مارادونا فيفا پرەزيدەنتتىگىنە كانديداتۋراسىن ۇسىنادى

استانا. 22 ماۋسىم. ارگەنتينانىڭ اتاقتى فۋتبولشىسى ديەگو مارادونا فيفا پرەزيدەنتتىگىنەن ءۇمىتتى. بۇل تۋرالى Telesur تەلەارناسىنىڭ ءجۋرناليسى ۆيكتور ۋگو مورالەستىڭ twitter-دەگى جازباسىنا سىلتەمە جاساعان ريا «نوۆوستي» حابارلادى. مورالەس الەۋمەتتىك جەلىدەگى پاراقشاسىنا: «مارادونا فيفا پرەزيدەنتتىگىنە ءوز كانديداتۋراسىن ۇسىنۋعا نيەتتى. ونىڭ اتاق-ابىرويى وتە جوعارى», – دەپ جازعان. ايتا كەتەيىك, اتالعان فۋتبول قاۋىمداستىعىنىڭ سوڭعى پرەزيدەنت سايلاۋى 29 مامىردا وتكەن بولاتىن. ول كەزدە فيفا-نى 1998 جىلدان بەرى باسقارىپ كەلە جاتقان يوزەف بلاتتەر بەسىنشى مەرزىمگە قايتا سايلاندى. الايدا, 2 ماۋسىمدا ول ءوز ەركىمەن وتستاۆكاعا كەتتى. بلاتتەر قاۋىمداستىقتىڭ كەزەكتەن تىس كونگرەسىن وتكىزىپ, تاعى دا پرەزيدەنت سايلاۋىن وتكىزۋدى ۇسىندى. سوعان سايكەس, كەزەكتەن تىس كونگرەسس وسى جىلدىڭ جەلتوقسان ايى مەن 2016 جىلدىڭ اقپانى ارالىعىندا وتەتىن بولىپ شەشىلدى. ال پرەزيدەنت سايلاۋى وتەتىن مەرزىم 20 شىلدەدە بەلگىلى بولادى. مارادوناعا دەيىن دە بىرنەشە فۋتبول مامانى پرەزيدەنتتىكتەن ءۇمىتتى ەكەندەرىن مالىمدەگەن ەدى. ولاردىڭ اراسىندا فرانتسيانىڭ بەلگىلى فۋتبولشىسى داۆيد جينولا, يوردانيا حانزاداسى ءالي بين-ءال-حۋسەين, فيفا-نىڭ بۇرىنعى ۆيتسە-پرەزيدەنتى جانە وڭتۇستىك كورەيا فۋتبول قاۋىمداستىعىنىڭ بۇرىنعى باسشىسى چون مون دجۋن, برازيليانىڭ داڭقتى فۋتبولشىسى زيكو, سونداي-اق, ليبەريا فۋتبول قاۋىمداستىعىنىڭ پرەزيدەنتى مۋسا بيليتي بار. ەلامان قوڭىر. دەرەك, سۋرەت: ريا «نوۆوستي».