قىزىلوردا. 6 مامىر. قىزىلوردادا ىشكى ىستەر ورگاندارىندا ابىرويلى قىزمەت ەتكەن ارداگەرلەرگە, ونىڭ ىشىندە سوعىس ارداگەرلەرىنە ارنالعان ءمارمار تاقتانىڭ سالتاناتتى تۇردە اشىلۋ ءراسىمى ءوتتى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلايدى.
سالتاناتتى راسىمگە ىشكى ىستەر ورگاندارىنىڭ ۇلى وتان سوعىسى ارداگەرلەرى, سوعىس ارداگەرلەرىنىڭ تۋىستارى, قىزىلوردا وبلىستىق ارداگەرلەر كەڭەسىنىڭ توراعاسى, دەپارتامەنت باسشىلىعى جانە جەكە قۇرام قاتىستى.
شارا بارىسىندا ىشكى ىستەر ءمينيسترى, پوليتسيا گەنەرال-پولكوۆنيگى قالمۇحانبەت قاسىموۆتىڭ ماراپاتتاۋ جايلى بۇيرىعى رەسمي تۇردە وقىلىپ, مينيستر بۇيرىعىمەن ۇلى وتان سوعىسى ارداگەرى يسلام ابىشبەكوۆ قۇرمەت گراموتاسىنا يە بولدى. قىزىلوردا وبلىستىق ءىىد باستىعى, پوليتسيا پولكوۆنيگى ج.سۇلەيمەنوۆتىڭ بۇيرىعىمەن دەپارتامەنتتىڭ 15 ارداگەرى, سونداي-اق ءوز قىزمەتتىك مىندەتتەرىنە ادالدىقپەن قاراپ, قۇقىقتىق ءتارتىپ پەن قاۋىپسىزدىكتى قامتاماسىز ەتۋدە ەرەكشە كوزگە تۇسكەن دەپارتامەنتتىڭ بىرنەشە قىزمەتكەرى ماراپاتتالدى.
سونان سوڭ ىشكى ىستەر ورگاندارىندا ابىرويلى قىزمەت اتقارعان ۇلى وتان سوعىسىنىڭ 102 ارداگەرىنىڭ اتى جازىلعان ءمارمار تاقتانىڭ اشىلۋ ءراسىمى ءوتتى. ەسكەرتكىشتى ۇلى وتان سوعىسىنىڭ ارداگەرى ماحامبەت بەرجانوۆ پەن تىل ەڭبەككەرى پىرىمبەت بايتوقاەۆ اشتى. بۇدان كەيىن جينالعاندار 1 مينۋت ۇنسىزدىك جاريالاپ, سوعىستا قازا بولعانداردى ەسكە الىپ, رۋحتارىنا تاعزىم ەتتى.
ءىس-شارا ەسكەرتكىشكە گۇل شوقتارىن قويۋمەن قورىتىندىلانىپ, شارا سوڭىندا كەلگەن قوناقتار ەستەلىك سۋرەتكە ءتۇستى. سونىمەن قاتار, ارداگەرلەردىڭ قۇرمەتىنە مەرەكەلىك داستارقان جايىلىپ, كونتسەرتتىك باعدارلاما قويىلدى.
ەرجان بايتىلەس.
دەرەك, سۋرەت: egemen.kz.
