ورال. 6 مامىر. باتىس قازاقستان وبلىسىنىڭ ورتالىعى - ورال قالاسىنىڭ ءۇش جاس دومبىراشىسى چەحيا استاناسى – پراگادا وتكىزىلگەن بالالار مەن جاسوسپىرىمدەر اراسىنداعى VII حالىقارالىق فەستيۆال-بايقاۋدىڭ جەڭىمپازدارى اتاندى. بۇل تۋرالى egemen.kz ءتىلشىسى حابارلادى.
بايقاۋعا الەمنىڭ بىرنەشە ەلىنەن جاس شامالارى 5 پەن 20-نىڭ اراسىنداعى 300-دەن استام بالعىن مۋزىكانتتار قاتىستى. اتالعان سىندا ەل نامىسىن قورعاعان ورال قالاسىنداعى №11 دارىندى بالالارعا ارنالعان مەكتەپتىڭ جانىنداعى ونەر مەكتەبىنىڭ وقۋشىسى ماليكا احمەتوۆا قازاق دومبىراسىمەن ەۋروپالىقتاردى تاڭىرقاتتى.
ماليكا ەكى شىعارما ورىندادى. ءبىرىنشىسى, بەلگىلى برازيليا كومپوزيتورى زەكيني دە ابرەۋدىڭ «تيسو-تيسو» شىعارماسى بولسا, ەكىنشىسى, قازاق كومپوزيتورى ەرمۇرات ۇسەنوۆتىڭ «جالقى جىگىت» اتتى تۋىندىسى. قازىلار القاسى حالىقتىق مانەردە ورىندالعان قازاقستاندىق جاس ورەننىڭ ونەرىن جوعارى باعالاپ ءبىرىنشى ورىن بەردى.
ەۋروپا جۇرەگىندە قازاق دومبىراسىنىڭ ۇنىمەن ەۋروپالىقتاردى ءتانتى ەتكەندەردىڭ قاتارىندا ورال مۋزىكا كوللەدجىنىڭ ءتورتىنشى كۋرس ستۋدەنتى ارحات ستامعازى دا بار. ونىڭ رەپەرتۋارىندا نۇرعيسا تىلەنديەۆتىڭ «اققۋ» كۇيى مەن ءابىلاحات ەسپاەۆتىڭ «بوگەلەگى» بار. ارحات تا ءبىرىنشى ورىننىڭ تۇعىرىنان تابىلدى.
حالىقارالىق بايقاۋدىڭ شىڭىن باعىندىرعان ءۇشىنشى مۋزىكانتىمىز – ەرجان قۇمارعاليەۆ. ول – وبلىس ورتالىعىنان شالعايدا جاتقان قازتالوۆ اۋدانىنداعى اقپاتەر مۋزىكا مەكتەبىنىڭ وقۋشىسى.
وسىلايشا ورالدىق ءۇش مۋزىكانت تالعامى بيىك, شوقتىعى جوعارى ەۋروپا كورەرمەندەرىنە قازاقتىڭ قارا دومبىراسىنىڭ قۇدىرەتىن تانىتتى. ءسويتىپ, پراگا ساحناسىندا قازاقستاننىڭ تۋى جەلبىرەدى. جارايسىڭدار, جاس ورەندەر – ماليكا, ارحات جانە ەرجان!
تەمىر قۇسايىن.
دەرەك, سۋرەت: egemen.kz.
