ءوز كەزەگىندە "قازحروم" كومپانياسىنىڭ باسشىلىعى مۇنداي ماسەلە تۋىنداۋىنىڭ سەبەبىن ءتۇسىندىردى. رەسمي مالىمدەمەگە سۇيەنسەك, قالدىقتاردىڭ شەكتى كولەمى 2021 جىلى بەكىتىلگەن. كەيىن ءتيىستى زاڭنامالىق پروتسەدۋرا بولماعاندىقتان, رۇقسات قاعازدى جاڭارتۋدىڭ مۇمكىندىگى دە بولعان جوق. ال ەسكى تالاپ بويىنشا, 2025 جىلدان باستاپ قالدىقتىڭ شەكتى كولەمى وزگەرگەن.
- بۇل نورماتيۆتەر 2025 جىلى اقسۋ قالالىق قازاندىعى قولدانىسقا بەرىلەدى دەگەن ەسەپپەن جاسالدى. الايدا بۇل قازاندىق ءالى دە پايدالانۋعا تاپسىرىلعان جوق. قالا تۇرعىندارىن جىلۋسىز قالدىرماس ءۇشىن فەرروقورىتپا زاۋىتىنىڭ قازاندىعى وسى جىلى دا قايتادان شاعىن شاھاردى جىلۋمەن قامتاماسىز ەتتى. سونىڭ سالدارىنان قالدىق كولەمى باستاپقى ەسەپتەن اسىپ ءتۇستى. زاۋىتتىڭ الدىندا جىلىتۋ ماۋسىمىنان باس تارتىپ, بۇكىل قالانى قىس بويى "قاتىرۋ" نەمەسە بارلىق ەكولوگيالىق تاۋەكەلدەردى موينىنا الۋ تاڭداۋى تۇردى. الەۋمەتتىك جاۋاپكەرشىلىكتى سەزىنە وتىرىپ, جىلۋمەن قامتۋعا بەل بۋدى, - دەپ ءتۇسىندىردى كومپانيا وكىلدەرى.
شىنىمەن, اقسۋ قالاسىندا 11 ملرد تەڭگەدەن استام قارجىعا سالىنعان قازاندىق قولدانىسقا بەرىلەر ءتۇرى جوق. 2017 جىلى قازىعى قاعىلىپ, بۇگىندە قۇرىلىس جۇمىستارى تولىعىمەن اياقتالسا دا ءالى دە "شيكى" تۇستار شىعىپ جاتىر. 2023 جىلى كۇلدى ۇساقتايتىن قۇرالدار جوق ەكەنى انىقتالسا, بىلتىرعى سىناق جۇمىستارى كەزىندە قازاندىق تولىق قۋاتتىلىققا شىعا المايتىنى بايقالدى. بيىل ونى تاعى ءبىر رەت سىناقتان وتكىزۋ جوسپاردا بار.
