استانا. 6 مامىر. بۇگىن تاڭەرتەڭ استاناعا پاۆلودار, جامبىل, قىزىلوردا جانە اقتوبە وبلىستارىنان ۇلى وتان سوعىسىنىڭ ارداگەرلەرىنەن قۇرالعان دەلەگاتسيا كەلدى. بۇل تۋرالى egemen.kz ءتىلشىسى حابارلادى.
بۇدان كەيىن الماتى قالاسىنان, الماتى, اقمولا, اقتوبە, ماڭعىستاۋ جانە باتىس قازاقستان وبلىستارىنان ۇلى وتان سوعىسىنا قاتىسۋشىلار كەلەدى دەپ كۇتىلۋدە.
5 مامىر كۇنى كەشكى اۆيارەيسپەن ەلورداعا كەلگەن العاشقى قوناقتار اتىراۋ وبلىسىنىڭ سوعىس ارداگەرلەرى بولاتىن. ولاردى اسكەري مۋزىكانتتار جانە ارميا گەنەرالى ساعادات نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىنىڭ تاربيەلەنۋشىلەرى سالتاناتتى تۇردە قارسى الدى.
«قانشاما جىلدار وتسە دە ۇلى وتان سوعىسىنا قاتىسۋشىلاردىڭ ەسىندە سۇراپىل سوعىس جىلدارىنىڭ ەستەلىكتەرى ماڭگى قالدى. ءبىز ۇلى جەڭىستىڭ 70 جىلدىعىن مەرەكەلەۋگە كەلدىك. جاستاردىڭ ءجۇز مىڭداعان ادامنىڭ قانىمەن كەلگەن جەڭىستى, بەيبىتشىلىكتى كوزىنىڭ قاراشىعىنداي ساقتاپ, باعالايتىنىن كورۋ ءبىر عانيبەت», دەدى اتىراۋ وبلىسى اۋداندىق ارداگەرلەر كەڭەسىنىڭ توراعاسى وتەپ نۇريەۆ.
اسكەري پارادقا جانە مەرەكەلىك ءىس-شارالارعا قاتىسۋ ءۇشىن ەلىمىزدىڭ 14 وبلىسى مەن الماتى قالاسىنان جالپى سانى 244 ارداگەر, سونداي-اق استانادا تۇراتىن 16 ۇلى وتان سوعىسىنىڭ ارداگەرى شاقىرىلدى.
7 مامىر كۇنى وتەتىن اسكەري پارادتان كەيىن ارداگەرلەر سالتاناتتى قارسى الۋ راسىمىنە, «قازاقستان» ورتالىق كونتسەرت زالى مەن «استانا وپەرا» بالەت تەاترىندا وتەتىن مەرەكەلىك كونتسەرتتەردى تاماشالايدى. سونىمەن بىرگە وتان قورعاۋشىلار مونۋمەنتىنە گۇل شوقتارىن قويىپ, قازاقستان رەسپۋبليكاسى ۇلتتىق مۋزەيى, «بايتەرەك» مونۋمەنتى, «اتامەكەن» قازاقستان كارتاسى» ەتنو-مەموريالدىق كەشەنى, «حازىرەت سۇلتان» مەشىتى مەن باسقا دا كورىكتى جەرلەرى ارالايدى.
سودان كەيىن استانا, الماتى قالالارى مەن قاراعاندى, پاۆلودار, الماتى جانە وڭتۇستىك قازاقستان وبلىستارىنان التى ارداگەر جەڭىستىڭ 70 جىلدىعىنا بايلانىستى مەرەيتويلىق پارادقا قاتىسۋ ءۇشىن رەسەيدىڭ ماسكەۋ قالاسىنا اتتانادى.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
