قىزىلوردادا 163 مىڭنان استام اعاش وتىرعىزىلدى

قىزىلوردا. 6 مامىر. بيىلعى كوكتەمدە قىزىلوردا وبلىسى بويىنشا 7 رەت سەنبىلىك وتكىزىلىپ, اعاش كوشەتتەرى وتىرعىزىلدى. بۇل تۋرالى egemen.kz ءتىلشىسى حابارلادى. بۇعان قوسا, 18 ءساۋىر كۇنى «بۇكىل قازاقستاندىق اعاش وتىرعىزۋ كۇنى» اكتسياسى وتكىزىلدى. اتالعان شارا وبلىستىڭ بارلىق دەڭگەيدەگى ەلدى-مەكەندەرىندە جۇرگىزىلىپ, وعان اۋماقتىق, وبلىستىق, قالالىق, اۋداندىق مەكەمە قىزمەتكەرلەرى جانە ۇكىمەتتىك ەمەس ۇيىمدار, جاستار بىرلەستىكتەرىنىڭ مۇشەلەرى قاتىستى. اكتسياعا وبلىس بويىنشا بارلىعى 24 مىڭعا جۋىق ادام جۇمىلدىرىلىپ, 69 مىڭنان اسا اعاش كوشەتتەرى ەگىلدى. ال ايماقتاعى «تازالىق ايىنىڭ» اياقتالۋىنا 10 كۇن قالدى. الايدا, اۋدانداردا ءالى كۇنگە دەيىن ارنايى كوممۋنالدىق مەكەمەلەر جۇمىسى جولعا قويىلماي كەلەدى. تازالىق شارالارىنا نەمقۇرايلى قاراعان قالا تۇرعىندارى مەن مەكەمە باسشىلارىنا 500-دەن استام ايىپپۇل سالىنىپ, 1000-نان اسا ەسكەرتۋ جاسالعان. تازالىق ساقتاۋ جۇمىستارىنا كوڭىلى تولماعان وبلىس اكىمى قىرىمبەك كوشەرباەۆ تازالىق ايلىعىن 29-شى ماۋسىمعا دەيىن ۇزارتۋ تۋرالى شەشىم قابىلدادى. سونداي-اق, ايماق باسشىسى سىر ەلى اجارلانىپ, كەلبەتتەنە تۇسۋىنە جاعداي جاساۋ ءاربىر تۇرعىننىڭ مىندەتى ەكەنىن ايتتى. ءتيىستى سالا باسشىلارىنا بارلىق اۋدانداردى ارالاپ, كوگالداندىرۋ, كوركەيتۋ جۇمىستارىنىڭ بارىسىن قاداعالۋدى, قالدىقتاردى تاستايتىن پوليگونداردى سالۋ جۇمىسىن تەزدەتۋدى تاپسىردى. ءاربىر سىربويىلىق ءوزى تۇرىپ جاتقان مەكەنىنە دەگەن جاۋاپكەرشىلىگىن سەزىنىپ, جاناشىرلىق تانىتىپ, اينالاسىن تازالاپ, سەنبىلىكتەرگە بەلسەنە قاتىسسا, ءاربىر اۋلا, كوشە تازا دا كورىكتى بولارى ءسوزسىز. ەرجان بايتىلەس. دەرەك: egemen.kz. سۋرەت: muftyat.kz.