الماتى. 6 مامىر. «ەگەمەن قازاقستان» گازەتىنىڭ الماتى قالاسىندا تۇراتىن مايدانداعى جانە تىلداعى ارداگەرلەرىنە رەداكتسيا تاراپىنان ارنايى قۇرمەت كورسەتىلدى. ماراپات العانداردىڭ ىشىندە بەلگىلى جازۋشى-جۋرناليست قالمۇقان يساباەۆ, بيسۇلتان امانعاليەۆ جانە بوستاندىق اۋداندىق ارداگەرلەر كەڭەسىنىڭ توراعاسى, تىل ارداگەرى حاميت ءبىرجانوۆ بار. بۇل تۋرالى egemen.kz حابارلادى.
ەل باسىنا كۇن تۋعاندا قانشاما بوزداق قالامىن قارۋعا ايىرباستاپ, قان مايدانعا اتتاندى؟! قانشاما قىرشىن جاس وتان ءۇشىن مايدان دالاسىندا وپات بولدى, جاۋىن جەڭگەندەرى ەلگە امان ورالدى. ۇلى وتان سوعىسىنىڭ تاريحىندا «سوتسياليستىك قازاقستان» («ەگەمەن قازاقستان») گازەتىنىڭ مايدانگەر جۋرناليستەرىنىڭ ەسىمدەرى دە «التىن ارىپپەن» جازىلعان. ءار جىلدار بەدەرىندەگى «سوتسياليستىك قازاقستاننىڭ» سارعايعان بەتتەرىندە قولتاڭبالارى قالعان ارداقتى ارداگەرلەر رەداكتسيامەن اراداعى بايلانىسىن ەشقاشان ۇزگەن ەمەس. ەلىمىزدىڭ باس گازەتى «ەگەمەننىڭ» بۇگىنگى تىنىس-تىرشىلىگىنەن حاباردار, زامانا ۇندەسۋلەرىنەن قۇلاعدار بولىپ وتىرادى.
بوستاندىق اۋدانىنىڭ اكىمدىگىندە وتكەن ارداگەر-جۋرناليستەردى ماراپاتاۋ راسىمىندە باسىلىمنىڭ الماتى بولىمشەسىنىڭ جەتەكشىسى قورعانبەك امانجول استاناداعى رەداكتسيا باسشىلىعىنىڭ اتىنان قۇتتىقتاۋ حات وقىپ, گازەت ارداگەرلەرىنە گۇل شوقتارى مەن اقشالاي سىياقى تابىس ەتتى. قارت قالامگەرلەرگە ۇزاق تا باقىتتى عۇمىر تىلەدى. سونداي-اق, اۋدان اكىمىنىڭ ورىنباسارى س. ءمانىزوروۆ ارداگەرلەردى ايتۋلى مەرەكەمەن قۇتتىقتادى.
ءوز كەزەگىندە مايدانگەرلەر دە باس باسىلىمعا سىي-قۇرمەتى ءۇشىن العىس ايتتى.
تالعات ءسۇيىنباي.
دەرەك, سۋرەت: egemen.kz.
