تاراز. 6 مامىر. الداعى ۋاقىتتا تاراز مەملەكەتتىك پەداگوگيكالىق ينستيتۋتىندا قازاقستان حالقى اسسامبلەياسى كافەدراسى اشىلماق. سونىمەن قاتار, جوعارى وقۋ ورنىندا قازاقستان حالقى اسسامبلەياسىنىڭ 20 جىلدىعىنا وراي ۇيىمداستىرىلعان «بىرلىگى مىقتى ەل وزادى» اتتى ونەر فەستيۆالىنىڭ گالا-كونتسەرتى ءوتتى. بۇل تۋرالى egemen.kz ءتىلشىسى حابارلادى.
«مەملەكەتىمىزدە تۇرىپ جاتقان كوپتەگەن ۇلتتار مەن دياسپورالار وسى ۋاقىت ىشىندە ىنتىماعى جاراسىپ, تاتۋلىق بەسىگىندە تەربەلىپ كەلەدى. راس, قازاق حالقى تاريحتىڭ جازۋىمەنەن ەلىمىزگە كىرىككەن كوپتەگەن ۇلتتارعا باۋىرمالدىق تانىتىپ قانا قويعان جوق, ولارعا بارىنشا دەمەۋ بولىپ, قولداۋ كورسەتتى. ءبىزدىڭ وقۋ ورنىمىزدا 10-نان استام ۇلتتىڭ وكىلدەرى ساپالى ءبىلىم, سانالى تاربيە الۋدا. «بايلىق – بايلىق ەمەس, بىرلىك – بايلىق» دەگەندەي, راسىندا, قازاقستاننىڭ ساياسي-الەۋمەتتىك دامۋىندا «بىرلىك» كاتەگورياسى ەڭ نەگىزگى قۇندىلىق بولىپ تابىلادى. ەندەشە, بىرلىگى بەكەم, ىنتىماعى بەرىك ەلىمىزدىڭ اسار اسۋى, شىعار بيىگى كوپ بولعاي!» – دەدى تارمپي رەكتورى داريا قوجامجاروۆا.
وسى وقۋ ورنىنىڭ ۇيىتقى بولۋىمەن ستۋدەنتتەر مەن جامبىل وبلىسى وڭىرىندەگى ۇلتتىق-مادەني ورتالىقتار وكىلدەرىنىڭ قاتىسۋىمەن ونەر فەستيۆالى ۇيىمداستىرىلعان بولاتىن. 3 ايعا سوزىلعان شارا قورىتىندىسى بويىنشا ءتۇرلى نوميناتسيالاردا ۇزدىكتەر انىقتالىپ, ماراپاتتالدى. اتاپ ايتقاندا, «ۇزدىك ۇلتتىق ءداستۇر» اتالىمى بويىنشا شىعارماشىلىق ماماندىقتارى فاكۋلتەتىنىڭ «مادەني تىنىعۋ جۇمىسى جانە حورەوگرافيا» كافەدراسى, پەداگوگيكا فاكۋلتەتىنىڭ «ارنايى پەداگوگيكا» كافەدراسى لايىق دەپ تانىلدى. ال, «ۇزدىك ۇلتتىق تاعام» نوميناتسياسىن تاريح-گەوگرافيا فاكۋلتەتىنىڭ «فيلوسوفيا جانە ساياسي الەۋمەتتىك پاندەر» كافەدراسى, جاراتىلىستانۋ عىلىمدارى فاكۋلتەتىنىڭ «بيولوگيا جانە بيولوگيانى وقىتۋ ادىستەمەسى» كافەدراسى, شىعارماشىلىق ماماندىقتار فاكۋلتەتىنىڭ «كاسىپتىك وقىتۋ جانە ديزاين» كافەدراسى قانجىعالارىنا بايلادى. «جاراتىلىستانۋ عىلىمدارى فاكۋلتەتىنىڭ «حيميا جانە حيميانى وقىتۋ ادىستەمەسى» جانە «ينفورماتيكا جانە ەسەپتەۋ تەحنيكاسى» كافەدرالارى, فيلولوگيا فاكۋلتەتىنىڭ «شەتەل تىلدەرى» كافەدراسى «ۇزدىك ۇلتتىق ونەر» نوميناتسياسىندا ۇزدىك دەپ تانىلدى.
مەرەكەلىك شارا سوڭى تاراز مەملەكەتتىك پەداگوگيكالىق ينستيتۋتىنىڭ «جىبەك جولى» حالىقتىق-ەستارادالىق وركەسترى, «كونە تاراز» فولكلورلىق-ەتنوگرافيالىق جانە «توميريس» بي انسامبلدەرىنىڭ, ۇلتتىق-مادەني ورتالىقتاردىڭ شىعارماشىلىق ۇجىمدارىنىڭ گالا-كونتسەرتىنە ۇلاستى.
ورالحان ءداۋىت.
دەرەك, سۋرەت: egemen.kz.
