الاش ارىسىنىڭ ەسىمىن يەلەنگەن مەكتەپتىڭ 1-6 سىنىپ وقۋشىلارى ەكى ماۋسىمدا ءبىلىم ورداسىنداعى لاگەردە دەمالادى. ولاردىڭ ۋاقىتىن ءتيىمدى ۇيلەستىرۋ ءۇشىن الدىن الا ەڭبەك جانە شىعارماشىلىق بەلسەندىلىك, تۋريستىك جانە تانىمدىق مارشرۋتتار, زياتكەرلىك ءارى ءبىلىم بەرۋ ءىس-شارالارى سىندى باعدارلامالار بەكتىلگەن. مەكتەپ-ليتسەي ديرەكتورى قياقباي نۇريلانىڭ ايتۋىنشا, بارلىق اتا-انا قارجىلىق تۇرعىسىنان بالاسىن تاڭداۋلى لاگەرلەرگە اتتاندىرا المايدى. وسى تۇستان كەلگەندە مەكتەپ جانىنداعى لاگەرلەردىڭ ورنى ەلەۋلى.
ء«بىز لاگەر بارىسىندا بالالاردى شىناي باقىتتى ەتىپ, مەنتالدى ساۋلىعىنا نازار اۋدارۋدامىز. سونداي-اق, شاكىرتتەرىمىزدىڭ الەۋمەتتىك ومىرگە ارالاسا الۋى, ساباقتان تىس دوس تابۋى, جايلى ورتاسىن قالىپتاستىرۋىنا سەپتەسىپ, جۇمىلىپ وتىرمىز. وسى شارالارعا 250 بالا قامتىلادى. مەكتەپ تەك وقۋشىعا ءبىلىم الاتىن ورىن بولۋمەن شەكتەلمەي, ولاردى قوعامعا نىق قادام باستىراتىن مەكەمە بولۋى كەرەك», دەدى ا. بايتۇرسىن ۇلى اتىنداعى №48 مەكتەپ-ليتسەيىنىڭ ديرەكتورى.
جاھاندانۋ كەزەڭىندە جۇتىلماۋدىڭ جولى بۇگىنگى ۇرپاقتى تاريحي تەگىنە ءۇڭىلدىرىپ ءوسىرۋ. اتا-بابا مۇراسىنان قول ۇزدىرمەۋ ۇردىسىندە لاگەردەگى ۇيىرمەلەر وسى ماقساتپەن ۇندەستىرىلگەن. «جاس ۇرپاققا ۇلتتىق قۇندىلىقتى ۇعىندىرماي جالپىادامزاتتىق نەگىزدى ۇعىندىرۋ قاۋىپتى. سوندىقتان مەكتەبىمىزدە ارنايى «تولاعاي» ۇلتتىق سپورت زالىنىڭ ەسىگىن اشتىق. مۇندا وقۋشىلار ساداق اتىپ, سەركە كوتەرىپ, ارقان تارتۋ ءۇشىن قاجەتتى بازا قالىپتاستىرىلعان. ساباق بارىسىندا ۇلتتىق ويىنداردىڭ شىعۋ توركىنى, ەرەجەلەرى تۇسىندىرىلەدى. بۇل قادام ارقىلى شاكىرتتەرىمىزدىڭ شىمىر ءارى رۋحتى بولىپ جەتىلۋىنە جەتە كوڭىل ءبولىپ وتىرمىز», دەدى نۇريلا باقتيارقىزى.
بۇگىن وسى سپورت الاڭىندا اكەلەر مەن بالالار ءتۇرلى سايىستا باق سىنادى. تىرشىلىك تىنىسىمەن اتا-انانىڭ بالاعا ساپالى ۋاقىت ارناۋى كۇردەلەنە تۇسكەن تۇستا اكەلەردىڭ بالا كوڭىلىن باعۋى ماڭىزدى ماسەلە. بۇل تۋرالى شاراعا بەلسەندى قاتىسقان اكە نۇرلىبەك جورابەك ۇلى ءسوز قوزعادى.
«راسىندا ەلىمىزدە اكە مەن بالانىڭ اراقاتىناسى اقساپ تۇر. اكە مەن بالانىڭ جارقىن ۋاقىت وتكىزۋى, فۋتبول ويناۋى, ساداق اتۋى, اتقا شابۋى كەم كورەتىن كورىنىسكە اينالعانى جاسىرىن ەمەس. تاربيەنى مەكتەپكە نەمەسە اناعا عانا ارتىپ قويماي اكەلەر دە ات سالىسۋى ءتيىس. وسى ۇرانمەن ا.بايتۇرسىن ۇلى اتىنداعى №48 مەكتەپ-ليتسەيى ۇيىمداستىرعان ەستافەتاعا كەلىپ وتىرمىز. بۇل سپورتتىق شارادا اكە مەن بالا اراسىندا ءتىل تابىسۋ مەن قولداۋدىڭ قانشالىقتى باعالى ەكەنى ايقىن كورىنىپ وتىر», دەدى نۇرلىبەك جورابەك ۇلى.
لاگەردە بالالار سۋرەت سالىپ, ءتىل ۇيرەنىپ, زەرتتەۋ جۇرگىزۋمەن قاتار ساۋىردە ەگىلگەن مەكتەپتىڭ جىلىجايىن كۇتىپ, باپتايدى. مەكتەپ ۇجىمى كوكونىستەر ءونىمىن از قامتىلعان وتباسىلارعا ۇلەستىرۋدى جوسپارلاپ وتىر. تابيعات قۇشاعىنا ەنىپ, ءونىمنىڭ مول بولۋىنا بەيىل بولىپ جۇرگەندەردىڭ ءبىرى بيىل 4-ءشى سىنىپتى اياقتاعان – مۇحامەدي سۇلتان.
«لاگەردە كوڭىل كوتەرۋ, تانىمدىق ساياحاتپەن قاتار جىلىجاي بولعانى قۋانتادى. مۇندا كوكونىستەردى ءوسىرۋدىڭ ءتۇرلى تاسىلدەرىن مەڭگەرىپ جاتىرمىز. ۇستازدارىمىز سۋ قۇيۋ ۋاقىتىن, ارام شوپتەرىن تازالاۋ, توپىراق قۇنارلىعىن ارتتىرۋ تۋرالى باعىت-باعدار بەرىپ وتىردى. بۇل ۇيرەنگەندەرىمىزدى بولاشاقتا دا كادەگە جاراتا الامىز», دەدى مۇحامەدي سۇلتان.
وقۋ-اعارتۋ مينيسترلىگىنىڭ مالىمەتىنشە, بيىل ەلىمىزدە 10 مىڭنان استام مەكتەپ جانىنداعى لاگەر جۇمىس ىستەپ تۇر. ولاردىڭ تىنىسى بۇگىن ءبىز بەدەرلەگەن لاگەردەگىدەي ورىلسە ۇلتتىق قۇندىلىعىمىز قۇلدىراماسى انىق.
