ايماق ءۇشىن ماڭىزى زور ءىرى كەڭسە

كەشە قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ دۇنيەجۇزىلىك دەنساۋلىق ساقتاۋ ۇيىمى ەۋروپا وڭىرلىك بيۋروسىنىڭ ديرەكتورى جۋجاننا ياكابتى قابىلدادى, دەپ حابارلادى سەناتتىڭ ءباسپاسوز قىزمەتى. جوعارعى پالاتانىڭ باسشىسى الماتىدا ددۇ-عا مۇشە 53 مەملەكەتتىڭ قىزمەتىن ۇيلەستىرەتىن دارىگەرلىك-سانيتارلىق العاشقى كومەك جونىندەگى ۇيىمنىڭ «گەو­گرافيالىق تۇرعىدا قاشىق­تاعى» كەڭسەسىن اشۋ تۋرالى شەشىمى ءۇشىن ج.ياكابقا العىس ايتتى, ول قازاقستاننىڭ وسى بەدەلدى حالىقارالىق ۇيىممەن تابىستى ىنتىماقتاستىعىنىڭ كورىنىسى بولىپ وتىر. سەنات توراعاسى بۇۇ اياسىن­داعى دەنساۋلىق ساقتاۋ سالا­سىن­داعى حالىقارالىق قىزمەتىن, اتاپ ايتقاندا, جۇقپالى ەبولا ۆيرۋسىمەن كۇرەستەگى ددۇ جەتىستىكتەرىن اتاپ ءوتتى. ج.ياكاب ءبىزدىڭ ەلىمىزدەگى دەن­ساۋلىق ساقتاۋ سالاسىنىڭ دامۋى مەن نەگىزگى كورسەتكىشتەردىڭ جاق­سارۋىنا, «سالاماتتى قازاقستان» مەملەكەتتىك باعدارلاماسىن ىسكە اسىرۋعا, سونداي-اق, بالالاردىڭ شەتىنەۋىن ازايتۋ جونىندەگى جۇمىستارعا قاناعاتتانعاندىق ءبىلدىردى. دۇنيەجۇزىلىك دەنساۋلىق ساقتاۋ ۇيىمى ەۋروپا بيۋروسىنىڭ وڭىرلىك ديرەكتورىنىڭ پىكىرىنشە, الماتىدا بۇۇ-نىڭ العاشقى ءىرى كەڭسەسىنىڭ اشىلۋى قازاقستان ءۇشىن عانا ەمەس, تۇتاستاي ايماق ءۇشىن ەرەكشە ماڭىزدى. «كەڭسەنىڭ اشىلۋى دەنساۋلىق ساقتاۋ سالاسىنداعى جانە سىزدەردىڭ ەل­دەرىڭىزدىڭ كوشباسشىلىعىن نى­عاي­تۋعا جانە قازاقستاننىڭ الەمدەگى ەڭ دامىعان ەلدەردىڭ توبىنا ەنۋى جونىندەگى ءورشىل ماقساتىن ىسكە اسىرۋعا ىقپال ەتەدى», دەدى وڭىرلىك ديرەكتور. ق.توقاەۆ قازاقستان حالقىنىڭ دەنساۋلىعىن جاقسارتۋعا باعىت­تالعان بىرلەسكەن كۇش-جىگەردى زاڭنامالىق تۇرعىدا قولداۋعا سەناتتىڭ ازىرلىگىن ءبىلدىردى.