فوتو: اشىق دەرەككوز
ءماجىلىس دەپۋتاتى ابزال قۇسپاننىڭ ايتۋىنشا, باستامانىڭ ماقساتى — قوعامعا قاۋىپ توندىرمەيتىن ادامدارعا گۋمانيزم كورسەتۋ.
دەپۋتات راقىمشىلىقتىڭ ەڭ الدىمەن وسال توپتارعا باعىتتالاتىنىن ءتۇسىندىردى. ونىڭ ىشىندە زەينەتكەرلەرگە, كامەلەتكە تولماعاندارعا, بالالاردى جالعىز تاربيەلەپ وتىرعان ايەلدەر مەن ەر ادامدارعا جانە باسقا دا ەرەكشە جاعدايداعى ازاماتتارعا جاسالادى.
ەكونوميكالىق قىلمىس جاساعاندارعا قاتىستى جاعداي دا قاراستىرىلعان. ەگەر قىلمىس سالدارىنان كەلتىرىلگەن زالال تولىعىمەن وتەلسە, ۇرلىق پەن الاياقتىق سياقتى ىستەر بويىنشا دا راقىمشىلىق جاسالۋى مۇمكىن.
زاڭ جوباسىن ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى سنەجاننا يماشەۆا دا قولدادى. ونىڭ ايتۋىنشا, بۇل — قىلمىستىق ساياساتتى ىزگىلەندىرۋ جانە راقىمشىلىقتى كەڭىنەن قولدانۋ ارقىلى قوعامداعى وڭ وزگەرىستەرگە قول جەتكىزۋگە باعىتتالعان قادام.
2025 جىلدىڭ قاڭتارىندا دەپۋتات قاراقات ابدەن سوتتالعان ايەلدەرگە راقىمشىلىق جاساۋ ۇسىنىسىن بەرگەن ەدى. بۇل باستاما ىشكى ىستەر مينيسترلىگىنىڭ قولداۋىنا يە بولدى. مينيسترلىك مالىمەتىنشە, قازاقستاندا قازىر قىلمىس جاساعان كوپتەگەن ايەلدەر جازاسىن وتەپ جاتىر جانە ولاردىڭ كوپشىلىگى وسى جاڭا زاڭ اياسىندا راقىمشىلىققا ىلىگۋى ىقتيمال.
دەپۋتاتتاردىڭ پىكىرىنشە وسى زاڭ جوباسىنىڭ قابىلدانۋى سوتتالعانداردىڭ ومىرىنە وڭ اسەر ەتىپ قانا قويماي, ولاردىڭ قوعامعا قايتا بەيىمدەلىپ, الەۋمەتتىك بەلسەندى ازاماتقا اينالۋىنا مۇمكىندىك بەرەدى.
جانەل تولەۋبەكوۆا, ەۇۋ ستۋدەنتى
