قالالىق قۇرىلىس باقىلاۋ باسقارماسىنىڭ حابارلاۋىنشا, بۇگىن «تەرەكتى» شاعىناۋدانىنداعى اينالما كوشەسى, 183-ۋچاسكەدە ورنالاسقان زاڭسىز تۇرعىن ءۇي كەشەنىن بۇزۋ جۇمىستارى باستالدى. بۇعان دەيىن بۇل نىسان اقپارات قۇرالدارىندا پاتەر ساتىپ الۋعا ۇسىنىلمايتىن تۇرعىن ۇيلەر تىزىمىنە ەنگىزىلگەن بولاتىن.
انىقتالعانداي, نىساندى سالعان — «Investment Stroy» جشس. جوسپاردان تىس تەكسەرۋ بارىسىندا اتالمىش قۇرىلىس ەشقانداي رۇقساتسىز جۇرگىزىلگەنى بەلگىلى بولعان. وسىعان بايلانىستى مەنشىك يەسىنە اكىمشىلىك شارالار قولدانىلىپ, الماتى قالاسىنىڭ مامانداندىرىلعان اۋدانارالىق ەكونوميكالىق سوتىنا تۇرعىن ءۇي كەشەنىن بۇزۋ جانە قۇرىلىس ورنىن قايتا قالپىنا كەلتىرۋ تۋرالى تالاپ ارىز بەرىلگەن.
"2023 جىلدىڭ 12 شىلدەسىندە سوت تالاپتى تولىق قاناعاتتاندىردى. كەيىن اپەللياتسيالىق شاعىم قارالىپ, الماتى قالالىق سوتى العاشقى شەشىمدى كۇشىندە قالدىردى. قازىر نىساندى بۇزۋ جۇمىستارى سوت ورىنداۋشىلارىنىڭ قاتىسۋىمەن جۇرگىزىلۋدە" دەيدى باسقارماداعىلار.
قالالىق قۇرىلىس باقىلاۋ باسقارماسى الماتى تۇرعىندارى مەن قالا قوناقتارىنا جىلجىمايتىن م ۇلىك ساتىپ الار الدىندا تۇرعىن ءۇي كەشەنىنىڭ بارلىق رۇقسات قۇجاتتارىنىڭ بولۋىن مۇقيات تەكسەرۋگە كەڭەس بەردى. بۇل — قارجىلىق قاۋىپسىزدىك پەن زاڭ الدىنداعى جاۋاپكەرشىلىكتى قامتاماسىز ەتۋدىڭ باستى جولى.
