تالدىقورعان. 6 مامىر. الماتى وبلىسى قاپشاعاي قالاسىنداعى داڭق مەموريالى جانىندا ۇلى وتان سوعىسى قۇرباندارىن ەسكە الۋعا ارنالعان ميتينگ بولدى. بۇل تۋرالى egemen.kz ءتىلشىسى حابارلادى.
ەسكە الۋ شاراسىنا سوعىس ارداگەرلەرى, اسكەري قىزمەتكەرلەر مەن ينتەرناتسيوناليست جاۋىنگەرلەر, قازاقستانداعى رەسەي كونسۋلدىعىنىڭ وكىلدەرى جانە جەتىسۋلىقتار قاتىستى. سالتاناتتى جيىندا بەلگىلەنگەن تارتىپكە وراي ەلىمىزدىڭ كوك بايراعى جەلبىرەپ, ءانۇرانى شىرقالعان سوڭ, ماڭگىلىك الاۋ تۇتاتىلدى. ۆولوكولامسك قالاسىنان ارنايى اكەلىنگەن جەر كاپسۋلاسى ورناتىلىپ, گۇل شوقتارى قويىلدى. «جەڭىس كۇنى – ءبارىمىز ءۇشىن ايرىقشا قىمبات, قاسيەتتى مەرەكە. بۇل سول جەڭىستى جاقىنداتۋ ءۇشىن جان اياماي شايقاسىپ, قان مايداننان ورالماعان ارىستارىمىزدى ەسكە الاتىن كۇن», – دەدى الماتى وبلىسى اكىمىنىڭ ورىنباسارى باقتيار ونەرباەۆ.
نۇربول الدىباەۆ
دەرەك, سۋرەت: egemen.kz.
