گۇلنۇر كەنجەبايقىزى ايكيدو زالىنىڭ تابالدىرىعىن 7-سىنىپتا اتتاعان-دى. ودان بەرى دە بەس جىلعا جۋىق ۋاقىت ءوتتى. ياعني, كۇندەلىكتى جاتتىعۋلار, كۇنتىزبەلىك جوسپارعا ساي سەمينارلار, ەمتيحاندار دەگەندەي.
ايكيدودان 4-ءشى كيۋ كوك بەلبەۋدىڭ يەگەرى گۇلنۇر 11-سىنىپتى وبلىستىق دارىندى بالالارعا ارنالعان مامانداندىرىلعان مەكتەپ-ينتەرناتىندا «التىن بەلگىمەن» اياقتاپ, نازارباەۆ ۋنيۆەرسيتەتتىڭ ستۋدەنتى اتاندى. بيىل 1-كۋرستى ءتامامداپ, ەلوردادان تۋعان قالاسىنا كەلگەن ول, جاز ۋاقىتىنداعى دەمالىسىندا ءوزى اينالىسقان ايكيدو زالىنان تابىلىپ, استاناعا اتتانعانعا دەيىن جاتتىعۋىن جالعاستىرۋدا. كەز كەلگەن تەحنيكانى ءتۇسىنىپ ورىنداۋعا تىرىساتىن كوك بەلبەۋلى بويجەتكەننىڭ ايكيدوداعى الار اسۋى ءالى الدا دەپ بىلەمىز. ياعني, بۇيىرتسا, قارا بەلبەۋ تاعار كۇندەرى دە الىس ەمەس. تەك جاتتىعۋداعى بازالىق تاسىلدەردىڭ ءجىتى قاداعالانىپ, دۇرىس ورىندالۋىنا اسا كوڭىل بولگەنى كەرەك. بىرقاتار ايكيدوشىلار سەكىلدى ول دا الەمدىك ايكيدو ورتالىعىنىڭ (ورتالىعى – جاپونيادا) مۇشەسى. گۇلنۇر كەنجەبايقىزىنىڭ قارا بەلبەۋلى اتانعانىن ونىمەن ۇزەڭگىلەس جۇرگەن ايكيدوشىلار دا قالايدى. جالپى, گۇلنۇر ايكيدومەن اينالىسىپ, استانادا جۇرسە دە, ەلگە كەلگەندە ۇمىتىپ كەتپەي, جاتتىعۋىن جالعاستىرىپ وتىرادى. ونىمەن بىرگە جاتتىققان ءبىراز قىزدىڭ قاراسى قازىر ايكيدودا كورىنبەيدى. گۇلنۇر بولسا, جانىنا جاقىن جاپوننىڭ جاۋىنگەرلىك قورعانىس ونەرىنەن قول ۇزبەك ەمەس. ويتكەنى, ايكيدو وعان ۇنايدى. اسان نارىنباي ۇلى. ورال.
