اقتوبەدە ۇلت جوسپارىنا ارنالعان جيىن ءوتتى

اقتوبە. 4 تامىز. «نۇر وتان» حالىقتىق دەموكراتيالىق پارتياسى اقتوبە وبلىستىق فيليالىنىڭ عيماراتىندا ەلباسىنىڭ «100 ناقتى قادام» ۇلت جوسپارىن جۇزەگە اسىرۋعا باعىتتالعان پارلامەنت سەناتىنىڭ دەپۋتاتى, سوت جۇيەسى جانە قۇقىق قورعاۋ ورگاندارىنىڭ كونستيتۋتسيالىق زاڭناماسى جونىندەگى كوميتەتىنىڭ مۇشەسى بەكتاس بەكنازاروۆتىڭ قاتىسۋىمەن كوشپەلى وتىرىس وتكىزىلدى. بۇل تۋرالى egemen.kz ءتىلشىسى حابارلادى. شاراعا وبلىس اكىمىنىڭ ورىنباسارى عالي ەسقاليەۆ, وبلىستىق ءماسليحاتتىڭ حاتشىسى ءسانيا قالدىعۇلوۆا, وبلىستىق سوتتىڭ توراعاسى ەرلان ايتجانوۆ, سۋديالار, پروكۋراتۋرا مەن ادۆوكاتۋرا قىزمەتكەرلەرى جانە وبلىستىڭ قۇقىق قورعاۋ ورگاندارىنىڭ وكىلدەرى قاتىستى. كوشپەلى وتىرىستى وبلىستىق ءماسليحاتتىڭ حاتشىسى ءسانيا قالدىعۇلوۆا اشىپ, ۇلت جوسپارىنىڭ ماڭىزىنا توقتالدى. جيىندا ءسوز العان پارلامەنت سەناتىنىڭ دەپۋتاتى بەكتاس بەكنازاروۆ مەملەكەت باسشىسىنىڭ ۇلت جوسپارى – «100 ناقتى قادام» بەس ينستيتۋتسيونالدىق رەفورماسىن جۇزەگە اسىرۋ – بۇل جاھاندىق ىشكى سىن-قاتەرلەرگە جاۋاپ جانە جاڭا تاريحي جاعدايلاردا دامىعان 30 مەملەكەتتىڭ قاتارىنا ەنۋ جونىندەگى باياندى باعدارلاما ەكەندىگىن اتاپ ءوتتى. «100 ناقتى قادام» ۇلت جوسپارى قازاقستان مەملەكەتتىلىگىن نىعايتۋعا, تۋرا جولدان تايماۋعا, كۇردەلى كەزەڭنەن سەنىمدى وتۋگە جاعداي تۋعىزاتىن جانە زاڭ ۇستەمدىلىگىن قامتاماسىز ەتەتىن بولادى», – دەي كەلىپ, ول قۇقىق قورعاۋ ورگاندارىن رەفورمالاۋعا بايلانىستى بولاتىن وزگەرىستەر مەن جاڭالىقتاردى قادامدار بويىنشا جىلىكتەپ ءتۇسىندىردى. وبلىستىق سوتتىڭ توراعاسى ەرلان ايتجانوۆ «100 ناقتى قادام» ۇلت جوسپارىن جۇزەگە اسىرۋداعى زاڭ ۇستەمدىگىن قامتاماسىز ەتۋ ماسەلەسى جونىندە باياندادى. سوتتىڭ اشىقتىعى مەن جاريالىلىعىنا قاتىستى اتقارىلعان جۇمىستاردى تىلگە تيەك ەتتى. ونىڭ ايتۋىنشا, وبلىستىق سوت بەينە جانە اۋديو قۇرالدارمەن 70 پايىز قامتاماسىز ەتىلگەن, بۇل ءوز كەزەگىندە سوت جۇمىسىنىڭ جاريالىلىعى مەن اشىقتىعىنا العىشارت جاسايدى. جيىنعا قاتىسۋشىلار پرەزيدەنت ۇسىنعان مەملەكەتتىك قىزمەتتى, سوت جۇيەسىن, قۇقىق قورعاۋ قىزمەتىن رەفورمالاۋ, سىبايلاس جەمقورلىقپەن كۇرەستى كۇشەيتۋ ماسەلەلەرى جانە ولاردى ءتيىمدى تۇردە جۇزەگە اسىرۋ جولدارىن تالقىلادى. ەلباسىنىڭ «100 ناقتى قادام» ۇلت جوسپارىنداعى بەس ينستيتۋتسيونالدىق رەفورمانى جۇزەگە اسىرۋ ەلىمىزدىڭ ءاربىر ازاماتىنا جانە قازاقستاننىڭ ءارى قاراي بولاشاعىنا قاتىستى بولعاندىقتان, بۇل باعىتتا ورتاق ۇسىنىستار ورتاعا سالىندى, ولاردى جۇزەگە اسىرۋدىڭ مەحانيزمدەرى دە اڭگىمە بولدى. سەناتور بەكتاس بەكنازاروۆ وبلىس ورتالىعىندا قوعامدىق قابىلداۋ وتكىزدى. سودان كەيىن العا جانە حرومتاۋ اۋدانىنىڭ اكتيۆىمەن كەزدەسىپ, ەلباسىنىڭ «100 ناقتى قادام» ۇلت جوسپارىن جۇزەگە اسىرۋعا باعىتتالعان تۇسىنىك جۇمىستارىن جۇرگىزدى. ساتىبالدى ءساۋىرباي. دەرەك, سۋرەت: egemen.kz.