ىشكى سۇرانىستى تولىق وتەيتىن زاۋىت

قازىرگى ۋاقىتتا ينۆەستيتسيا بو­يىنشا كەلىسىم جاسالىپ, بولىنگەن جەر ۋچاسكەلەرىن قۇرىلىس-مونتاج جۇمىستارىنا دايىنداۋ بەلسەندى جۇرگىزىلۋدە. يندۋستريالىق ايماققا تەمىرجول, ەلەكتر جەلىلەرى جانە تابيعي گاز سىندى قاجەتتى ينفراقۇرىلىم تارتىلعان.

قۇرىلىس كەزەڭىندە 1,5 مىڭ ۋاقىت­شا جۇمىس ورنى اشىلىپ, زاۋىت ىسكە قوسىلعاننان كەيىن 2,5 مىڭنان استام ادام تۇراقتى جۇمىسپەن قامتىلماق. ينۆەس­تور كومپانيا جۇمىس كۇشى­نىڭ كەمىندە 90%-ىن جەرگىلىكتى تۇرعىن­داردان الۋدى كوزدەپ وتىر.

جوبانى جۇزەگە اسىرۋ ەكى كەزەڭ­گە:  2025 جىلدان 2029 جىلعا دەيىن جوسپارلانعان. زاۋىتتى پايدالانۋعا بەرۋ 2027 جىلعا بەلگىلەنسە, ودان كەيىنگى ەكى جىل ىشىندە وندىرىستىك قۋات­تى كەڭەيتۋ جۇمىستارى جۇرگىزىلەدى. جالپى ينۆەستيتسيا كولەمى – 756 ملن دوللار. جاڭا كاسىپورىن تەمىر كەنىن زاماناۋي سۋتەكتى تەحنولوگيامەن وڭ­دەپ, جىلىنا 3 ملن تونناعا دەيىن ءونىم شىعارۋعا قاۋقارلى بولادى.

بۇل ەلىمىزدەگى سۋتەك نەگىزىندەگى شاحتا پەشىن پايدالاناتىن العاشقى مەتاللۋرگيالىق كەشەن بولماق. جوبا سالانىڭ «جاسىل» ترانسفورماتسياسى تالاپتارىنا تولىق ساي كەلەدى.

«Fujian Hengwang Investment Co., Ltd» باسقارما توراعاسىنىڭ ورىنباسارى لي چجۋندۋن زاۋىت تولىق قۋاتىنا شىققان سوڭ, ونىڭ ءونىمى ىشكى نارىقتاعى بولات تاپشىلىعىن وتەپ قانا قويماي, ورتالىق ازيا, ۋكراينا مەن ەۋروپا ەلدەرىنە ەكسپورتقا باعىتتالاتىنىن ايتتى.

«قۇرىلىس اياقتالعاننان كەيىن, ءبىزدىڭ ءونىم قازاقستان نارىعىنداعى بولات تاپشىلىعىن تولىقتاي جابا الادى. ىشكى سۇرانىستى قاناعاتتاندىرا وتىرىپ, ءبىز سونىمەن قاتار كورشىلەس ەلدەرگە دە ءونىم جەتكىزۋ ارقىلى قازاقستان ەكونوميكاسىنىڭ جانە ەكسپورتتىق الەۋەتىنىڭ دامۋىنا ۇلەس قوسا الامىز. جوبا ىسكە قوسىلعان سوڭ, ول تەك ءوندىرىس سالاسىنىڭ ەمەس, سونىمەن قاتار لوگيستيكا, كەن يگەرۋ, ءتىپتى تۋريزم مەن قوعامدىق تاماقتانۋ سەكىلدى ىلەسپە سالالاردىڭ دا دامۋىنا سەرپىن بەرەدى», دەپ اتاپ ءوتتى ول.

سونىمەن قاتار جوبانى ىسكە اسىرۋ ءوڭىردىڭ الەۋمەتتىك-ەكونوميكالىق دامۋىنا وڭ اسەرىن تيگىزەدى. قابىلدانعان مىندەتتەمەلەر شەڭبەرىندە Fujian Hengwang شۋ قالاسىندا تۇرعىن ءۇي كەشەندەرىن سالادى, سونداي-اق اۋماقتاردى كوگالداندىرۋ, بالاباق­شالار مەن قالالىق ساياباقتار سالۋدى قوسا العاندا, الەۋمەتتىك باستامالاردى تۇراقتى نەگىزدە قولدايدى.

Fujian Hengwang Investment Co., Ltd. بۇگىندە قحر-داعى ءۇش مەتاللۋرگيالىق كاسىپورىندى باسقاراتىن جانە جىلىنا 23 ملن تونناعا دەيىن بولات ءوندىرىسىنىڭ جالپى كولەمىن باقىلايتىن ونەركاسىپتىك وندىرىستەگى ەڭ ءىرى الەمدىك كوشباسشى بولىپ سانالادى. جوبالارعا ينۆەستيتسيالاردىڭ جالپى كولەمى 6 ملرد دوللاردان اسادى. قازاقستاندا ەنشىلەس قۇرىلىم – اەا قاتىسۋشىسى مارتەبەسىن العان «Yonggang Central Asia Iron and Steel» جشس تىركەلگەن.

ەستەرىڭىزگە سالا كەتەيىك, پرەمەر-مينيستر ولجاس بەكتەنوۆ وسى جىلدىڭ ءساۋىر ايىندا جامبىل وبلىسىنا ساپارى بارىسىندا Jibek Joly اەا اۋماعىندا جاڭا اۋقىمدى ينۆەستيتسيالىق جوبا­لاردىڭ ىسكە اسىرىلۋىمەن تانىستى.