الەم مەملەكەتتەرى اراسىنداعى سەنىم السىرەپ, گەوساياسي شيەلەنىستەر كۇشەيىپ, ديالوگتىڭ ورنىنا ۇنسىزدىك جايلاپ بارادى. وسىنداي كەزدە قازاقستان ۇيىمداستىرىپ وتىرعان مۇنداي فورۋمدار – شىن مانىندە ستراتەگيالىق ماڭىزى بار باستاما.
استانا فورۋمى قاتارداعى پىكىر الماسۋ الاڭى ەمەس. بۇل – الەمدىك سەنىمدى قالپىنا كەلتىرۋ جولىنداعى ناقتى قادام. مۇندا شىعىس پەن باتىس, سولتۇستىك پەن وڭتۇستىك وكىلدەرى ءبىر ۇستەل باسىندا وتىرىپ, اشىق سويلەسە الادى. قازىرگىدەي فراگمەنتتەلگەن, ياعني بولشەكتەنىپ كەتكەن الەمدە وسىنداي ديالوگ الاڭدارى ماڭىزعا يە بولىپ وتىر.
مەن ءۇش جىل بۇرىن ساياساتتان كەتكەن سوڭ, كيبەرقاۋىپسىزدىك پەن جاساندى ينتەللەكت سالاسىندا جۇمىس ىستەپ كەلەمىن. قازىر ءوزىم باسقاراتىن كومپانيا مەملەكەتتەر مەن ماڭىزدى ينفراقۇرىلىمداردى كيبەرشابۋىلداردان قورعاۋ ءۇشىن الەمنىڭ ءار تۇكپىرىندە جۇمىس ىستەيدى. ساياسات ساحناسىنان كەتسەم دە جاھاندىق ۇردىستەرگە بەيجاي قاراي المايمىن.
سەبەبى بۇگىنگى الەم سەنىم داعدارىسىنا ۇشىراعان. بۇل داعدارىستىڭ شەشىمى – كەزدەسىپ, اشىق ديالوگ ورناتۋ. ءبىر-ءبىرىمىزدى تىڭداي الۋ, تۇسىنە ءبىلۋ – بولاشاقتاعى تۇراقتىلىقتىڭ كەپىلى. وسى تۇرعىدان العاندا, استانا حالىقارالىق فورۋمى – مەملەكەتتەردى قايتا جاقىنداستىراتىن, سەنىمدى قايتا وياتاتىن بىرەگەي پلاتفورما.
سەباستيان كۋرتس,
اۋستريانىڭ ەكس-كانتسلەرى, كاسىپكەر
