شىعىس قازاقستان وبلىسىندا جۇرگىزىلگەن رەيدتىك ءىس-شارالار بارىسىندا 117 اكىمشىلىك قۇقىق بۇزۋشىلىق انىقتالدى. ونىڭ 92-ءسى – زاڭسىز بالىق اۋلاۋ, 24-ءى – كەمە قوزعالىسى ەرەجەلەرىن بۇزۋ, 2 جاعداي – سۋ ايدىندارىن لاستاۋ, 1 جاعداي – بالىقتى زاڭسىز تاسىمالداۋ دەرەگى بولدى. تاركىلەنگەن زاتتار قاتارىندا 133 بىرلىك بالىق اۋلاۋ قۇرالدارى مەن كولىك قۇرالدارى بار, ونىڭ ىشىندە 130 اۋ جانە 3 ءجۇزۋ قۇرالى. تاركىلەنگەن بالىقتىڭ جالپى سالماعى 44 كگ. سالىنعان ايىپپۇلداردىڭ جالپى سوماسى – 2 422 000 تەڭگە. بالىق قورىنا كەلتىرىلگەن زالال – 127 000 تەڭگە.
بۇل تۋرالى زايسان-ەرتىس وبلىسارالىق باسسەيندىك بالىق شارۋاشىلىعى ينسپەكتسياسىنىڭ باسشىسىنىڭ ورىنباسارى فارحات بايبازاروۆ مالىمدەدى.
جىل باسىنان بەرى ينسپەكتسيا 656 رەيد جۇرگىزىپ, 444 اكىمشىلىك ءىس تىركەگەن. جالپى سوماسى 10 ميلليون تەڭگەگە ايىپپۇل سالىنىپ, ونىڭ 9 ميلليونى ءوندىرىلدى. 1 336 كگ-نان استام زاڭسىز اۋلانعان بالىق جانە 973 بىرلىك اۋلاۋ قۇرالدارى, سونىڭ ىشىندە اۋ, قارماق, قايىق پەن موتورلار تاركىلەندى.
«ۋىلدىرىق شاشۋ» اكتسياسىمەن قاتار 1–31 مامىر ارالىعىندا جىل سايىنعى «تازا سۋ ايدىندارى» ەكولوگيالىق ناۋقانى ءوتتى. ناۋقاننىڭ ماقساتى – بالىق شارۋاشىلىعى سۋ ايدىندارىن قوقىستان جانە يەسىز قالقىمالى اۋلاردان تازارتۋ, سونداي-اق حالىقتىڭ ەكولوگيالىق ماسەلەلەرگە نازارىن اۋدارۋ. ءىس-شاراعا 271 ادام, 67 تەحنيكا, ونىڭ ىشىندە 16 ءجۇزۋ قۇرالى جۇمىلدىرىلدى. جۇمىستار بارىسىندا 33,5 توننا قوقىس جينالىپ, 116 بالىق اۋلاۋ اۋلى سۋدان شىعارىلىپ, جويىلدى. ينسپەكتسيا جاعالاۋداعى اۋىلداردىڭ تۇرعىندارىمەن, مەكتەپ وقۋشىلارىمەن جانە ستۋدەنتتەرمەن كەزدەسۋلەر وتكىزىپ, تابيعاتتى قورعاۋ جانە بالىق اۋلاۋ ەرەجەلەرىن ساقتاۋ ماڭىزدىلىعىن ءتۇسىندىردى.
بالىق قورلارىن مولايتۋ ماسەلەسىنە دە ەرەكشە كوڭىل ءبولىندى. 2025 جىلعى كوكتەمدە بۇقتىرما جانە وسكەمەن سۋ قويمالارىنا شامامەن 12 ميلليون سيگ تۇقىمداس بالىق شاباقتارى پەلياد جانە ريپۋس جىبەرىلدى. 2024 جىلى جالپى 28,5 ميلليون بالىق جىبەرىلىپ, وعان 75 ميلليون تەڭگەگە جۋىق قاراجات جۇمسالدى. سونداي-اق, ەكولوگيالىق زالالدى وتەۋ اياسىندا كاسىپورىندار سۋ ايدىندارىنا 3,5 ميلليونعا جۋىق بالىق جىبەردى. وسكەمەن, ءشۇلبى جانە بۇقتىرما سەس-تەرى 34 ميلليون تەڭگە كولەمىندە زالالدى وتەدى. مەملەكەتتىك تاپسىرىس بويىنشا شقو سۋ ايدىندارىنا تاعى 12,5 ميلليوننان استام شاباق جىبەرىلىپ, وعان 77 ميلليون تەڭگە ءبولىندى.
بارلىق ءىس-شارالار اۋماقتىق ينسپەكتسيا, عىلىمي قاۋىمداستىق, جەرگىلىكتى اتقارۋشى ورگاندار مەن قوعامدىق ۇيىمدار وكىلدەرىنىڭ قاتىسۋىمەن وتكىزىلدى.
بۇدان بولەك, ۇكىمەت قاۋلىسىمەن بەكىتىلگەن 2030 جىلعا دەيىنگى بالىق شارۋاشىلىعىن دامىتۋ باعدارلاماسىنىڭ جۇزەگە اسىرىلۋىنا دا ەرەكشە كوڭىل بولىنۋدە. باعدارلامانىڭ ماقساتى – حالىقتى بالىق ونىمدەرىمەن قامتاماسىز ەتۋ, اكۆامادەنيەتتى دامىتۋ جانە سۋ بيورەسۋرستارىن ساقتاۋ. باعدارلاما اياسىندا جەم-ءشوپ, قۇرال-جابدىق پەن ءدارى-دارمەكتەرگە جۇمسالاتىن شىعىنداردى سۋبسيديالاۋ, ينۆەستيتسيالىق شىعىنداردى وتەۋ, سونداي-اق 10 جىلعا دەيىن 2,5% جەڭىلدەتىلگەن نەسيە بەرۋ قاراستىرىلعان. 2024 جىلى شقو-دا بالىق شارۋاشىلىعىن قولداۋعا 424 ملن تەڭگە جەم-ءشوپ پەن قۇرال-جابدىق ساتىپ الۋعا, تاعى 25 ملن تەڭگە تەحنيكا مەن كولىك الۋعا ءبولىندى. سونداي-اق, بالىق اۋلاۋ شارۋاشىلىقتارىن بالىق ءوسىرۋشى مارتەبەسىنە كوشىرۋ باستالىپ, بۇل ءراسىمدى 8 كاسىپورىن اياقتادى.
شىعىس قازاقستان وبلىسى
