ماڭعىستاۋدا 8 جاسار قىزدى زورلاپ ولتىرگەن پەدوفيلگە ۇكىم شىقتى

اقتاۋ. 4 تامىز. ماڭعىستاۋدا 8 جاسار قىزدى زورلاپ ولتىرگەن پەدوفيلگە ۇكىم شىقتى. بۇل تۋرالى nur.kz سايتىنا سىلتەمە جاساعان egemen.kz ءتىلشىسى حابارلادى. مامىر ايىندا ساي-وتەس اۋىلىندا بولعان جانتۇرشىگەرلىك وقيعانىڭ باستى كەيىپكەرى – 26 جاستاعى پەدوفيل ءومىر بويىنا باس بوستاندىعىنان ايىرىلدى جانە وعان گەنەتيكالىق جانە باسقا دا ساراپتامالار جۇرگىزگەنى ءۇشىن مەملەكەتكە 2 ملن. تەڭگەگە جۋىق قاراجات تولەۋ مىندەتتەلدى. تەرگەۋ بارىسىندا وزگە دە ايعاقتاردان بولەك, گەنەتيكالىق ساراپتاما قورىتىندىسى بويىنشا مايىتتەن تابىلعان بيوماتەريال 26 جاستاعى سوتتالۋشىعا تيەسىلى بولعان جانە قىز ءمايىتىنىڭ قاسىنان تابىلعان ۇيالى تەلەفون دا قوسىمشا ايعاق رەتىندە قاراستىرىلعان. الدىمەن تەلەفوننىڭ وزىنىكى ەكەنىن ايتقان سوتتالۋشى كەيىن ودان باس تارتىپ, تەلەفوندى بۇدان بىرنەشە جىل بۇرىن جوعالتىپ العاندىعىن جەتكىزگەن. قىزدىڭ اناسى ق.ءسالىموۆا وقيعا ورىن العان كۇنى قىزىن ىزدەپ, سوتتالاۋشىنىڭ ۇيىنە بىرنەشە رەت بارعاندىعىن, بىراق ولاردىڭ كورمەدىك دەگەندىگىن, الايدا كۇيەۋىنە «قىزدارمەن بىرگە ويناپ كەتتى» دەپ ەكى ءتۇرلى اقپار ايتقاندىعىن جەتكىزدى. سونداي-اق, تەرگەۋ بارىسىندا پەدوفيل ماقۇلبەكوۆتىڭ وقيعادان سوڭ زاتتارىن ارنايى سومكەگە سالىپ, پوليتسيادان بوي تاسالاپ ساي-وتەستەن كەتىپ قالماق بولعاندىعى دا انىقتالدى. الايدا, اۋىل تۇرعىندارىنىڭ دەر كەزىندە ۇستاپ الۋى ونىڭ بۇل ويىنىڭ جۇزەگە اسۋىنا مۇمكىندىك بەرمەگەن. وسىنىڭ ءبارىن سارالاي كەلە, ماڭعىستاۋ وبلىستىق سوتى 8 جاسار فاريدا ءسالىموۆانى زورلاپ, كەيىن ايۋاندىقپەن ولتىرگەن ماقۇلبەكوۆكە ءومىر بويى باس بوستاندىعىنان ايىرۋ جازاسىن تاعايىندادى. قىلمىسكەر جازانى ەرەكشە رەجىمدەگى كولونيادا وتەيدى. گۇلايىم شىنتەمىرقىزى. دەرەك: egemen.kz. سۋرەت: 24.kz.