«BalaTurkvizyon» حالىقارالىق ۇلتتىق ءان بايقاۋىنىڭ كوكشەتاۋداعى 13-ءشى ايماقتىق ىرىكتەۋ تۋرى وتە تارتىستى ءوتتى. بايقاۋعا قالالار مەن ەلدى مەكەندەردەگى بالالاردىڭ ءارتۇرلى شىعارماشىلىق ۇجىمدارى قاتىستى.
– كوكشە مەن ارقا ءوڭىرى قاشاننان ءان مەن جىردىڭ ۇيىپ تۇرعان ولكەسى, – دەدى بىزبەن اڭگىمەسىندە بايقاۋدىڭ تورەشىلەر القاسىنىڭ توراعاسى ءارى پروديۋسەرى كەنتال. – ءاليا نازارباەۆانىڭ «جاندانۋ الەمى» قورى يگى باستاماعا ۇيىتقى بولدى. ماقسات – ءان جانە ساحنا سالاسىنداعى دارىندى بالالاردىڭ جولىن اشىپ, ءبۇلدىرشىن بالالارعا ارنالعان قازاقشا 16 ءاننىڭ تۇساۋىن كەسۋ. بۇل ورايدا مەنىمەن ءبىرگە كوكشەتاۋعا كەلگەن مەدەۋ ارىنباەۆ, كەنجەبەك ءجانابىلوۆ سىندى بەلگىلى ءانشى, سازگەرلەر تالعام بيىگىنەن كورىنگەن تالاپكەرلەرگە قولداۋ كورسەتپەك.
بايقاۋ بارىسىندا ستەپنوگور قالاسىنداعى «Presto» مۋزىكالىق ستۋدياسىنىڭ, اتباسار اۋدانىنداعى «ايدانا» حالىقتىق ءان-بي ءانسامبلىنىڭ ونەرىنە ريزاشىلىق ءبىلدىرىلدى. ايتكەنمەن, جۇلدىزدى تورەشىلەر القاسى شورتاندى اۋدانىنان كەلگەن ون ءۇش جاسار ءانشى ايمان اماننىڭ شىعارماشىلىعىنا جوعارى باعا بەرىپ, بالاۋسا ونەرپازدى رەسپۋبليكالىق بايقاۋدىڭ جارتىلاي فينالىندا باق سىناۋىنا مۇمكىندىك بەردى. ارنايى مۋزىكالىق ءبىلىمى جوق بولسا دا ايمان قىز ءوزىنىڭ بۇلبۇل ۇنىمەن قازاق, ورىس جانە فرانتسۋز تىلدەرىندەگى اندەردى قۇيقىلجىتا شىرقادى. ول ەندى ۇلكەن قالاداعى «جۇلدىزدى ۇيدە» دايىندىق جۇمىستارىنا كىرىسپەك. ال 16-17 قىركۇيەك كۇندەرى كاسىبي تورەشىلەر القاسى مەن تەلەكورەرمەندەر ىستامبۇلداعى ءى حالىقارالىق «BalaTurkvizyon» ءان بايقاۋىنىڭ گراند-فينالىندا ەل نامىسىن قورعايتىن بالاۋسا ونەرپازدىڭ اتىن اتايتىن بولادى. بۇل ورايدا, اقمولالىقتار ايمان امانعا ايرىقشا ءۇمىت ارتادى.
باقبەرگەن امالبەك, «ەگەمەن قازاقستان».
اقمولا وبلىسى.
