مەردىگەر مەكەمە وكىلدەرى دە ادەتتە اراعا ۋاقىت سالىپ جاندانا باستايتىن زيانكەس تۇرلەرىنىڭ ءبىر مەزگىلدە «ويانىپ» العانىنان قاۋىپ كۇتەتىنىن جاسىرماعان. اپتا اينالماي جاتىپ ايتقاندارى اينىماي كەلدى. ارال اۋدانىنداعى قاراقۇم اۋىلىنداعى شەگىرتكە شەرۋى الەۋمەتتىك جەلىنى كەزىپ كەتتى. بەينەجازباداعى كادرلاردان زيانكەستىڭ ءبىراز اۋماقتى جايلاپ العانى انىق بايقالىپ تۇر.
وقيعاعا بايلانىستى العاشقى بولىپ وبلىستىق اۋىل شارۋاشىلىعى جانە جەر قاتىناستارى باسقارماسى حابار تاراتتى. باسقارمانىڭ مالىمەتىنشە, قاراقۇم اۋىلدىق وكرۋگىندەگى كوكاشا ەلدى مەكەنىندە زيانكەستەر تۇرعىن ۇيلەر اۋلاسىن ەمىن-ەركىن جايلاپ العان. بار-جوعى 4 ۇيدەن تۇراتىن ەلدى مەكەن تولىق باقىلانىپ, قاجەتتى شارالار قولعا الىنعان. قالعان اۋىلدىق وكرۋگ ورتالىقتارىندا زيانكەستەردىڭ ءدال مۇنشا ەركىنسۋى بايقالعان جوق.
باسقارما دەرەگىنشە, اۋدان اۋماعىندا شەگىرتكەلەر ءساۋىر ايىنىڭ سوڭىندا بىلىنە باستاپتى. اۋەلگىدە قاراقۇم اۋىلدىق وكرۋگىنە قاراستى ايدارلى شوقالاق, ىزبانقۇمى, تورتقارا وڭىرلەرىندە, سونداي-اق سازدى اۋىلدىق وكرۋگىندەگى بەيسەمباي قۇمى, تازشاتوبە, ەسكەنە وڭىرلەرىندە يتاليالىق پرۋس دەرناسىلدەرى كوزگە تۇسكەن ەكەن. ءسال كەيىن اققۇم وكرۋگىندەگى تەڭىزباي قۇمى مەن ايتجانتاباننان, 15 مامىردا قوسامان مەن جىڭىشكەقۇم اۋىلدىق وكرۋگتەرىنەن دە زيانكەستەر بەلسەندىلىگى بايقالعان. وسىعان بايلانىستى كوكتەمگى-جازعى ماۋسىمعا ارنالعان مونيتورينگ جۇمىستارى شۇعىل باستالىپ, قازىر 145,6 مىڭ گەكتارعا جوسپارلانعان اۋماقتىڭ 5,7 مىڭ گەكتارى زەرتتەلدى. ناقتى وڭدەۋ اۋماقتارى بەلگىلەنىپ, تەحنيكالار جەتكىزىلدى. اققۇم, قاراقۇم, جىڭىشكەقۇم, قوسامان اۋىلدىق وكرۋگتەرىنە 5 جەر اگرەگاتى, قاراقۇمدا 2 اسا جەڭىل ۇشاق, سازدىدا 3 درون كومەگىمەن حيميالىق وڭدەۋ شارالارى جۇرگىزىلىپ جاتىر. وسى كۇنگە دەيىن 7 742 گەكتار اۋماقتا حيميالىق وڭدەۋ جۇمىستارى جاسالدى.
مامىردىڭ 24-نەن باستاپ مەردىگەر تاراپىنان تاعى 1 «ان-2» اۋە كولىگى قوسىلىپ, كۇردەلى رەلەفتى وڭىرلەردى ۋلاۋعا كىرىسىپ كەتتى. بۇدان بولەك, شيجاعادا 2 جەر اگرەگاتى مەن 5 رانس اپپاراتى, توقابايدا 1 جەر اگرەگاتى مەن 2 درون, قوساماندا 1 جەر اگرەگاتى مەن 1 رانس, قاراقۇمدا 7 جەر اگرەگاتى, 2 دەلتاپلان, 23 رانس اپپاراتى بار.
جولىنداعىسىن جايپاپ وتەتىن زيانكەستەر ارالقۇم, ساپاق, جىڭىشكەقۇم, بەكباۋىل اۋىلدىق وكرۋگتەرىنە قاراستى شارۋا قوجالىقتارى اۋماعى مەن مەملەكەتتىك جەر قورلارىنا دا زالال كەلتىرىپ ۇلگەرىپتى. وسىعان بايلانىستى ساپاق اۋىلدىق وكرۋگىنىڭ كوكتەم ەلدى مەكەنىندەگى شارۋا قوجالىعىنىڭ 157 گەكتار جەرى ارنايى تەحنيكامەن وڭدەلدى.
جالپى, وبلىس بويىنشا بىلتىرعى جاز بەن كۇزدەگى زەرتتەۋ جۇمىستارىنىڭ ناتيجەسىندە بيىل 115,4 مىڭ گەكتارعا فيتوسانيتارلىق شارالار جۇرگىزۋ جوسپارلانعان. ونىڭ ىشىندە يتاليالىق پرۋسقا قارسى 24,7 مىڭ گا, ازيالىق شەگىرتكەنىڭ تارالۋىن بولدىرماۋ ءۇشىن 35,3 مىڭ گا, ساياق شەگىرتكەنىڭ جولىن كەسۋ ءۇشىن 55,4 مىڭ گا وڭدەلۋى كەرەك. قازىر يتاليالىق پرۋس دەرناسىلدەرى العاش بايقالعان ارال اۋدانىندا جوسپارلانعان 513,9 مىڭ گا اۋماقتىڭ 164,8 مىڭ گەكتارى زەرتتەلدى. ونىڭ ىشىندە ەكونوميكالىق زياندى شەگىنەن اسقان 14,7 مىڭ گەكتاردىڭ جارتىسىنان استامى وڭدەلدى.
وبلىستىڭ وڭتۇستىك وڭىرلەرىندە ساياق شەگىرتكەگە قارسى حيميالىق وڭدەۋ جۇمىستارى باستالىپ كەتتى. ءتيىستى سالا وكىلدەرى وڭدەۋ جۇمىستارىنىڭ بارىسىن ءجىتى قاداعالاپ وتىر. اۋدان, اۋىل اكىمدىكتەرىنە مەردىگەر كومپانيالار جۇمىسىنا جاعداي جاساپ, جان-جاقتى كومەك كورسەتۋ تاپسىرىلدى.
قىزىلوردا
