆا.
باتىس قازاقستان وبلىسى
