اق حالاتتىلاردىڭ اينىماس سەرىگىنە اينالىپ, ناۋقاستاردىڭ دەرتىنە داۋا دارىتۋعا اتسالىسىپ جۇرگەن دەنساۋلىق ساقشىسىنىڭ ءبىرى زاۋرەش بەكەنقىزىنىڭ قىزمەتىن اۋدان تۇرعىندارى جوعارى باعالايدى. شىمكەنت مەديتسينالىق ۋچيليششەسىندە ءبىلىم الىپ, ەڭبەك جولىن اۋرۋحانادا باستاعان ول – بۇگىندە تاجىريبەسى مول, بىلىكتى مامان. 1993 جىلدان بەرى, 35 جىلعا جۋىق مەيىربيكەلىك قىزمەتىن ادال اتقارىپ كەلە جاتقان جان تولەبي اۋداندىق ورتالىق اۋرۋحاناسىندا ەمدەلۋشىلەردىڭ العىسىنا بولەنىپ ءجۇر. العاشقى قىزمەتىن اۋرۋحانانىڭ گينەكولوگيا بولىمىندە باستاعان زاۋرەش بەكەنقىزى قازىردە رەابيليتاتسيا بولىمشەدە ەڭبەك ەتەدى.
اۋرۋحانا باسشىسى قارلىعاش وماروۆا مەيىربيكەنىڭ ءار ناۋقاسقا ەرەكشە جاناشىرلىقپەن قاراپ, كاسىبي تۇرعىدا كومەك كورسەتىپ جۇرگەن التىن جۇرەكتى جان ەكەنىن ايتادى.
«قىزىعى مەن قيىندىعى مول ماماندىعىم وزىمە ۇنايدى, تالاي جاقسى ادامدارمەن ارىپتەس بولىپ بىرگە جۇمىس ىستەدىك. ءبىزدىڭ ماماندىقتا ءوز ءىسىڭدى جاقسى كورۋمەن قاتار, ءتوزىمدى بولۋىڭ دا كەرەك. ەڭبەك جولىمدا ءارتۇرلى قىزىق تا, قيىندىق تا كەزدەستى. ناۋقاس جاننىڭ ويىنان شىعۋ وڭاي ەمەس, سوندىقتان ءاربىرىنىڭ كوڭىلىن تابۋعا تىرىسامىز. اۋرۋحاناعا ەرەكشە ءبىر ءۇمىت ارتىپ كەلەتىن جانداردىڭ جانارىنداعى سول ءۇمىت وتىن جانداندىرا تۇسۋگە, سەنىمىن نىعايتۋعا, جىگەرلەندىرۋگە تىرىسامىز. كوپشىلىك اراسىندا اۋرۋحانانىڭ اۋراسى مەن مورالدىق-پسيحولوگيالىق احۋالى اۋىر مەكەمە ەكەنىن ايتۋشىلار دا, جۇمىستارىڭ قيىن دەپ جاناشىرلىق تانىتىپ جاتاتىندار دا از ەمەس. مىنە, وسىنداي تۇسىنىك قالىپتاسپاس ءۇشىن دە ءاربىر ەمدەلۋشىمەن جىلى, دۇرىس قارىم-قاتىناس ورناتا ءبىلۋ ماڭىزدى. كەيدە جانى قينالعان ناۋقاس كوڭىلگە تيەر ءسوز دە ايتىپ قالادى. مۇندايدا كەشىرىممەن قاراپ, ەشتەڭە ايتىلماعانداي مىندەتىمىزدى اتقارا بەرەمىز», دەيدى زاۋرەش بەكەنقىزى.
ءيا, اۋرۋحانا تىرشىلىگىنىڭ وزىندىك ەرەكشەلىگى كوپ. كەيىپكەرىمىز – مەديتسينا قىزمەتكەرى عانا ەمەس, ۇلكەن اۋلەتتىڭ ۇيىتقىسى بولىپ وتىرعان يبالى كەلىن, كوپبالالى انا. كۇللى قازاققا تانىس, اۋدان ماقتانىشى – ونەرباەۆتار اۋلەتى قارا شاڭىراعىنىڭ ءتۇتىنىن تۇتەتىپ, مەدبيكەلىك قىزمەتىمەن قاتار, ۇيدەگى ابىز اقساقال مەن التىن قۇرساق اناعا قاراپ, كۇيەۋى جەڭىس التاي ۇلىمەن بەس ۇل-قىز ءوسىرىپ-تاربيەلەگەن جان. ەلىمىزدەگى بەدەلدى وقۋ ورىندارىندا مەملەكەتتىك گرانتپەن وقىپ, شەتەلدە تاجىريبەدەن وتكەن ۇل-قىزدارى بۇگىندە ەلىمىزدىڭ الدىڭعى قاتارلى جۇمىس ورىندارىندا تابىستى ەڭبەك ەتىپ ءجۇر. جاسى توقسانعا تاياعان ەنەسىنە اياۋلى كەلىن رەتىندە ەرەكشە كۇتىم جاساپ وتىرعان ز.بەكەنقىزى ءوز وتباسى عانا ەمەس, اۋىلداستار مەن اۋىل-ايماقتىڭ دا العىسىنا بولەنگەن جان. مەيىرىمدى مەيىربيكە وتباسىلىق شارۋاشىلىقتا دا بەلسەندى. ۇيدە مال ۇستاپ, باۋ-باقشا سالىپ, جىل سايىن قىسقا كوكونىس پەن جەمىس دايىنداپ, اۋىل تىرشىلىگىنىڭ بار شارۋاسىن تياناقتى اتقارىپ كەلەدى.
تۇركىستان وبلىسى
