مەملەكەتتىك حاتشىنىڭ توراعالىعىمەن رەسپۋبليكالىق كوميسسيا وتىرىسى ءوتتى

استانا. 22 ماۋسىم. قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى. بۇل تۋرالى akorda.kz حابارلادى. كوميسسيا وتىرىسىن اشقان گۇلشارا ابدىقالىقوۆا «بولاشاق» ستيپەندياسىنىڭ ەلدى ينستيتۋتسيونالدىق رەفورمالاۋ ۇدەرىسىندەگى ايرىقشا ءرولىن اتاپ ءوتىپ, بولاشاقتىقتاردىڭ الەۋەتىن «مەملەكەت باسشىسىنىڭ بەس ينستيتۋتسيونالدىق رەفورماسىن ىسكە اسىرۋ بويىنشا 100 ناقتى قادام» ۇلت جوسپارىن ورىنداۋعا بارىنشا پايدالانۋ قاجەتتىگىن ايتتى. ءبىلىم جانە عىلىم ءمينيسترى اسلان ءسارىنجىپوۆ «بولاشاق» حالىقارالىق ستيپەندياسىنىڭ 2016-2020 جىلدارعا ارنالعان دامۋ جوسپارىنىڭ جوباسىن تانىستىردى. كوميسسيا مۇشەلەرى «بولاشاق» باعدارلاماسىنا قاتىستى  Split PhD ىسكە اسىرۋ تۇجىرىمداماسىن ماقۇلدادى. تۇجىرىمداما قازاقستاننىڭ يندۋستريالىق-يننوۆاتسيالىق دامۋ مەملەكەتتىك باعدارلاماسى شەڭبەرىندە ەلدەگى جوعارى وقۋ ورىندارىندا عىلىمي كادرلار دايارلاۋدىڭ جاڭا جۇيەسىن ەنگىزۋدى كوزدەيدى. كوميسسيا وتىرىسىندا الدىن-الا كونكۋرستىق ىرىكتەۋدەن وتكەن ۇمىتكەرلەرگە «بولاشاق» حالىقارالىق ستيپەندياسىن تاعايىنداۋ ماسەلەسى قارالدى. وتىرىس قورىتىندىسى بويىنشا مەملەكەتتىك حاتشى شەتەلدە كادرلار دايارلاۋ جونىندەگى رەسپۋبليكالىق كوميسسيا جۇمىسىن ودان ءارى ۇيىمداستىرۋ اياسىندا بىرقاتار تاپسىرما بەردى. تالعات رايىمبەك. دەرەك: akorda.kz. سۋرەت: bnews.kz.