سۋرەت: buqara.kz
ءىس-شارانىڭ اشىلۋ سالتاناتى ءى.جانسۇگىروۆ اتىنداعى مادەنيەت سارا-يىندا ءوتتى. جوبا اياسىندا حالقىمىزدىڭ داڭقتى ۇلى قاجىمۇقان مۇڭايتپاس ۇلىنىڭ ءومىر جولى مەن جارقىن جەتىستىكتەرى كوركەم بەينەلەنگەن «قاجىمۇقان» ءفيلمى ۇسىنىلدى. فيلم مادەنيەت جانە اقپارات مينيسترلىگى مەن ۇلتتىق كينونى قولداۋ ورتالىعىنىڭ قولداۋىمەن تۇسىرىلگەن.
كينو كۇندەرى اياسىندا ءارتۇرلى جانرداعى فيلمدەر كورسەتىلەدى. كورنەكتى تۇلعالاردىڭ ءجۇرىپ وتكەن جولىن بەينەلەيتىن «جامبىل. جاڭا ءداۋىر», «دوس-مۇقاسان» فيلمدەرى, وتانعا دەگەن سۇيىسپەنشىلىك پەن اسكەري قىزمەتكەرلەردىڭ ءومىرىن باياندايتىن «نابات وپەراتسياسى», «پاتريوتتار ۋاقىتى» تۋىندىلارى كورەرمەنگە جول تارتادى. سونىمەن قاتار ءداستۇر مەن ۇلت بولمىسىن اشىپ كورسەتەتىن «باۋىرىنا سالۋ» ءفيلمى دە ۇسىنىلادى.
ايتا كەتەيىك, جوبانىڭ ماقساتى – وتاندىق تۋىندىلاردى كەڭىنەن تانىستىرىپ, اۋىل-ايماق تۇرعىندارىنا ۇلتتىق كينونىڭ جاڭارعان كەلبەتىن كورسەتۋ. بۇعان دەيىن مۇنداي كورسەتىلىمدەر قاراعاندى, جامبىل, سولتۇستىك جانە باتىس قازاقستان وبلىستارىندا وتكەن بولاتىن.
