سۋرەتتى تۇسىرگەن – ءمادي عۇبايدۋللين
نۇرلىگۇل وتەمىسقىزىنىڭ ساحنالىق عۇمىرى ورال تەاترىمەن بىرگە جاساسىپ كەلە جاتىر. ونەر ۇجىمىنىڭ بەلدى مۇشەسى, مادەنيەت سالاسىنىڭ ۇزدىگى اتانعان ساحنا شەبەرى تالاي مارتە حالىقارالىق, رەسپۋبليكالىق بايقاۋلاردىڭ باس جۇلدەسىن جەڭىپ العان.
مەملەكەتتىك سىيلىقتىڭ لاۋرەاتى سەردەش قاجىمۇراتوۆ قويعان «اپكە» پەساسى بۇدان ونداعان جىل بۇرىن ورال تەاترىنىڭ ساحناسىندا قويىلىپ, كورەرمەن كوڭىلىنەن شىققان بولاتىن. نۇرگۇلدىڭ قايراتكەرلىك بولمىسىن, قاجىرلى دا قايسار مىنەزىن اشاتىن وسى قويىلىمدى مەرەيتوي يەسى قايتا ء«تىرىلتتى». 10 جىلدان كەيىن اكتريسا «قاماجاي» رولىنە قايتا ورالىپ, كورەرمەنمەن قاۋىشتى. بۇل كەش — تەاترسۇيەر قاۋىم ءۇشىن دە, ساحنا ءۇشىن دە ەرەكشە ساتكە اينالدى. اكتريسانىڭ جۇرەكتەن شىققان شىنايى ويىنى كورەرمەنگە ەرەكشە اسەر سىيلادى.
«قويىلىمدى 10–12 جىل بۇرىن دا تاماشالاپ ەدىم. بىراق بۇگىن جاڭادان كورگەندەي بولدىم. اكتريسا ءوز ءرولىن جارقىراتىپ وينادى, ناعىز وبرازعا ەنۋ دەگەندى كورسەتتى. ونىڭ ويناعانى رولدەگى اپكە مە, شىنايى اپكە مە, اجىراتۋ قيىن. تۇتاس قويىلىمدى وزىنەن تارتىپ, باستى ءرولدى سومداۋ دەگەننىڭ نە ەكەنىن كورسەتتى. ناعىز اكتريسا ەكەنىن تاعى دا مويىنداتتى» دەيدى قويىلىمدى كورىپ شىققان سۆەتلانا باقىشەۆا.
مەرەيتوي اياسىندا اكتريسانىڭ ونەر جولى بەينەلەنگەن شاعىن كورمە, دەرەكتى فيلم كورسەتىلدى. ال كەش سوڭىندا باتىس قازاقستان وبلىسى اكىمىنىڭ ورىنباسارى قايىرجان مەڭدىعاليەۆ ساحناعا شىعىپ, ونەر شەبەرىنە قۇرمەت كورسەتتى. وبلىس باسشىسىنىڭ اتىنان قۇتتىقتاۋ ايتىپ, مەرەيتوي يەسىنىڭ يىعىنا شاپان جاپتى. تەاتر قايراتكەرلەرى وداعى باتىس قازاقستان وبلىستىق فيليالىنىڭ توراعاسى ەلميرا ماقاشەۆا ۇيىم جەتەكشىسى, قازاقستاننىڭ حالىق ءارتىسى تۇڭعىشباي جامانقۇلوۆتىڭ اتىنان قۇتتىقتاۋ حات تاپسىردى.
باتىس قازاقستان وبلىسى
