جۋىردا عانا جەرگىلىكتى شارۋالارمەن كەزدەسۋدە سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ بيىل وڭىردە 60 مىڭ گەكتارعا جۋىق ەگىس القابى لازەرمەن تەگىستەلگەنىن ايتىپ ءوتتى.
وتكەن جىلى 55 مىڭ گەكتاردى لازەرمەن تەگىستەۋ ناتيجەسىندە 200 ملن تەكشە مەتر سۋ ۇنەمدەلىپ, وسىعان دەيىن گەكتارىنا 40-55 تسەنتنەردەن اينالىپ كەلگەن ورتاشا ءونىم كولەمى 70-80 تسەنتنەرگە دەيىن ۇلعايعان. دەگەنمەن قىمبات تەحنيكاعا اركىمنىڭ قولى جەتە بەرمەيتىنى تاعى بار. وسى كۇنى وبلىستا 100 مىڭ گەكتارعا دەيىن ەگىستىك القاپتى قامتۋعا مۇمكىندىك بەرەتىن وسىنداي 123 تەحنيكا بار.
وسىدان دا ۇكىمەت اۋىل شارۋاشىلىعى كووپەراتيۆتەرىنىڭ لازەرمەن تەگىستەگىشتەردى ساتىپ الۋ شىعىندارىن 50%-عا دەيىن سۋبسيديالاۋعا كوشتى.
«سىزدەرمەن ەڭ العاش كەزدەسۋدە ايتقان ۇسىنىستارىڭىز بويىنشا بويىنشا ءبىز كووپەراتيۆتەرگە ارنالعان سۋبسيديا مولشەرىن 25%-دان 50%-عا دەيىن ۇلعايتتىق. وسىعان دەيىن سۋبسيديا ەگىستىك القابى 200 گەكتاردان اساتىن شارۋاشىلىقتارعا عانا تولەنەدى دەگەن تالاپ بار ەدى. ءبىز اۋىل شارۋاشىلىعى مينيسترلىگىمەن بىرلەسە وتىرىپ, بۇل شەكتەۋدى دە الىپ تاستادىق», دەدى سۋ رەسۋرستارى جانە يرريگاتسيا ءمينيسترى.
وبلىستىڭ سولتۇستىگىندە ءدان سەبۋ كەشەگى اپتاپ ىستىقتارمەن تۇسپا-تۇس كەلىپ, سۋارۋ ماۋسىمى جىلداعىدان ەرتەرەك باستالدى. كوكتەم باستالعالى كوكتەن تامشى دا تامباعان وڭىردە بيىل سۋعا سۇرانىس ەسەلەپ ارتاتىنى انىق. بۇگىندە وبلىسقا شاردارا سۋ قويماسىنان سەكۋندىنا 600 تەكشە مەتر سۋ جىبەرىلىپ جاتىر.
«پرەزيدەنتتىڭ وسى باعىتتاعى «كولەڭكەلى نارىقتى» جويۋ جونىندە ناقتى تاپسىرما بەرگەنىن بىلەسىزدەر. وسىعان بايلانىستى مينيسترلىك بىرنەشە ماڭىزدى شەشىم قابىلدادى. ەندى «قازسۋشار» فيليالدارى كەلىسىمشارتقا وتىرعان شارۋا قوجالىقتارىنا عانا سۋ بەرەدى. زاڭسىز سۋ الۋعا رۇقسات جوق. جاڭا سۋ كودەكسىندە دە وسى ماسەلەگە باسا نازار اۋدارىلىپ, جاۋاپكەرشىلىك كۇشەيتىلدى. قۇجات 10 ماۋسىمنان باستاپ كۇشىنە ەنەدى», دەدى مينيستر.
جالاعاش اۋدانىندا يرريگاتسيالىق جانە درەناجدىق جۇيەلەردى قايتا جاڭعىرتۋ جۇمىستارى اياقتالىپ وتىر. بارلىعى 1 362,2 شاقىرىم كانال قايتا جاڭارتىلىپ, 14 617 شاعىن گيدروتەحنيكالىق نىسان اۋىستىرىلىپ, جاڭادان سالىنىپتى. سونداي-اق 327,86 شاقىرىم كوللەكتور مەن 151 باقىلاۋ ۇڭعىماسى قالپىنا كەلتىرىلگەن.
وسى جۇمىستار ناتيجەسىندە جالپى كولەمى 15,1 مىڭ گەكتار اۋىل شارۋاشىلىعى القاپتارىن سۋمەن جابدىقتاۋ جاعدايى جاقسارىپ, سۋارمالى جەرلەر تولىق يگەرىلدى. سۋ شىعىنىن 30%-عا دەيىن ازايتۋعا مۇمكىندىك بەرەتىن وسى جوبا ارقىلى جىلىنا شامامەن 95 ملن تەكشە مەتر سۋ ۇنەمدەلەدى.
جەرگىلىكتى شارۋا قوجالىقتارى دا كوپ جىلدان بەرى اياقسۋمەن قامتۋ باعىتىنداعى بۇل جۇمىسقا وڭ باعا بەرىپ وتىر. ولاردىڭ ايتۋىنشا كانالداردى تازارتىپ, شليۋزدەر ورناتۋ ارقاسىندا سۋ جەتكىزۋ جاعدايى 35-40%-عا جاقسارعان.
مينيسترلىكتىڭ مالىمەتىنشە, دۇنيەجۇزىلىك بانكپەن بىرلەسكەن يرريگاتسيالىق جانە درەناجدىق جۇيەلەردى جەتىلدىرۋ جوباسىنىڭ ەكىنشى كەزەڭى اياسىندا وسىنداي جۇمىستار الماتى, جامبىل جانە تۇركىستان وبلىستارىندا دا جۇرگىزىلىپ جاتىر. وسىنىڭ ارقاسىندا 105 مىڭ گەكتاردان استام جەردىڭ سۋارمالى جاعدايى جاقسارادى. جوبا شامامەن 86%-عا اياقتالىپ تۇر. قازىردىڭ وزىندە 79,15 مىڭ گەكتار ەگىستىككە سۋ جەتكىزۋ جاقسارىپ, جىلىنا 201,8 ملن تەكشە مەتر سۋ ۇنەمدەۋگە جاعداي جاسالىپتى.
سىردا بيىل 80,9 مىڭ گەكتارعا ەگۋ جوسپارلانعان. قازىر وسى كولەمنىڭ 51,9 مىڭ گەكتارى ەگىلىپ, 41,8 مىڭ گەكتارى سۋعا باستىرىلىپتى.
قىزىلوردا
