وتباسىنىڭ تسيفرلىق كارتاسى مەملەكەتتىك ورگانداردىڭ قولدانىستاعى بارلىق اقپاراتتىق جۇيەلەرىنىڭ دەرەكتەرى نەگىزىندە قالىپتاسادى. قازىر وندا 20 ميلليون ازامات نەمەسە 6,2 ميلليوننان استام وتباسى تۋرالى اقپارات جيناقتالعان. مۇمكىندىگى مول تسيفرلىق كارتانى ەنگىزۋدەگى نەگىزگى ماقسات مەملەكەتتىك قولداۋ جۇيەسى وتانداستاردىڭ بارلىعىنا تەڭدەي قولجەتىمدى بولسا دەگەن ۇسىنىستان تۋعان. وسىعان بايلانىستى وتباسىنىڭ تسيفرلىق كارتاسى الەۋمەتتىك كودەكسكە الەۋمەتتىك ساياساتتىڭ ورتا جانە ۇزاقمەرزىمدى مىندەتتەرى مەن باعىتتارىن ايقىنداۋ قۇرالى رەتىندە بەلگىلەنگەن. سونداي-اق تسيفرلىق كارتا ازاماتتاردىڭ الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋدىڭ قانداي دا ءبىر ءتۇرىن الۋعا قۇقىلى ەكەنىن ەسكەرتىپ وتىراتىن ەلەكتروندىق حابارلاما.
بۇگىندە وتباسىنىڭ تسيفرلىق كارتاسى مەملەكەتتىك قولداۋ شارالارىن الۋعا قۇقىعى بار وتانداستارعا قانداي دا ءبىر ءوتىنىشسىز جاردەماقى مەن الەۋمەتتىك تولەمدەردىڭ 11 ءتۇرىن رەسىمدەۋگە مۇمكىندىك بەرەدى. ولاردىڭ ىشىندە ەڭبەك ەتۋ قابىلەتىنەن ايىرىلعان جاعدايدا الەۋمەتتىك تولەم, جۇمىسىنان ايىرىلعان جاعدايدا الەۋمەتتىك تولەم, اسىراۋشىسىنان ايىرىلۋ بويىنشا الەۋمەتتىك تولەم, بالا تۋ مەن كۇتىمىنە جاردەماقى, مۇگەدەكتىگى بار بالانى تاربيەلەپ وتىرعان اتا-اناسىنا (قامقورشىسىنا) جاردەماقى, مۇگەدەكتىگى بويىنشا جاردەماقى, كوپبالالى وتباسىلارعا بەرىلەتىن جاردەماقى, «التىن القا», «كۇمىس القامەن» ماراپاتتالعان كوپبالالى انالارعا بەرىلەتىن جاردەماقى, اتاۋلى الەۋمەتتىك كومەك, سونداي-اق جەرلەۋگە ارنالعان بىرجولعى تولەم بار.
بۇدان وزگە, تسيفرلىق كارتا ارقىلى زەينەتاقى تولەمدەرىن الۋ مۇمكىندىگى, «قانداس» مارتەبەسى بەرىلگەندە نەمەسە ۇزارتىلعاندا مارتەبەنىڭ اياقتالۋ مەرزىمى, جۇمىسسىز ادامدارعا جۇمىسپەن قامتۋ شارالارى تۋرالى اۆتوماتتى حابارلامالار جولدانادى. مەملەكەتتىك قولداۋ شارالارىن الۋعا قۇقىق بەلگىلەنگەن كەزدە الەۋەتتى الۋشىعا 1414 بىرىڭعاي بايلانىس ورتالىعىنان SMS-حابارلاما جىبەرىلەدى. حابارلاما العان ازامات وعان كەلىسىمى تۋرالى جاۋاپ بەرۋى كەرەك. ءوتىنىشتى رەسىمدەۋ, الەۋمەتتىك جاردەماقى نەمەسە تولەم تاعايىنداۋ اۆتوماتتى رەجىمدە جۇرگىزىلەدى. وسىدان كەيىن قاراجات تولەم الۋشىنىڭ بانك شوتىنا اۋدارىلادى.
