كومپانيا شىعاراتىن تامپوناجدى تسەمەنت قۇرىلىس, مۇناي-گاز جانە ۋران وندىرىسىندە كەڭىنەن قولدانىلادى. قاجەتتى شيكىزاتتىڭ دەنى شيەلى اۋدانىنان الىنىپ, قالعانى باسقا وبلىستاردان جەتكىزىلىپ تۇر.
«جىلىنا ءبىر مارتە عانا جوندەۋ جۇمىسىنا توقتايمىز. قالعان ۋاقىتتا ۇزدىكسىز, تاۋلىگىنە 24 ساعات جۇمىس ىستەيمىز. ءوندىرىس تولىق اۆتوماتتاندىرىلعان. سىرتتاعى اقاۋدى ءبارىن باقىلاپ وتىراتىن ورتالىق باسقارۋ پۋلتىنەن انىقتاپ, جوندەۋ جۇمىسىن جۇرگىزە بەرەمىز. زاۋىتتىڭ وزىندە 250, مەردىگەر كومپانيالاردا 400-گە جۋىق ادام جۇمىس ىستەيدى. مامانداردىڭ ءبارى دەرلىك جەرگىلىكتى ازاماتتار», دەيدى زاۋىتتىڭ ورتالىق باسقارۋ ءبولىمىنىڭ باسشىسى تابيعات ابەكوۆ.
مامان دەمەكشى, زاۋىت جۇمىسىن باستاعان جىلى جەرگىلىكتى 100 جاس قىتاي ەلىندەگى زاۋىتتا وقىپ كەلىپتى. ارتىنشا ينۆەستورلار شيەلى يندۋستريالىق-اگرارلىق كوللەدجى بازاسىندا تاعى 100 مامان دايارلاۋدى قولعا العان. قازىر مامان دايارلاۋ باعىتىندا م.اۋەزوۆ اتىنداعى وڭتۇستىك قازاقستان ۋنيۆەرسيتەتىمەن بايلانىستى نىعايتقان. زاۋىت وسى وقۋ ورنىمەن بىرىگىپ, وقۋ ورىندارى مەن وندىرىستە قولدانۋ ءۇشىن تسەمەنت تەحنولوگياسى تۋرالى كىتاپ تا شىعارىپ جاتىر.
شەت مەملەكەتتەر اراسىنان زاۋىت ءونىمىن قىرعىزستان, تۇرىكمەنستان, اۋعانستان مەن تاجىكستان كوبىرەك الادى. باستاپقىدا تۇتىنۋشىلار قاتارىندا وزبەكستان دا بار ەدى. قىتايلىق كورپوراتسيا 3-4 جىل بۇرىن وزبەك ەلىنە دە وسىنداي ءوندىرىس ورنىن سالىپ, قازىر ولار ورتالىق ازيا بويىنشا وسى سالاداعى ءىرى كاسىپورىن اتانىپ وتىر.
«شيكىزاتتان ونىمگە اينالعانشا بار جۇمىس وسى ورتالىقتان باسقارىلادى. وتاندىق ماماندار قازىر شەتەلدىكتەردىڭ ورنىن باستى. جۇمىس تۇراقتى, تابىس ويداعىداي بولعاسىن ءوندىرىس ورنىنان كەتەتىندەر از. ورتاشا ايلىق 250 مىڭ تەڭگەدەن جوعارى. بىلتىر جالاقىنى 10%-عا كوتەردى. ءونىم باعاسى قىمباتتاعاندىقتان, بيىل دا ايلىق وسەدى دەپ وتىرمىز. سوندىقتان وسى زاۋىت جۇمىسشىسى بولۋعا ىنتالىلار كوپتەپ سانالادى. وسىلايشا, ەلىمىزدەگى جالعىز تامپوناجدى تسەمەنت وندىرەتىن زاۋىت جۇمىسىن ءوز جىگىتتەرىمىز دوڭگەلەتىپ اكەتتى. ءونىم ساپالى بولعاندىقتان جىل سايىن تۇتىنۋشىلار قاتارى دا ارتىپ كەلەدى», دەيدى جالپى باسقارۋ ءبولىمىنىڭ باسشىسى ەرسىن بازىلبەك.
وبلىستىق كاسىپكەرلىك جانە ونەركاسىپ باسقارماسى مەن وڭىرلىك كوممۋنيكاتسيا قىزمەتى جۇمىسشى ماماندىقتارى جىلىنا وراي ۇيىمداستىرعان كوشپەلى بريفينگتە شيەلى اۋدانىندا كاسىپكەرلىكتى دامىتۋدا ءوندىرىس سالاسىنا دەن قويىلعانىن بايقادىق. الداعى ۋاقىتتا اۋداندا جالپى قۇنى 70 ملرد تەڭگەگە جۋىق جوبالار جۇزەگە اسىرىلادى. بۇلاردىڭ اراسىندا جەكە ينۆەستيتسيا ۇلەسى باسىم.
ازىرگە اۋدان ءوندىرىسىنىڭ كوش باسىندا ءونىمى ەلدىڭ بارلىق وڭىرىنە تاسىمالدانىپ, قۇرىلىس يندۋسترياسىنا كەڭىنەن پايدالانىلىپ وتىرعان «گەجۋبا شيەلى تسەمەنت» كومپانياسى تۇر.
قىزىلوردا وبلىسى,
شيەلى اۋدانى
