جول-كولىك وقيعالارىنان اپاتتار جيىلەپ كەتتى. ايعا سالىم ۋاقىت بۇرىن شىمكەنتكە ءبىر اسۋ قالعاندا جولاۋشىلار تيەگەن شاعىن اۆتوبۋس جانارماي بەكەتىنە بۇرىلعان جۇك ماشيناسىنا سوعىسىپ 14 ادام باقيلىق بولعان. وسىنداي وقيعالاردى ەسەپكە الىپ وڭتۇستىك قازاقستان وبلىسىندا رەسپۋبليكالىق «اۆتوبۋس» جەدەل-پروفيلاكتيكالىق ءىس-شاراسى وتكىزىلدى.
«اۆتوبۋس» جەدەل پروفيلاكتيكالىق ءىس-شاراسى بارىسىندا جول-پاترۋلدىك پوليتسيا قىزمەتكەرلەرىمەن جولاۋشى اۆتوبۋس جۇرگىزۋشىلەرىنىڭ تاراپىنان جاسالعان 800-گە جۋىق قۇقىق بۇزۋشىلىق انىقتالدى. ولاردىڭ ىشىندە جولاۋشىلار مەن جۇكتەردى تاسىمالداۋ كۋالىگىنسىز جۇرگەنى ءۇشىن 106, بۇرىلۋ ەرەجەسىن بۇزعان 93, كولىكتى جۇرگىزۋ كەزىندە ۇيالى تەلەفون قولدانعانى بويىنشا 244, جىلدامدىقتى اسىرعانى ءۇشىن 41, قارسى باعىتقا شىققانى بويىنشا 4, جاياۋ جۇرگىنشىگە جول بەرمەگەنى بويىنشا 14, اۆتوبۋستى تەحنيكالىق بايقاۋسىز جانە كولىكتى ساقتاندىرۋ پوليسىنسىز ايداعانى بويىنشا 93, كولىك قۇرالدارىن پايدالانۋ قاعيدالارىن بۇزعانى بويىنشا 23 جانە تاعى باسقا دا اكىمشىلىك قۇقىق بۇزۋشىلىقتار انىقتالىپ, اكىمشىلىك حاتتاما تولتىرىلدى.
سونىمەن قاتار, پوليتسەيلەر ماس نەمەسە ەسىرتكى قولدانعان حالدە اۆتوكولىكتى باسقارعان 3 قۇقىق بۇزۋشىنى انىقتادى. ءتارتىپ ساقشىلارىمەن جولاۋشى تاسىمالى بويىنشا 40-قا جۋىق زاڭ بۇزۋشىلىق تىركەلىپ, 4 اۆتوبۋس پاركىنىڭ لاۋازىمدى تۇلعاسى اكىمشىلىك جاۋاپكەرشىلىككە تارتىلدى. ءىس-شاراعا جەتى جۇزدەن استام ءتارتىپ ساقشىلارى مەن مەديتسينالىق جانە تەحنيكالىق بايقاۋدان وتۋىنە, جولاۋشىلار تاسىمالداۋدىڭ بەلگىلەنگەن نورمالارىن ساقتاۋعا جاۋاپتى ماماندار قاتىستى. بۇل ءبىر مەزەتتىك شارۋا ەمەس, تۇراقتى ءوتىپ تۇراتىن جۇمىس. اللانىڭ اماناتقا بەرگەن جانىن جۇرگىزۋشىلەردىڭ جاۋاپسىزدىعىنان قيىپ جىبەرۋ اۋىر قىلمىس. جەدەل-پروفيلاكتيكالىق ءىس-شارالار وسىنداي اۋىر وقيعالاردىڭ الدىن الادى.
باقتيار تايجان, «ەگەمەن قازاقستان».
وڭتۇستىك قازاقستان وبلىسى.
