فوتو: اشىق دەرەككوز
قازاقستاندا دارىلىك زاتتار مەن مەديتسينالىق بۇيىمداردى ۋاقتىلى جەتكىزبەيتىن, شارتتىق مىندەتتەمەلەرىن بۇزاتىن جەتكىزۋشىلەردىڭ ءتىزىمى جاساقتالادى. بۇل جونىندە دەنساۋلىق ساقتاۋ ۆيتسە-ءمينيسترى ەرجان نۇرلىباەۆ ورتالىق كوممۋنيكاتسيالار قىزمەتىندە وتكەن بريفينگتە حابارلادى.
ونىڭ ايتۋىنشا, بيىل «كابوزانتينيب» پرەپاراتى بويىنشا ونكولوگيالىق ناۋقاستارعا بايلانىستى بىرنەشە شاعىم تۇسكەن. سەبەبى ءتيىستى تەندەردى جەڭىپ العان كومپانيا ءدارىنى بەلگىلەنگەن مەرزىمدە جەتكىزبەگەن. سونىڭ سالدارىنان ەمدەلۋشىلەر قاجەتتى ەمدى ۋاقىتىلى الا الماي وتىر.
«شارت بويىنشا مىندەتتەمەلەر ورىندالماعان سوڭ, دەنساۋلىق ساقتاۋ باسقارماسى كەلىسىمدى بىرجاقتى تۇردە بۇزدى. قازىر بۇل باعىتتا جاڭا كونكۋرس جاريالاۋ جۇمىستارى باستالدى», دەدى ەرجان نۇرلىباەۆ.
سونداي-اق, ول 2024 جىلى جوعارى اۋديتورلىق پالاتا تاراپىنان جۇرگىزىلگەن تەكسەرىستەن كەيىن دەنساۋلىق ساقتاۋ مينيسترلىگى مەن «سق-فارماتسيا» مەكەمەسىنە بىرنەشە ۇسىنىم بەرىلگەنىن اتاپ ءوتتى. سونىڭ ءبىرى — ءدارى-دارمەك پەن مەديتسينالىق قۇرالداردى جۇيەلى تۇردە جەتكىزبەي جۇرگەن جەتكىزۋشىلەردىڭ «قارا ءتىزىمىن» قۇرۋ.
«قازىرگى ۋاقىتتا وسى ءتىزىمدى قالىپتاستىرۋ جۇمىستارى ءجۇرىپ جاتىر. جاقىن ارادا بۇل مەحانيزمدى رەسمي تۇردە بەكىتۋ ءۇشىن سالالىق نورماتيۆتىك اكتىلەرگە وزگەرىستەر ەنگىزەمىز», دەدى ۆيتسە-مينيستر.
بۇل شارا وتاندىق دەنساۋلىق ساقتاۋ جۇيەسىندەگى ءتارتىپ پەن جاۋاپكەرشىلىكتى كۇشەيتۋگە باعىتتالعان.
جانەل تولەۋبەكوۆا, ەۇۋ ستۋدەنتى
