جاقىندا س.د.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ كلينيكاسىندا «قازاق حاندىعىنىڭ 550 جىلدىعىن» مەرەكەلەۋ اياسىندا مەملەكەت جانە قوعام قايراتكەرلەرى, داڭقتى سپورتشىلار مەن ونەرپازداردىڭ قاتىسۋىمەن الەۋمەتتىك اكتسيا – «اشىق ەسىك كۇنى» ءوتتى.
«ەلباسى ن.ءا.نازارباەۆتىڭ ۇسىنىسىمەن بيىل «قازاق حاندىعىنىڭ 550 جىلدىعىن» بۇكىل ەل بولىپ اتاپ وتكەلى وتىرمىز. وسى ورايدا, س.د.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ كلينيكاسى دا بەلسەندىلىك تانىتىپ, پرەزيدەنتىمىزدىڭ باستاماسىن قولداپ, بۇگىنگى الەۋمەتتىك ءىس-شارانى – «اشىق ەسىك كۇنىن» ۇيىمداستىرىپ, وتكىزىپ وتىر. بۇل شارامىزعا 100-گە جۋىق ادامدى شاقىرىپ, تەگىن مەديتسينالىق قىزمەت كورسەتپەكشىمىز. اكتسيانىڭ نەگىزگى ماقساتى – ەلىمىزدىڭ ءوسىپ-وركەندەۋىنە, اتاق-داڭقىنىڭ شىعۋى مەن حالىقارالىق دارەجەسىنىڭ كوتەرىلۋىنە بار كۇش-جىگەرى مەن قاجىر-قايراتىن جۇمساعان, حالقى ءۇشىن ايانباي ەڭبەك ەتىپ, تەر توككەن ەلىمىزدىڭ ابىرويلى ازاماتتارىنا لايىقتى سىي-قۇرمەت كورسەتۋ», – دەدى ءوز سوزىندە اتالمىش كلينيكانىڭ ديرەكتورى جانار عۇبايدۋللينا.
ۋنيۆەرسيتەتتىڭ كلينيكاسى كوپباعىتتى دياگنوستيكالىق ورتالىق بولىپ تابىلادى. كلينيكا نەگىزىندە اۋقىمدى كەڭەستىك-دياگنوستيكالىق ورتالىق, مامانداندىرىلعان ستاتسيونارمەن جابدىقتالعان, بۇگىنگى كۇندەگى الماتى قالاسىنداعى بىردەن-ءبىر ديابەت ورتالىعى مەن نەۆرولوگيا ءبولىمى جانە رەسپۋبليكامىزدا العاشقى رەت ناۆيگاتسيالىق جۇيە قولدانۋ ارقىلى قاۋىپسىز ءارى جەڭىل تۇردە جەدەل كومەك كورسەتۋگە بەيىمدەلگەن لور ورتالىعى قىزمەت جاسايدى. سونىمەن قاتار, كلينيكا اياسىندا دۇنيەجۇزىندەگى 69 مەملەكەتتىڭ جوعارى بىلىكتى پروفەسسورلارىنىڭ اقىل-كەڭەسىن الۋ مۇمكىندىگى قاراستىرىلعان. «كلينيكا ۇجىمىنا ءوز العىسىمدى بىلدىرگىم كەلەدى. بۇگىن بىزگە وتە جوعارى دەڭگەيدە قىزمەت كورسەتىلۋدە. «دەننىڭ ساۋلىعى – باستىڭ بايلىعى» دەمەكشى, ارقاشاندا دەنساۋلىق ساقتاۋ ماسەلەسىنە ۇلكەن ءمان بەرىلىپ, باستى نازاردا تۇرعان. مۇنداي يگى شارالاردىڭ ماعىناسى وراسان زور. وسى ورايدا, بۇگىنگى اكتسيانىڭ ۇيىمداستىرۋشىلارىنا تەك ريزاشىلىعىمدى ءبىلدىرىپ, ۇلكەن العىسىمدى ايتامىن. دەنساۋلىق ساقتاۋ سالاسىنداعى ەڭبەكتەرىڭىز جانا بەرسىن, حالقىمىز امان بولسىن», – دەدى فيلولوگيا عىلىمدارىنىڭ دوكتورى, ۇلتتىق عىلىم اكادەمياسىنىڭ اكادەميگى, قازاق ءتىلى سالاسىنىڭ مامانى ومىرزاق ايتباەۆ. كلينيكانىڭ ديرەكتورى جانار عۇبايدۋللينانىڭ ايتۋىنشا, مۇنداي شارالار الداعى ۋاقىتتا ءوز جالعاسىن تاباتىن بولادى.
شارافاددين ءامىروۆ, «ەگەمەن قازاقستان».
الماتى.
