قوستاناي. 6 مامىر. قوستانايدا ۇلى وتان سوعىسىنىڭ ارداگەرى, قازاقستان رەسپۋبليكاسىنا ەڭبەگى سىڭگەن زاڭگەر يۆان بۋگاەۆ تۇرعان ءۇيدىڭ قابىرعاسىنا مەموريالدىق تاقتا ءىلىندى. بۇل تۋرالى egemen.kz ءتىلشىسى حابارلادى.
يۆان ميحايلوۆيچ بۋگاەۆ ۇلى وتان سوعىسىنىڭ ارداگەرى, ەلىمىزگە ەڭبەگى سىڭگەن زاڭگەر جانە قوستاناي قالاسىنىڭ قۇرمەتتى ازاماتى بولاتىن. ول سوت جۇيەسىندە 35 جىل قىزمەت ەتتى. مەموريالدىق تاقتانىڭ اشىلۋ سالتاناتىندا ونىڭ شاكىرتتەرى, زامانداستارى ءسوز الدى.
سوت جۇيەسىنىڭ ارداگەرى تۇرسىنباي جارمۇحانبەتوۆ: «مەن بۋگاەۆ اقساقالمەن 14 جىل بىرگە قىزمەت ەتتىم. ول ناعىز ۇستازىم, اقىلشىم بولدى. سول ءۇشىن مەن وعان قارىزدارمىن. مەن بىرگە قىزمەتتەس بولعان التى سۋديانىڭ تورتەۋى سوعىس ارداگەرى بولاتىن. سوتتاعى ءتارتىپ تە سوعىستاعى تارتىپپەن بىردەي ەدى», دەدى.
يۆان بۋگاەۆ سوعىستا 1943 جىلى اۋىر جارالانىپ, گوسپيتالدە ۇزاق ەمدەلەدى, ءبىر قولىن كەسۋگە تۋرا كەلەدى. ول قاتارعا قوسىلعان سوڭ, 1944 جىلى ۋكرايناعا وقۋعا جىبەرىلەدى. سوندا قىزمەت ىستەپ جۇرگەندە ۋكراينادا تاعى ءبىر سوعىس باستالادى. سوعىس كەزىندە باتىس ۋكراينانى نەمىستەردەن ازات ەتۋ كەزىندە تەرنوپول, روۆەن, دروگوبىچسكي ي لۆوۆ وبلىستارىندا ۇلتشىلداردىڭ ۇيىمىندا بولعان باندالار قالىپ قويادى, ولارمەن كادىمگىدەي سوعىس جۇرەدى. ۇرىس كەزىندە بۋگاەۆ تاعى دا جارالانادى. ول جاراقاتى جازىلعاننان كەيىن وقۋ كەرەكتىگىن ءتۇسىنىپ, الماتىداعى زاڭ ينستيتۋتىن بىتىرەدى. ودان كەيىنگى ءومىرىنىڭ بارلىعى قوستانايدا وتەدى. ول وبلىستىق سوتتا 13 جىل سوت توراعاسىنىڭ ورىنباسارى قىزمەتىن اتقارادى.
وبلىستىق سوت توراعاسى عالىمجان مىرزاكە: «يۆان ءميحايلوۆيچتى ۇمىتۋعا بولمايدى. ول بۇگىنگى كوپتەگەن بىلىكتى زاڭگەرلەردىڭ ۇستازى بولعان كىسى» دەدى.
بۋگاەۆ ءومىرىنىڭ سوڭعى جىلدارىن وتكىزگەن وبلىس ورتالىعىنىڭ تولستوي كوشەسىندەگى 69 ءۇيدىڭ قابىرعاسىندا ەلىمىزدىڭ بەلگىلى تۇلعالارى ۇلى وتان سوعىسىنىڭ باتىرى سەيتحان تەمىرباەۆقا, اياۋلى ۇستاز ۆاسيلي ماكوتچەنكوعا جانە جازۋشى سەرىك شاكىباەۆقا دا مەموريالدىق تاقتا ىلىنگەن. ولاردىڭ قاتارىنا يۆان بۋگاەۆ قوسىلدى.
ءنازيرا جارىمبەتوۆا.
دەرەك, سۋرەت: ng.kz
