قازاقستاندىق عارىشكەر قىركۇيەكتە عارىشقا ۇشاتىن بولدى

استانا. 22 ماۋسىم. عارىشكەرلەردى دايارلاۋ ورتالىعىنىڭ ۆەدومستۆوارالىق كوميسسياسى قازاقستاندىق عارىشكەر ايدىن ايىمبەتوۆتى بريتاندىق ءانشى سارا برايتماننىڭ ورنىنا حالىقارالىق عارىش ستانساسىنا ۇشۋعا قاتىسۋشى رەتىندە بەكىتتى. بۇل تۋرالى «قازاقپارات» حابارلادى. «ۆەدومستۆوارالىق كوميسسيانىڭ شەشىمىمەن ايىمبەتوۆ حعس-ىنا قىسقا مەرزىمدىك ەكسپەديتسياسىنىڭ قۇرامىنا ەنگىزىلدى. ونىڭ دۋبلەرى بولىپ رەسەيلىك عارىشكەر سەرگەي پروكوپەۆ تاعايىندالدى», – دەدى اتالعان اگەنتتىكتىڭ وكىلى جۋرناليستكە بەرگەن سۇحباتىندا. عارىشقا ۇشۋعا ۇمىتكەر بولعان رەسەيلىك بيزنەسمەن فەدور گالچەۆ, اڭگىمەلەسۋشىنىڭ ناقتىلاۋىنشا, عارىشقا ۇشۋ يدەياسىنان باس تارتقان جوق. بىراق ازىرگە وسىنداي ساپارعا شىعۋعا جەتكىلىكتى تۇردە دايىن ەمەس ەكەنىن ءتۇسىنىپ وتىر. بۇعان دەيىن روسعارىش باسشىسى يگور كوماروۆ تاسس اگەنتتىگىنە حعس-نا ۇشۋدان باس تارتقان برايتماننىڭ ورنىنا ۇشاتىن ادام تاياۋ ۋاقىتتا انىقتالاتىنىن حابارلاعان ەدى. ايىمبەتوۆ پەن گالچەۆتان باسقا, "سويۋز تما-18م" كەمەسىندە بريتاندىق ءانشىنىڭ ورنىنا ۇشۋ تاجىريبەسى بولماعان پروكوپەۆ ۇمىتكەر بولعان. "سويۋز تما-18م" عارىش كەمەسىنىڭ بايقوڭىر (قازاقستان) عارىش ايلاعىنان ۇشۋى 1 قىركۇيەككە جوسپارلانعان. ايىمبەتوۆپەن ءبىر ەكيپاجدا وربيتاعا رەسەيلىك عارىشكەر سەرگەي ۆولكوۆ پەن ەۋروپالىق استروناۆت اندرەاس موگەنسەن ۇشادى. ايتا كەتەيىك, ايدىن اقان ۇلى ايىمبەتوۆ 1972 جىلعى 27 شىلدەدە الماتى وبلىسىنىڭ تالدىقورعان قالاسىندا تۋعان. 1993 جىلى ارماۆيردەگى جوعارعى اسكەري اۆياتسيالىق ۋچيليششەنى "جويۋشى-ۇشقىش" ماماندىعى بويىنشا بىتىرگەن. قازاقستان رەسپۋبليكاسى اسكەري-اۋە قىزمەتىنىڭ پولكوۆنيگى (2014 جىلدان). 2002 جىلى رەسەي-قازاقستان مەملەكەتارالىق بىرلەسكەن عارىشقا ۇشۋ كەلىسىمى اياسىندا ماسكەۋ قالاسىندا مەديتسينالىق كوميسسيادان ءوتتى. 12.10.2012 جىلعى قازاقستان رەسپۋبليكاسى ۇكىمەتىنىڭ №1304 قاۋلىسى نەگىزىندە قازاقستان رەسپۋبليكاسىنىڭ عارىشكەرى دارەجەسى بەرىلدى. تالعات رايىمبەك. دەرەك, سۋرەت: «قازاقپارات».