ءوندىرىستى ورنالاستىرۋ ءۇشىن ءوڭىردىڭ يندۋستريالىق ايماقتارى مەن ساۋران اۋدانى تاڭدالدى. جاڭا زاۋىت وبلىستىڭ ەڭ زاماناۋي جانە تەحنولوگيالىق كاسىپورىندارىنىڭ ءبىرى بولادى.
ينۆەستور جوباعا شامامەن 290 ميلليون اقش دوللارىن سالۋدى جوسپارلاپ وتىر. كاسىپورىن قۇرۋ 150-گە جۋىق جاڭا جۇمىس ورنىن اشۋعا جانە وڭىرلىك ونەركاسىپتە جاڭا باعىتتاردى دامىتۋعا مۇمكىندىك بەرەدى.
- ءبىز ينۆەستورعا جان-جاقتى قولداۋ كورسەتۋگە دايىنبىز. بۇل جاي عانا جوبا ەمەس, بولاشاققا جاسالعان قادام. تۇركىستان وبلىسى جوعارى تەحنولوگيالىق ءوندىرىستى دامىتۋعا مۇددەلى. مۇنداي زاۋىت ايماق ەكونوميكاسىنا ايتارلىقتاي ۇلەس قوسادى, - دەدى تۇركىستان وبلىسىنىڭ اكىمى نۇرالحان كوشەروۆ.
كومپانيا وكىلدەرىنىڭ ايتۋىنشا, كاسىپورىن ازاماتتىق جانە مامانداندىرىلعان تىكۇشاقتار مەن دروندار شىعارادى. ولاردى لوگيستيكادا, اۋىل شارۋاشىلىعىندا, تۋريزمدە, ينفراقۇرىلىمدى باقىلاۋدا جانە باسقا سالالاردا پايدالانۋ جوسپارلانۋدا.
جوبا شاعىن اۆياتسيانىڭ قارقىندى دامىپ كەلە جاتقان نارىعىنا باعىتتالعان — ۇشۋ اپپاراتتارى 3000 مەتر بيىكتىككە كوتەرىلە الادى. تەحنيكا قالا ىشىندە تاسىمالداۋعا, جۇكتەردى دروندارمەن جەتكىزۋگە, شۇعىل كومەككە, سونداي-اق اۋىل شارۋاشىلىعى مەن ونەركاسىپكە قولدانىلادى.
تۇركىستان وبلىسىنىڭ اۋماعىندا قازىردىڭ وزىندە 15 يندۋستريالىق ايماق, سونداي-اق 4000 گەكتاردى قامتيتىن "TURAN" ارنايى ەكونوميكالىق ايماعى جۇمىس ىستەيدى. ينۆەستورلارعا سالىقتىق جەڭىلدىكتەر بەرىلەدى جانە بارلىق ماسەلەنى تەز شەشۋ ءۇشىن ء"بىر تەرەزە" جۇيەسى جۇمىس ىستەيدى.
سوڭعى ءۇش جىلدا وبلىستا قىتاي كاپيتالىنىڭ قاتىسۋىمەن 110 ميلليون دوللارعا ءتورت جوبا جۇزەگە اسىرىلدى. قازىر ميلليارد دوللاردان اساتىن تاعى جەتى جوبا ىسكە اسىرىلۋدا.
