دەگەنمەن تالاپكەرلەردىڭ دەنى مەملەكەتتىك ءبىلىم گرانتى ارقىلى وقۋعا تۇسكىسى كەلەدى. الايدا گرانت سانى شەكتەۋلى. بيىل Nazarbayev University-گە 2409 ءبىلىم گرانتى بولىنگەن. ياعني 10 000 ءوتىنىش بەرۋشىنىڭ ىشىنەن تەك 2409 ادام عانا گرانتپەن وقۋعا مۇمكىندىك الادى. سوندىقتان وسى جىلى وقۋعا سۇرانىستىڭ ارتۋى مەن مەملەكەتتىك گرانتتاردىڭ شەكتەۋلى بولۋىنا بايلانىستى ۋنيۆەرسيتەت اقىلى بولىمگە ستۋدەنت تارتۋدى قولعا الدى.
NU پرەزيدەنتى ۆاكار احمادتىڭ ايتۋىنشا, وقۋ ورنىنا قازاقستاندا جانە شەتەلدە قىزىعۋشىلىقتىڭ ارتۋىنا ۋنيۆەرسيتەتتىڭ الەمدىك رەيتينگتەردەگى كورسەتكىشتەرىنىڭ جاقسارعانى سەبەپ بولعان.
– حالىقارالىق زەرتتەۋ ۋنيۆەرسيتەتتەرىنىڭ رەيتينگىن انىقتايتىن «Times Higher Education» (THE) ۇيىمنىڭ مالىمەتىنە سايكەس, Nazarbayev University الەمدەگى ەڭ ۇزدىك وقۋ ورىندارىنىڭ العاشقى 24 پايىزىنا كىردى. ال NU جوعارى ءبىلىم بەرۋ مەكتەبى ورتالىق ازيادان العاش بولىپ الەمنىڭ ەڭ ۇزدىك 200 وقۋ ورنىنىڭ قاتارىنا ەنگەن. وسىنداي جوعارى رەيتينگتىڭ ارقاسىندا وتاندىق ۋنيۆەرسيتەتكە شەتەلدىكتەر تاراپىنان قىزىعۋشىلىق ارتتى. قازىر 44 ەلدەگى جۇزدەگەن تالاپكەردەن وقۋعا ءوتىنىش ءتۇستى. ونىڭ ىشىندە قىتاي, رەسەي, اقش سەكىلدى مەملەكەتتەردەن باستاپ, ورتالىق ازيا مەن ەۋروپا ەلدەرى بار, – دەدى NU پرەزيدەنتى.
سونداي-اق ۋنيۆەرسيتەت ينجەنەرلىك, جاساندى ينتەللەكت, جاراتىلىستانۋ, الەۋمەتتىك جانە گۋمانيتارلىق عىلىمدار سياقتى ءتۇرلى سالالاردى قامتىعان زاماناۋي اكادەميالىق باعدارلامالاردىڭ كەڭ جيىنتىعىن ۇسىنادى. بۇل جاھاندىق دەڭگەيگە ۇمتىلاتىن جاستاردىڭ ۋنيۆەرسيتەتكە قىزىعۋشىلىعىن ودان ءارى ارتتىرادى.
بۇگىندە بىرەگەي وقۋ ورنى ەلىمىزدە بىلىكتى, باسەكەگە قابىلەتتى كاسىبي ورتا قالىپتاستىرىپ وتىر. ۋنيۆەرسيتەتتى تامامداعان تۇلەكتەردىڭ 98 پايىزى جۇمىسپەن قامتىلعان. ولاردىڭ 92 پايىزى ەلىمىزدە قىزمەت ىستەيدى.
ايتا كەتەيىك, قازىر NU-دا اقىلى نەگىزدە وقۋعا قۇجاتتاردى قابىلداۋ ءالى ءجۇرىپ جاتىر. ۋنيۆەرسيتەتكە دەيىنگى دايىندىق باعدارلاماسىنا (Foundation) جانە باكالاۆرياتقا الداعى 12 ماۋسىمعا دەيىن, ال ماگيستراتۋرا مەن دوكتورانتۋراعا وسى جىلدىڭ 25 ماۋسىمىنا دەيىن ءوتىنىش بەرۋگە بولادى.
ميرا ابلاەۆا
