استانا. 21 ماۋسىم. بۇگىن بۇكىلالەمدىك بوكس سەرياسىنىڭ (WSB) بەسىنشى ماۋسىمى اياقتالدى. استانادا وتكەن فينالدىق باسەكەدە «استانا ارلاندارى» مەن «كۋبا دومادورەس» كوماندالارى كۇش سىناستى. كەشە ءبىرىنشى جارىس كۇنىندە «ارلاندار» 3:2 ەسەبىمەن باسىم تۇسكەن بولاتىن. بۇگىنگى ەكىنشى سايىس كۇنىندە دە ءبىزدىڭ كوماندانىڭ پايداسىنا ءدال سونداي ەسەپ تىركەلدى. ناتيجەسىندە «استانا ارلاندارى» 6:4 ەسەبىمەن جەڭىسكە جەتىپ, WSB جوباسىنىڭ ەكى دۇركىن چەمپيونى اتاندى. بۇل تۋرالى egemen.kz حابارلادى.
بۇگىنگى بوكس كەشى 52 كيلوعا دەيىنگى سالماق دارەجەسىندەگى بوكسشىلاردىڭ جەكپە-جەگىمەن باستالدى. «ارلانداردىڭ» جاتتىقتىرۋشىلار قۇرامى بۇل سالماقتا ولجاس ساتتىباەۆقا سەنىم ارتسا, كۋبانىڭ نامىسىن يوسۆاني ۆەيتيا قورعادى. اتالعان سىندا ولجاستىڭ مەرەيى ۇستەم بولىپ, 3:0 ەسەبىمەن جەڭىسكە جەتتى. ءدال وسىنداي ەسەپپەن, اسلانبەك شىمبەرگەنوۆ (69 كگ.) پەن يۆان دىچكو دا (+91 كگ.) قارسىلاستارىن تىزە بۇكتىردى.
ال 60 كيلوعا دەيىن سالماقتا باق سىناعان زاكير سافيۋللين لاسارو الۆارەسكە 1:2 ەسەبىمەن ەسە جىبەردى. سونداي-اق, 81 كيلودا جۇدىرىقتاسقان نۇرداۋلەت جارمانوۆ ەكى دۇركىن الەم چەمپيونى حۋليو سەسار لا كرۋستەن 0:3 ەسەبىمەن جەڭىلدى.
ەكى كۇننىڭ قورىتىندىسى بويىنشا, «ارلانداردىڭ» پايداسىنا 6:4 ەسەبى تىركەلدى. وسىلايشا, قازاقستاننىڭ كومانداسى WSB جوباسىندا ەكى دۇركىن چەمپيون اتانعان تۇڭعىش كلۋب رەتىندە حاتقا ءتۇستى. بۇعان دەيىن ءبىزدىڭ بوكسشىلار 2012-2013 جىلعى ماۋسىمدا جەڭىسكە جەتكەنى بەلگىلى. ال اتالعان جوباعا بىلتىر عانا قوسىلعان كۋبالىقتار وسىمەن ەكىنشى رەت فينالدا ونەر كورسەتتى. وتكەن جىلى چەمپيوندىق اتاققا قول جەتكىزسە, بيىل كۇمىس جۇلدەنى ەنشىلەدى.
«استانا ارلاندارى» – «كۋبا دومادورەس» 6:4
ءبىرىنشى كۇن: 49 كگ.: تەمىرتاس ءجۇسىپوۆ – يوانيس وسكار ارگيلاگوس 3:0 (50:45, 50:45, 50:45); 56 كگ.: قايرات ەراليەۆ – روبەيسي راميرەس 0:3 64 كگ.: سامات باشەنوۆ – ياسنيەر تولەدو لوپەس 3:0 (48:47, 48:47, 48:47); 75 كگ.: مەيىرىم نۇرسۇلتانوۆ – ارلەن لوپەس كاردونا 3:0 (48:47, 48:47, 48:47); 91 كگ.: ۆاسيلي لەۆيn – ەريسلاندي ساۆون كوتيللا 1:2 (47:48, 47:48, 49:46). ەكىنشى كۇن: 52 كگ.: ولجاس ساتتىباەۆ – يوسۆاني ۆەيتيا سوتو 3:0 (49:46, 49:46, 49:46); 60 كگ.: زاكير سافيۋللين – لاسارو الۆارەس 1:2 (46:49, 46:49, 48:47); 69 كگ.: اسلانبەك شىمبەرگەنوۆ – رونيەل يگلەسياس سوتولونگو 3:0 (48:47, 48:47, 50:45); 81 كەلى: نۇرداۋلەت جارمانوۆ – حۋليو سەسار لا كرۋس 0:3 (46:49, 45:50, 45:50); + 91 كەلى: يۆان دىچكو – يوحاندي تويراك ورتەگا 3:0 (50:45, 50:45, 50:45). ەلامان قوڭىر. دەرەك: egemen.kz. سۋرەت: worlseriesboxing.com.
